COVID-19
កីឡាអន្តរជាតិ
អន្តរជាតិ
Premier League ផ្អាកឲ្យកីឡាករចាប់ដៃគ្នាមុនពេលប្រកួត
× ក្របខណ្ឌ Premier League បានប្រកាសឲ្យផ្អាកការចាប់ដៃគ្នាមុនការប្រកួតរវាងក្រុមគូប្រជែង និងមន្ត្រីអាជ្ញាកណ្តាល ដើម្បីការពាររោគឆ្លង COVID-19 ដែលកំពុងរាលដាលខ្លាំងស្ទើជុំវិញពិភពលោក។ ការប្រកាសនេះ នឹងដាក់ឲ្យអនុវត្តន៍ចាប់ពីពេលនេះរហូតដល់មានការជូនដំណឹងជាថ្មីទៀត។
«ការចាប់ដៃគ្នាមុនការប្រកួតដើម្បីជាការគោរពក្នុងក្របខណ្ឌ Premier League រវាងកីឡាករ និងមន្ត្រីនឹងត្រូវហាម ចាប់ពីចុងសប្តាហ៍នេះរហូតដល់មានការជូនដំណឹងបន្ថែមដោយផ្អែកលើការណែនាំពីវេជ្ជសាស្ត្រ»។ នេះជាសេចក្តីប្រកាសលើវេបសាយផ្លូវការរបស់ Premier League។
ក្រុមអ្នកជំនាញបង្ហាញថា មេរោគ COVID-19 នេះ អាចចម្លងតាមរយៈតំណក់តូចៗចេញពីច្រមុះ និងមាត់ ព្រមទាំងអាចឆ្លងតាមដៃតាមរយៈការចាប់ដៃគ្នាផង។
វិធានការណ៍នេះធ្វើឡើងតែមួយថ្ងៃប៉ុណ្ណោះបន្ទាប់ពីរដ្ឋាភិបាលនៃចក្រភពអង់គ្លេសបានស្នើសុំលីគកីឡាបាល់ទាត់ទាំងអស់នៅអង់គ្លេសបង្កើនការទប់ស្កាត់ការឆ្លងនៃមេរោគដ៏កាចសាហាវដែលបានសម្លាប់មនុស្សជាង៣០០០នាក់ និងឆ្លងជិតមួយម៉ឺននាក់។
បើទោះជាគ្មានការចាប់ដៃក៏ដោយ តែក្រុមទាំងពីនឹងឈរតម្រង់ជួរដូចធម្មតា ដោយក្រុមម្ចាស់ផ្ទះនឹងដើរកាត់មុខក្រុមភ្ញៀវដែលមានគម្លាតឆ្ងាយពីគ្នា។
យ៉ាងណាក៏ដោយ ការប្រកួតកីឡាបាល់ទាត់គ្រប់កម្រិតលីគនៅអង់គ្លេសនៅមិនមានការប្រកាសឲ្យផ្អាក ឬពន្យារពេលដូចនៅក្របខណ្ឌក្នុងប្រទេសអ៊ីតាលី Serie A នោះទេ។
ចក្រភពអង់គ្លេស គិតត្រឹមថ្ងៃទី៦ ខែមីនានេះ មានតួលេខអ្នកឆ្លងសរុប១១៦នាក់ ស្លាប់ម្នាក់ និងជាសះស្បើយវិញចំនួន៨ករណី ខណៈអ៊ីតាលីជាប្រទេសមានចំនួនអ្នកឆ្លងច្រើនជាងគេនៅតំបន់អឺរ៉ុប ក្នុងនោះមាននាក់ឆ្លង៣៨៥៨ ស្លាប់១៤៨ និងជាវិញចំនួន៤១៤នាក់៕
Tag:
Premier League
COVID-19
© រក្សាសិទ្ធិដោយ thmeythmey.com