កីឡាអន្តរជាតិ
អន្តរជាតិ
Liverpool ធ្លាក់ពី FA Cup ក្នុងបរាជ័យ៣លើកជាប់គ្នា ក្រោយ Klopp ទទួលសំបុត្រពីក្មេងម្នាក់
×![]()
ដោយ: ទេព ពិទូរ្យ
Liverpool បានធ្លាក់ចេញពីពានរង្វាន់ FA Cup ត្រឹមវគ្គ១៦ក្រុមចុងក្រោយ បន្ទាប់ពីចាញ់ Chelsea ក្នុងលទ្ធផល ២-០។ នេះជាបរាជ័យលើកទី៣ជាប់គ្នារបស់ក្រុមរហស្សនាមហង្សក្រហម ចាប់តាំងពីអ្នកគាំទ្រក្រុម Manchester United វ័យ១០ឆ្នាំម្នាក់ បានសរសេរសំបុត្រស្នើឲ្យលោក Jurgen Klopp បញ្ចប់ការឈ្នះរបស់ក្រុមលោក។
ជំនួបនៅកីឡដ្ឋាន Stamford Bridge នៅរាត្រីថ្ងៃទី៣ ខែមីនា ខ្សែបម្រើ Willian និង Ross Barkley ស៊ុតបញ្ចូលទីម្នាក់១គ្រាប់ដើម្បីនាំក្រុមដែលដឹកនាំដោយអ្នកចាត់ការទូទៅលោក Frank Lampard ឈានទៅវគ្គ១/៤ផ្តាច់ព្រ័ត្រ FA Cup រដូវកាល២០១៩-២០នេះ។
ជ័យជម្នះនេះ ជាជោគជ័យសម្រាប់ក្រុម Chelsea ដ្បិតពួកគេអស់ឱកាសប្រជែងពានក្នុងស្រុក Premier League ក៏ដូចជាពាន Champions League ក្រោយចាញ់ Bayern Munich នៅជើងទី១ ក្នុងដីខ្លួនឯងដល់ទៅ ៣-០។
ដោយឡែក Liverpool វិញក្នុងចំណោម៤ប្រកួតចុងក្រោយពួកគេលេងចាញ់ដល់ទៅ៣លើក ដែលជាបរាជ័យគួរកត់សម្គាល់ ខណៈដែលពួកគេបានបង្ហាញភាពខ្លាំងរបស់ខ្លួនចាប់តាំងពីផ្តើមរដូវកាលថ្មីមក។ ក្នុងក្របខណ្ឌ Premier League ចំនួន២៧ប្រកួត ក្រុមលោក Klopp មិនស្គាល់ចាញ់ឡើយ ដោយក្នុងនោះឈ្នះ២៦ និងស្មើ១។
រឿងនឹកស្មានមិនដល់បានកើតឡើងលើម្ចាស់ការពារជើងឯកពានកំពូលអឺរ៉ុបមួយនេះ។ ក្មេងប្រុសម្នាក់ឈ្មោះ Daragh Curley ដែលអះអាងថាខ្លួនជាអ្នកគាំទ្រក្រុម Man Utd បានសរសេរសំបុត្រផ្ញើរទៅលោក Klopp ដោយស្នើអ្នកចាត់ការរូបនេះដឹកនាំឲ្យ Liverpool ចាញ់។
«Liverpool ឈ្នះការប្រកួតច្រើនពេកហើយ។ ដូច្នេះជំនួបក្រោយៗរបស់ Liverpool សូមធ្វើឲ្យពួកគេចាញ់។ អ្នកគួរតែ ឲ្យក្រុមផ្សេងៗរកគ្រាប់ និងពិន្ទុបានខ្លះផង។ ខ្ញុំសង្ឃឹមថា ខ្ញុំអាចបញ្ចុះបញ្ចូលអ្នកមិនឲ្យឈ្នះលីគ ឬការប្រកួតណាទៀតឡើយ»។ នេះជាសំណេរដែលក្មេងប្រុស Daragh Curley សរសេរទៅកាន់លោក Klopp។
Since this letter was sent:
— Sam Huxley (@samhuxley) February 29, 2020
Atletico Madrid 1-0 Liverpool
Watford 3-0 Liverpool
Daragh has Jurgen Klopp on strings. pic.twitter.com/0LfKEalPeo
ក្រោយរឿងនេះកើតឡើង Liverpool ពិតជាប្រកួតចាញ់ជាបន្តបន្ទាប់ ពោលគឺបរាជ័យ ៣លើកជាប់គ្នា ក្នុងនោះចាញ់ Atletico Madrid ១-០ នៅក្របខណ្ឌអឺរ៉ុបជើងទី១ មុនចាញ់ Watford ដល់ទៅ ៣-០ នៃជំនួបក្នុងលីគសប្តាហ៍ទី២៨ ដែលជាការបញ្ចប់ភាពមិនចាញ់សោះក្នុងក្របខណ្ឌលីគកំពូលអង់គ្លេសរដូវកាលនេះ និងចាញ់ Chelsea នៅ FA Cup៕
Tag:
FA Cup
Liverpool
Jurgen Klopp
Daragh Curley
© រក្សាសិទ្ធិដោយ thmeythmey.com
