ជាតិ
សម្ដេច ហ៊ុន សែន ឲ្យក្រសួង-ស្ថាប័នពាក់ព័ន្ធ រួមគ្នាទប់ស្កាត់ការបំពានច្បាប់សិទ្ធិអ្នកនិពន្ធ និងសិទ្ធិប្រហាក់ប្រហែល
× ភ្នំពេញ៖ សម្ដេច ហ៊ុន សែន បានប្រាប់ឲ្យក្រសួងវប្បធម៌ និងវិចិត្រសិល្បៈ បន្តសហការជាមួយក្រសួងប្រៃសណីយ៍ និងទូរគមនាគមន៍ និងនាយកដ្ឋានប្រឆាំងបទល្មើសបច្ចេកវិទ្យានៃក្រសួងមហាផ្ទៃ ដើម្បីទប់ស្កាត់ការបំពានច្បាប់ស្តីពីសិទ្ធិអ្នកនិពន្ធ និងសិទ្ធិប្រហាក់ប្រហែល។ ការលើកឡើងរបស់ប្រមុខរដ្ឋាភិបាលដូច្នេះ ធ្វើឡើងក្នុងពេលសម្តេចចូលរួមទិវា «វប្បធម៌ជាតិ ៣មីនា» លើកទី២២ រសៀលថ្ងៃទី០៣ មីនា,ពិធីបិទមហោស្រពសិល្បៈយុវជនទូទាំងប្រទេសឆ្នាំទី៦ និងពិធីជួបជុំសំណេះសំណាលពិសាបាយសាមគ្គីជាមួយសិល្បករ សិល្បការិនីនាមជ្ឈមណ្ឌលសន្និបាតកោះពេជ្រ។
ក្រៅពីណែនាំក្រសួង និងស្ថាប័នពាក់ព័ន្ធសម្ដេចនាយករដ្ឋមន្ត្រី ក៏បានអំពាវនាវដល់ប្រជាពលរដ្ឋ ពិសេសសិល្បករ សិល្បការិនី និងអ្នកនិពន្ធស្នាដៃនានា បញ្ឈប់ការរំលោភបំពានច្បាប់ ស្តីពីសិទ្ធិអ្នកនិពន្ធ និងសិទ្ធិប្រហាក់ប្រហែលនេះដែរ។ ការយកស្នាដៃចម្រៀង ភាពយន្ត រូបភាព អក្សរសាស្ត្រ អក្សរសិល្បិ៍ និងស្នាដៃវប្បធម៌ដទៃៗទៀត ទាំងស្នាដៃដែលមានមរតកសាសន៍ និងគ្មានមរតកសាសន៍មកផលិតឡើងវិញ ដោយពុំបានសុំការអនុញ្ញាតពីម្ចាស់សិទ្ធិ ឬពីក្រសួងវប្បធម៌និងវិចិត្រសិល្បៈ គឺជាការបំពានច្បាប់ស្តីពីសិទ្ធិអ្នកនិពន្ធ និងសិទ្ធិប្រហាក់ប្រហែល។ នេះបើតាមប្រមុខរដ្ឋាភិបាល៕
Tag:
វប្បធម៌
សិទ្ធិអ្នកនិពន្ធ
ច្បាប់
© រក្សាសិទ្ធិដោយ thmeythmey.com