COVID-19
អន្តរជាតិ
អាជ្ញាធរថៃ ចុះបង្ក្រាបទីតាំងកែច្នៃម៉ាស់ប្រើប្រាស់ឡើងវិញ
× ទីតាំងកែច្នៃម៉ាស់មួយកន្លែងនៅក្នុងប្រទេសថៃ នាថ្ងៃទី២ ខែមីនា ត្រូវបានសមត្ថកិច្ចចុះទៅបង្ក្រាប។ ការចុះបង្ក្រាបនេះធ្វើឡើង ដើម្បីការពារសុខភាពសាធារណៈ និងអ្នកប្រើប្រាស់ពីម៉ាស់កែច្នៃបែបនេះ។
ទីតាំងកែច្នៃម៉ាស់មួយទឹកមួយកន្លែង នៅក្នុងឃុំ Nongsuong ស្រុក Wihandaeng ខេត្តSaraburi ត្រូវបានអភិបាលស្រុក និងមន្ត្រីប៉ូលិស ចុះទៅបង្ក្រាប បន្ទាប់ពីរកឃើញថា វាជាទីតាំងកែច្នៃម៉ាស់ខុសច្បាប់។ បើតាមការអះអាងរបស់អភិបាលស្រុក លោក Somsak Kaewsena ប៉ូលិសបានរកឃើញមនុស្សចំនួន ៦នាក់ កំពុងអ៊ុតម៉ាស់ និងរៀបចំម៉ាស់ដាក់ក្នុងប្រអប់ មុនពេលបិទប្រអប់ទាំងនោះឲ្យដូចថ្មី។
បើតាមការអះអាងប្រាប់ប៉ូលិសរបស់កម្មករ ១នាក់ លោកបានទទួលម៉ាស់មួយទឹកទាំងនេះ ពីឈ្មួញម្នាក់ ហើយលោកក៏មិនដឹងពីប្រភពដើមនៃម៉ាស់នេះឡើយ។ នេះបើតាមការចុះផ្សាយរបស់សារព័ត៌មាន The Nation។ ចំណែកតម្លៃវិញ ម៉ាស់មួយសន្លឹក ទីតាំងកែច្នៃម៉ាស់ទទួលបាន ១បាត។ តាមការបញ្ជាក់របស់លោកអភិបាលស្រុក ទីតាំងនេះ អាចកែច្នៃម៉ាស់ឡើងវិញក្នុងមួយថ្ងៃ បានដល់ទៅ ៣០០ ទៅ ៤០០សន្លឹកឯណោះ។
ពាក់ព័ន្ធនឹងបញ្ហានេះ ប៉ូលិសបានរឹបអូសយកម៉ាស់ទាំងអស់ និងបញ្ជូនម៉ាស់មួយចំនួនទៅក្រសួងពាណិជ្ជកម្ម ដើម្បីស៊ើបអង្កេត ថាតើម៉ាស់មួយទឹកទាំងអស់នេះមានប្រភពមកពីណា។ ចំណែកទីតាំងមួយនេះ ក៏ត្រូវបានលោកអភិបាលស្រុក ទាក់ទងឲ្យការិយាល័យសុខាភិបាលសាធារណៈស្រុកWihandaeng ឲ្យដាក់ពាក្យបណ្តឹងផងដែរ ព្រោះវាប៉ះពាល់ដល់សុខភាពរបស់ប្រជាជន និងអ្នកប្រើប្រាស់ម៉ាស់ច្នៃប្រើប្រាស់ឡើងវិញនេះ។
សូមបញ្ជាក់ថា ចាប់តាំងពីផ្ទុះCOVID-19 ក្នុងរយៈពេល ២ខែកន្លងមកនេះ ម៉ាស់ គឺមានតម្រូវការយ៉ាងច្រើននៅតាមបណ្តាប្រទេសជាច្រើន។ មានឈ្មួញខ្លះបានទិញម៉ាស់ទុក និងលក់ចេញក្នុងតម្លៃខ្ពស់ ខណៈពេលរោងចក្រផលិតម៉ាស់នៅក្នុងប្រទេសចិនមួយចំនួន ទើបបានចាប់ផ្តើមចង្វាក់ផលិតកម្មរបស់ខ្លួន ប៉ុណ្ណោះ៕
© រក្សាសិទ្ធិដោយ thmeythmey.com