ជាតិ
សង្គមជាតិ
សម្តេច ស ខេង ៖មន្ត្រីទាំងអស់មិនត្រូវធ្វើខ្លួនជា«មន្ត្រីឱកាសនិយម» រហូតភ្លេចកំណើតឡើយ សម្តេច ស ខេង រដ្ឋមន្ត្រីក្រសួងមហាផ្ទៃ ក្នុងពិធីប្រកាសចូលកាន់មុខតំណែងអភិបាល អភិបាលរង នៃគណៈអភិបាលខេត្តកណ្ដាល នៅថ្ងៃទី៤មីនា ឆ្នាំ២០២០ នៅសាលាខេត្តកណ្ដាល។ រូបថត៖ ទំព័រហ្វេសប៊ុក សម្តេច ស ខេង៕
× ភ្នំពេញ៖ សម្តេច ស ខេង រដ្ឋមន្ត្រីក្រសួងមហាផ្ទៃ ស្នើដល់មន្ត្រីគ្រប់ថ្នាក់ត្រូវគិតប្រយោជន៍ជាតិជាធំ ហើយមិនត្រូវធ្វើខ្លួនឱ្យទៅជា «មន្ត្រីឱកាសនិយម»ឡើយ។ សម្ដេចថ្លែងបែបនេះ នៅក្នុងពិធីប្រកាសចូលកាន់មុខតំណែងអភិបាល អភិបាលរងនៃគណៈអភិបាលខេត្តកណ្ដាល នៅថ្ងៃទី៤មីនា ឆ្នាំ២០២០។
រដ្ឋមន្ត្រីមហាផ្ទៃ បានពន្យល់ថា មន្ត្រីឱកាសនិយមក៏តែងតែស្រែក ឬនិយាយមិនដាច់ពីមាត់អំពីឧត្តមគតិជាតិ និងពលរដ្ឋ ប៉ុន្តែដល់ពេលបានតំណែងឬតួនាទី មន្ត្រីទាំងនោះប្រើតួនាទីនិងអំណាច ដើម្បីទាញយកផលប្រយោជន៍ខ្លួនឯង។ បើតាមអនុប្រធានគណៈបក្សប្រជាជនរូបនេះ មន្ត្រីឱកាសនិយម គឺមិនដែលបំពេញតួនាទីរបស់ខ្លួនសម្រាប់ប្រយោជន៍ជាតិ និងពលរដ្ឋឡើយ។
«មន្ត្រីរបស់យើងថ្នាក់ណាក៏ដោយ ខ្ញុំស្នើត្រូវរៀបចំរប្រៀបម៉េចដើម្បីក្លាយខ្លួនជាមន្ត្រីដែលមានឧត្តមគតិជាតិ និងប្រជាពលរដ្ឋ ហើយ មិនត្រូវរៀបចំទុកដាក់ខ្លួនយើង ទៅជាមន្ត្រីឱកាសនិយម ទេ។ (រដ្ឋាភិបាល)ឱ្យធ្វើជាប្រធាននេះ ប្រធាននោះ គាត់អត់គិតធ្វើការងារហ្នឹងប៉ុន្មានទេ គិតតែដើររកស៊ី [អាហ្នឹងហើយ គេហៅថា មន្ត្រីឱកាសនិយម]។ អញយកអំណាច និងតួនាទីហ្នឹង ដើម្បីទៅរកប្រយោជន៍សម្រាប់ខ្លួន»។ នេះជាការបញ្ជាករបស់រដ្ឋមន្ត្រីក្រសួងមហាផ្ទៃ ។
សម្ដេច ស ខេង ស្នើមន្ត្រីខ្លួន គិតប្រយោជន៍ជាតិ ជាងផលចំណេញ។ អនុប្រធានគណបក្សប្រជាជនកម្ពុជារូបនេះ បានបន្ថែមថា៖«លើកកម្ពស់មន្ត្រីរាជការរបស់យើងលើកឧត្តមគតិប្រជាជន ហើយរក្សាខ្ជាប់នូវឧត្តមគតិនេះ ដោយមិនបណ្ដោយខ្លួនទៅជាជនឱកាសនិយម ដែលភ្លេចកំណើត។ អ្នកខ្លះភ្លេចកំណើតក៏មានដែរ (ធ្លាប់)មាន»។
សម្ដេច ស ខេង បានក្រើនរំឭកជាថ្មីឱ្យមន្ត្រីទាំងអស់ ចុះបម្រើប្រជាពលរដ្ឋដោយយកចិត្តទុកដាក់ និងផ្ដល់ផលប្រយោជន៍ពិតប្រាកដដល់ពួកគេ ដោយមិនត្រូវធ្វើឱ្យពលរដ្ឋអាក់អន់ចិត្ត ដល់ការដឹកនាំរបស់រដ្ឋាភិបាលនោះទេ។
បើតាមសម្ដេច ស ខេង ពេលវេលានេះ គឺជាពេលវេលាដែលរដ្ឋាភិបាល ក៏ដូចជាមន្ត្រីគ្រប់ជាន់ថ្នាក់ទាំងអស់ ត្រូវខំប្រឹងដោះស្រាយបញ្ហាប្រជាពលរដ្ឋឱ្យទាន់សភាពការណ៍ ស្របតាមការជឿទុកចិត្តរបស់ប្រជាពលរដ្ឋមកលើរដ្ឋាភិបាល៕
Tag:
មន្ត្រីឱកាសនិយម
ស ខេង
© រក្សាសិទ្ធិដោយ thmeythmey.com