COVID-19
អន្តរជាតិ
មហាសេដ្ឋីថៃ ប្រកាសបង្កើតរោងចក្រផលិតម៉ាស់ ដើម្បីបំពេញតម្រូវការនៅក្នុងប្រទេស
លោកមហាសេដ្ឋីថៃ Dhanin Chearavanont។ រូបភាព៖ CP E-News
×![]()
ដោយ: ធៀន ភារិន្ទ
លោក Dhanin Chearavanont មហាសេដ្ឋីថៃ និងជាប្រធានក្រុមហ៊ុន CP Group បានប្រកាសនៅថ្ងៃទី៥ ខែមីនាថា ក្រុមហ៊ុនលោក នឹងវិនិយោគលើរោងចក្រផលិតម៉ាស់ប្រមាណជា ៣,១៩លានដុល្លារ ឬ ១០០លានបាត ដើម្បីជួយកាត់បន្ថយបញ្ហាខ្វះម៉ាស់ប្រើប្រាស់នៅក្នុងប្រទេស។ ការប្រកាសរបស់មហាសេដ្ឋីរូបនេះ ធ្វើឡើងបន្ទាប់ពីថៃកំពុងប្រឈមបញ្ហាខ្វះម៉ាស់ការពារយ៉ាងខ្លាំង បន្ទាប់ពីរកឃើញ COVID-19 ជាបន្តបន្ទាប់នៅក្នុងប្រទេស។ 
ចាប់តាំងពីថៃបានរកឃើញករណីឆ្លង COVID-19 ជាបន្តបន្ទាប់ ម៉ាស់ គឺមានតម្រូវការម៉ាស់យ៉ាងខ្លាំង ហើយទីតាំងមួយចំនួន បានកែច្នៃម៉ាស់មួយទឹកយកមកប្រើប្រាស់ឡើងវិញ។ ពាក់ព័ន្ធនឹងបញ្ហានេះ ក្រុមហ៊ុន CP Group នឹងវិនិយោគលើរោងចក្រផលិតម៉ាស់ ក្នុងទំហំទឹកប្រាក់ជាង ៣លានដុល្លារ។
ជាក្រុមហ៊ុនចំណីអាហារ កសិកម្ម ប្រព័ន្ធទូរគមនាគមន៍ CP Group បែរជាងាកមកវិនិយោគលើម៉ាស់វិញ ដើម្បីបំពេញតម្រូវការនៅក្នុងប្រទេស និងផលប្រយោជន៍ជាតិ។ ពាក់ព័ន្ធនឹងបញ្ហានេះ ម៉ាស់មួយចំនួន ដែលផលិតបាន នឹងត្រូវក្រុមហ៊ុនCP បរិច្ចាគឲ្យបុគ្គលិកសុខាភិបាល និងប្រជាជនក្រីក្រ។ នេះបើតាមការចុះផ្សាយរបស់សារព័ត៌មាន The Nation។
បើតាមការកំណត់ រោងចក្រផលិតម៉ាស់ ដែលមានសមត្ថភាពផលិតម៉ាស់ ៣លានសន្លឹកក្នុងមួយខែនេះ ត្រូវការរយៈពេលត្រឹមតែ ៥សប្តាហ៍ប៉ុណ្ណោះ ដើម្បីសាងសង់។
ក្រៅពីក្រុមហ៊ុនឯកជន ខាងរដ្ឋាភិបាលថៃឯណោះវិញ ក៏បានសិក្សាពីគម្រោងផ្តល់ម៉ាស់ចំនួន ៣០លានសន្លឹក ដល់ប្រជាជនចំនួន ១០លាននាក់ផងដែរ។ ជាម៉ាស់ ដែលអាចប្រើប្រាស់បានច្រើនដង និងបោកទឹកបាន រដ្ឋាភិបាលបានស្នើរឲ្យមានសហការពីសហព័ន្ធរោងចក្ររបស់ថៃ ដើម្បីគាំទ្រគម្រោងមួយនេះ។ យ៉ាងណាក៏ដោយ គេមិនទាន់ដឹងច្បាស់ថា គម្រោងនេះអាចលេចចេញជារូបរាងពិតប្រាកដនោះទេ ព្រោះវាត្រូវកាត់កិច្ចប្រជុំគណៈរដ្ឋមន្ត្រីថៃនៅពេលខាងមុនជាមុនសិន។
សូមបញ្ជាក់ថា ក្នុងរយៈពេលជាង ២ខែមកនេះ ម៉ាស់ និងទឹកលាងដៃ គឺមានតម្រូវការយ៉ាងខ្លាំង។ ដោយសារតែតម្រូវការខ្ពស់ មានឈ្មួញមួយចំនួន បានស្តុកម៉ាស់ និងលក់ចេញក្នុងតម្លៃថ្លៃ។ ទាក់ទងនឹងបញ្ហានេះ រដ្ឋាភិបាលប្រទេសមួយចំនួន បានព្រមានឈ្មួញ ឬអ្នកស្តុកម៉ាស់ទាំងអស់ អាចប្រឈមមុខនៅចំពោះមុនច្បាប់ ប្រសិនបើហ៊ានបំពានក្នុងកាលៈទេសៈបែបនេះ៕
Tag:
ថៃ
COVID-19
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
