ជាតិ
សង្គមជាតិ
សិល្បះ
សមាគមសិល្បៈ ត្រូវសុំអនុញ្ញាតពីក្រសួងវប្បធម៌សិន មុនយករបាំព្រះរាជទ្រព្យទៅសម្តែងនៅក្រៅប្រទេស សិល្បករខ្មែរដែលសម្តែងរបាំព្រះរាជទ្រព្យខ្មែរ នៅពីក្រោយគ្រូហុងស៊ុយ ជនជាតិម៉ាឡេស៊ី សញ្ជាតិសិង្ហបុរី ដែលជាការសម្តែងមួយដែលអាក់អោនតម្លៃសិល្បៈខ្មែរ
× ភ្នំពេញ៖ ក្រសួងវប្បធម៌ និងវិចិត្រសិល្បៈ ប្រាប់ឲ្យបណ្តាសមាគម អង្គការ និងក្រុមសិល្បករខ្មែរ ដែលចង់យករបាំព្រះរាជទ្រព្យទាំងក្នុងស្រុក និងក្រៅស្រុក ទៅសម្ដែងនៅប្រទេសនានា គឺត្រូវសុំការអនុញ្ញាតពីក្រសួងវប្បធម៌ និងវិចិត្រសិល្បៈសិន ដើម្បីកុំឲ្យការសម្តែងខុសពីទម្រង់សិល្បៈខ្មែរ ដែលនាំឲ្យអាប់ឱនតម្លៃវប្បធម៌។ ការប្រកាសរបស់ក្រសួងវប្បធម៌នេះ ធ្វើឡើងក្រោយពីសម្ដេចនាយករដ្ឋមន្ត្រី ហ៊ុន សែន ប្រតិកម្មនឹងជនជាតិសិង្ហបុរីម្នាក់ ដែលយករបាំព្រះរាជទ្រព្យទៅសម្ដែងនៅពីក្រោយខ្លួន កាលពីថ្ងៃទី៣ មីនា។
ក្រសួងវប្បធម៌ បានសង្កត់ធ្ងន់ថា មានអង្គការ សមាគមក្រុមសិល្បករ ឬបុគ្គលមួយចំនួន បានប្រើប្រាស់ទម្រង់របាំព្រះរាជទ្រព្យក្នុងរូបភាពមិនសមរម្យ នៅទីកន្លែងដែលមិនសមរម្យ ទាំងចេតនាក្តី ឬមិនចេតនាក្តី គឺសុទ្ធតែបង្ហាញឲ្យសិល្បៈខ្មែរអាប់ឱន ឬជាការបន្ទាបបន្ថោកដល់សិល្បៈខ្មែរ និងប៉ះពាល់ដល់កិត្តិយសនៃអ្នករបាំបុរាណខ្មែរ ដែលមានមនសិការ និងវិជ្ជាជីវៈច្បាស់លាស់ ។
លោក ព្រឿង ឈាង ទីប្រឹក្សាក្រសួងវប្បធម៌ និងវិចិត្រសិល្បៈបានបញ្ជាក់ថា របាំព្រះរាជទ្រព្យគឺជារបាំសក្ការៈ សម្រាប់ថ្វាយទេវៈ ដើម្បីបួងសួងសុំសេចក្តីសុខ សម្រាប់សម្តែងនៅក្នុងកម្មវិធីផ្សេងៗ ដែលត្រូវសម្តែងនៅទីតាំងដែលសមរម្យផងដែរ។
ទីប្រឹក្សាក្រសួងវប្បធម៌ បានរៀបរាប់ដូច្នេះថា៖«ការសម្តែងរបាំព្រះរាជទ្រព្យ ប្រៀបដូចយើងគោរពព្រះសង្ឃអ៊ីចឹងដែរ។ អ៊ីចឹងយើងដាក់ម៉េចឲ្យខ្ពស់ជាងអ្នកស្តាប់ រូចហើយកន្លែងក៏ត្រូវសមរម្យ មិនមែនតែនៅចង្ក្រានបាយអាចសូត្របានទេ។ អ៊ីចឹងរបាំហ្នឹងបើយើងមិនយល់ទេ គឺយើងឲ្យយល់ដូចជាការធ្វើបុណ្យព្រះសង្ឃ គោរពព្រះសង្ឃបែបម៉េច ឲ្យលោកមកសម្តែងធម៌យ៉ាងម៉េច គឺដូចគ្នានឹងការសម្តែងរបាំដែរ»។
ត្រង់ចំណុចនេះ ក្រសួងវប្បធម៌ក៏សម្តែងសេចក្តីរីករាយដែលក្រុមអ្នកសិល្បករខ្មែរ តែងតែយកទម្រង់របាំព្រះរាជទ្រព្យទៅសម្តែងនៅក្នុងកម្មវិធីផ្សេងៗ ជាពិសេសនៅក្រៅប្រទេស ដែលនេះបង្ហាញពីការថែរក្សា ផ្សព្វផ្សាយបំផុសបំផុល និងលើកតម្កើងដល់សិល្បៈខ្មែរពីបុរាណ។ ទន្ទឹមនឹងនេះ ក្រសួងក៏ស្នើឲ្យបណ្តាសមាគមសិល្បៈខ្មែរ អង្គការ ស្ថាប័ន ត្រូវតែជម្រាបជូនក្រសួងវប្បធម៌ជាមុនសិន ពីគោលបំណង និងទីកន្លែងនៃការសម្តែងរបាំព្រះរាជទ្រព្យខ្មែរ ដើម្បីជៀសវាងការសម្តែងខុសទម្រង់ដែលប៉ះពាល់ដល់សិល្បៈខ្មែរ។
កាលពីថ្ងៃទី៣ ខែមីនា ឆ្នាំ២០១៩ សម្តេច ហ៊ុន សែន នាយករដ្ឋមន្ត្រីកម្ពុជា បានសម្តែងការមិនពេញចិត្តចំពោះការសម្តែងរបាំព្រះរាជទ្រព្យនៅពីក្រោយ គ្រូហុងស៊ុយដែលជាជនជាតិម៉ាឡេស៊ី ចូលសញ្ជាតិសិង្ហបុរី។ នាយករដ្ឋមន្ត្រីចាត់ទុកទង្វើនេះថា ជាការអាប់អោនដល់តម្លៃសិល្បៈខ្មែរ ហើយសម្តេចបានប្រកាសមិនឲ្យបុរសជនជាតិម៉ាស៊ីនសញ្ជាតិសិង្ហបុរីចូលក្នុងទឹកដីកម្ពុជាឡើយ៕
Tag:
ក្រសួងវប្បធម៌
សិល្បករខ្មែរ
របាំព្រះរាជទ្រព្យ
សិល្បៈ
© រក្សាសិទ្ធិដោយ thmeythmey.com