ជាតិ
កសិករជាង១០០គ្រួសារមកពីរាជធានី-ខេត្ត១៥ នឹងប្រកួតគ្នាពី «បន្លែសុវត្ថិភាព»
រូបតំណាង៖ ប្រជាកសិករមកពីសហគមន៍ដាំបន្លែសុវត្ថិភាព នៅក្នុងស្រុកសូទ្រនិគម ប្រាសាទបាគង និងស្រុកបន្ទាយស្រី បានយកបន្លែរបស់ខ្លួនមកដាក់លក់នៅក្នុងស្តង់មួយកន្លែងទល់មុខទីស្នាក់ការផ្តល់ព័ត៌មានទេសចរណ៍ស្ថិតនៅក្បែរសួនច្បារមុខព្រះរាជដំណាក់ នាក្រុងសៀមរាប។
×![]()
ភ្នំពេញ៖ កសិករជាង១០០គ្រួសារ មកពីរាជធានី-ខេត្ត១៥ នឹងចូលរួមប្រកួតប្រជែង «បន្លែក្នុងស្រុក» ដែលនឹងរៀបចំឡើងនៅស្រុកស្វាយជ្រុំ ខេត្តស្វាយរៀង នាថ្ងៃទី៦ ខែមីនា ឆ្នាំ២០២០។ បន្លែដែលកសិករទាំងជាង១០០គ្រួសារ យកទៅប្រកួតគ្នានោះ គឺជាប្រភេទបន្លែធម្មជាតិ បន្លែសុវត្ថិភាព និងបន្លែសរីរាង្គ។ 
លោក សុខ សុថា ប្រធានស្ថាបនិកនិងជានាយកប្រតិបត្តិនៃសមាគមសហព័ន្ធកសិករកម្ពុជានៃអ្នកផលិតកសិកម្ម (សសកជ) បានប្រាប់សារព័ត៌មានThmeyThmey25 ថា កម្មវិធីនេះធ្វើឡើងដើម្បីជំរុញ និងលើកទឹកចិត្តដល់ក្រុមកសិករខ្នាតតូច ក្នុងការបង្កើនដាំបន្លែដែលមានសុវត្ថិភាព និងគុណភាពបន្ថែមទៀតសម្រាប់ផ្គត់ផ្គង់តម្រូវការទីផ្សារក្នុងស្រុក។ លោក បន្តថា កម្មវិធីនេះក្រៅពីលើកទឹកចិត្តដល់ក្រុមអ្នកដាំបន្លែខ្នាតតូចហើយនោះ អ្នកចូលរួមក៏ទទួលបានអត្ថប្រយោជន៍ជាច្រើនផងដែរ ក្នុងការឈ្វេងយល់អំពីការជ្រើសរើសបន្លែដែលមានសុវត្ថិភាពសម្រាប់ទទួលទានប្រចាំថ្ងៃ និងយល់ដឹងអំពីកសិករនីមួយៗដែលអនុវត្តការដាំដុះបន្លែដែលមានស្តង់ដារនិងមានការទទួលស្គាល់ថ្នាក់ជាតិ។ លើសពីនេះ អ្នកចូលរួម នឹងមានឱកាសផ្សារភ្ជាប់ទំនាក់ទំនងដោយផ្ទាល់ជាមួយកសិករដែលជាអ្នកដាំបន្លែមានគុណភាពទាំងនោះ។
លោក សុខ សុថា បញ្ជាក់ថា កម្មពិធីប្រកួត «បន្លែក្នុងស្រុក» គឺជាកម្មវិធីនៃឆ្នាំដំបូងដែលសមាគមសហព័ន្ធកសិករកម្ពុជានៃអ្នកផលិតកសិកម្ម និងដៃគូនានា រួមគ្នារៀបចំឡើង ដោយលោកនឹងព្យាយាមរៀបចំកម្មវិធីនេះឱ្យបានជារៀងរាល់ឆ្នាំនៅតាមបណ្តាខេត្តនានាដែលមានសក្កានុពលក្នុងការដាំដុះបន្លែ ដោយគិតចាប់ពីឆ្នាំ២០២០នេះតទៅ។
កសិករជាង១០០គ្រួសារមកពីរាជធានី-ខេត្តទាំង១៥ ដែលចូលរួមប្រកួត «បន្លែក្នុងស្រុក» រួមមាន ភ្នំពេញ ស្វាយរៀង កណ្តាល តាកែវ ព្រៃវែង កំពត កែប កំពង់ចាម កំពង់ធំ ត្បូងឃ្មុំ សៀមរាប បន្ទាយមានជ័យ ឧត្តរមានជ័យ ប៉ៃលិន និងខេត្តបាត់ដំបង៕
Tag:
បន្លែសុវត្ថិភាព
បន្លែសរីរាង្គ
© រក្សាសិទ្ធិដោយ thmeythmey.com
