COVID-19
អន្តរជាតិ
ប្រមុខ WHO ចង់ឲ្យប្រមុខរដ្ឋាភិបាលដឹកនាំកិច្ចការប្រយុទ្ធ COVID-19 ជាជាងរដ្ឋមន្ត្រីសុខាភិបាល ប្រមុខ WHO ចង់ឲ្យប្រមុខរដ្ឋាភិបាលដឹកនាំកិច្ចការប្រយុទ្ធ COVID-19 ជាជាងរដ្ឋមន្រ្តីសុខាភិបាល។ រូបភាព Xinhua
× ខណៈដែលកូរ៉ូណាវីរុស បានរាលដាលឥតឈប់ឈរនោះ អង្គការសុខភាពពិភពលោក (WHO) បានបង្ហាញក្ដីបារម្ភលើការត្រៀមលក្ខណៈរបស់ជាច្រើន ដែលមិនបានបង្ហាញការប្ដេជ្ញាចិត្តផ្នែកនយោបាយខ្លាំងក្លាដើម្បីទប់ស្កាត់ការរាលដាលវីរុសនេះ។ ប្រមុខ WHO លោក Tedros Adhanom Ghebreyesus នៅថ្ងៃទី៥ ខែមីនា បានស្នើឲ្យមេដឹកនាំប្រទេសទាំងអស់ ដឹកនាំការងារប្រយុទ្ធប្រឆាំងវីរុស ជាជាងផ្ទេរសិទ្ធិឲ្យមន្ត្រីថ្នាក់ក្រោម។
ពីអាស៊ី អឺរ៉ុប មជ្ឈិមបូព៌ារហូតដល់អាមេរិក ជំងឺរលាកសួតបង្កដោយកូរ៉ូណាវីរុស (COVID-19) កំពុងបង្កការឈឺក្បាល និងក្ដីបារម្ភយ៉ាងខ្លាំង។ អ្វីដែលបារម្ភក្រោយការរាតត្បាតនេះ គឺការខ្វះខាតការយកចិត្តទុកដាក់ឲ្យបានគ្រប់គ្រាន់លើការងារប្រយុទ្ធប្រឆាំងជំងឺនេះ។ ករណីឆ្លងថ្មីៗត្រូវបានរាយការណ៍នៅតាមប្រទេសជាច្រើន បន្ថែមពីលើការឆ្លងនៅប្រទេសដែលមានករណីឆ្លងស្រាប់ហើយដូចជានៅកូរ៉េខាងត្បូង អ៊ីតាលី និងអ៊ីរ៉ង់ជាដើម។
អគ្គនាយក WHO លោក Tedros Adhanom Ghebreyesus ក៏បានព្រមានពីករណីប្រទេសជាច្រើនដែលមិនបង្ហាញពីការប្ដេជ្ញាចិត្តនយោបាយឲ្យបានខ្លាំងស្មើនឹងការគំរាមកំហែងវីរុសនេះ។ បើតាមទីភ្នាក់ងារព័ត៌មាន AFP លោក Tedros អះអាងថា ការផ្ទុះឡើងកូរ៉ូណាវីរុស មិនមែនជាសមយុទ្ធអ្វីឡើយ តែជាវីរុសដែលបង្កការគំរាមទាំងប្រទេសអ្នកមាន និងប្រទេសអ្នកក្រ។
ដើម្បីដោះស្រាយបញ្ហាជាសាកលនេះ លោក Tedros ក៏អំពាវនាវឲ្យប្រមុខរដ្ឋាភិបាលគ្រប់ប្រទេសដឹកនាំការងារឆ្លើយតប និងសម្របសម្រួលជាមួយគ្រប់វិស័យទាំងអស់ ជាជាងទុកឲ្យរដ្ឋមន្ត្រីការសុខាភិបាលធ្វើកិច្ចការនេះ។ បើតាមអគ្គនាយករូបនេះ អ្វីដែលត្រូវការចាំបាច់ គឺការត្រៀមខ្លួនឲ្យបានម៉ឺងម៉ាត់បំផុត។
នៅតាមប្រទេសជាច្រើន ការងារដឹកនាំប្រតិបត្តិការប្រឆាំង COVID-19 រដ្ឋមន្ត្រីសុខាភិបាល ជាអ្នកទទួលខុសត្រូវ ហើយគេក៏តែងឃើញរដ្ឋមន្ត្រីសុខាភិបាលចេញប្រកាសព័ត៌មានផ្សេងៗ។ ចំណែកប្រទេសខ្លះវិញ ក៏មានថ្នាក់ដឹកនាំគ្រាក់ៗដឹកនាំដែរតួយ៉ាង នៅអាមេរិក អនុប្រធានាធិបតី ម៉ៃ ផេន ជាអ្នកក្ដាប់ការងារនេះ, នាយករដ្ឋមន្ត្រីចិន លី ឃឹឈាំង ក៏ដឹកនាំក្រុមការងារដោះស្រាយ COVID-19 ខណៈនៅថៃ ឧបនាយករដ្ឋមន្ត្រី Anutin Charnvirakul តែងឃើញចេញមុខនិយាយពីវីរុសនេះ។
បន្ទាប់ពីផ្ទុះឡើងនៅខែធ្នូ ឆ្នាំ២០១៩ វីរុសដែលរាយការណ៍ពីដំបូងនៅទីក្រុងវូហាន ខេត្តហ៊ូប៉ី ពិតជាបង្កបញ្ហាច្រើនសម្រាប់ពិភពលោក។ ទីផ្សារសាកល បានឡើងចុះជាបន្តបន្ទាប់។ ខ្សែចង្វាក់ផលិតកម្ម ក៏រាំងស្ទះដោយសារការខ្វះខាតរូបធាតុបណ្ដាលមកពីការរឹតត្បិតការធ្វើដំណើរ ឬការដឹកជញ្ជូន។ ព្រឹត្តិការណ៍កីឡាធំៗ និងកម្មវិធីពិព័រណ៍ជាច្រើន ក៏ត្រូវបានលុបចោល ឬពន្យារពេល ស្របពេលដែលវិស័យទេសចរណ៍ក៏ធ្លាក់ចុះខ្លាំងក្លាដែរ៕
Tag:
WHO
COVID-19
Tedros Adhanom Ghebreyesus
© រក្សាសិទ្ធិដោយ thmeythmey.com