ជាតិ
TRC ស្នើក្រុមហ៊ុនទូរស័ព្ទពិចារណាដាក់លេខកូដ១២០០រួមគ្នា ឲ្យអតិថិជនអាចផ្តាច់គម្រោងដែលកាត់លុយមិនដឹងមុខ
× ភ្នំពេញ៖ និយ័តករទូរគមនាគមន៍កម្ពុជា (TRC) បានពិភាក្សាគ្នា និងស្នើឱ្យប្រតិបត្តិករក្រុមហ៊ុនទូរស័ព្ទ ប្រើលេខកូដ1200រួមគ្នា សម្រាប់ឱ្យអតិថិជនប្រើប្រាស់គម្រោង ឬភ្ជាប់សេវាកម្មផ្សេងៗ ដែលកំពុងភ្ជាប់ ឬមិនច្បាស់ថាខ្លួនភ្ជាប់សេវាកម្មណាមួយរបស់ក្រុមហ៊ុនទូរស័ព្ទ អាចផ្ដាច់ចេញបានទាំងអស់។
លោក អ៊ឹម វុត្ថា អ្នកនាំពាក្យនិយ័តករទូរគមនាគមន៍កម្ពុជា បានប្រាប់សារព័ត៌មានថ្មីៗតាមទូរស័ព្ទនៅថ្ងៃទី៦ មីនាថា ការស្នើឱ្យប្រតិបត្តិករក្រុមហ៊ុនទូរស័ព្ទ ដាក់លេខកូដប្រើរួមគ្នា គឺដើម្បីផ្ដល់ភាពងាយស្រួល ដល់អ្នកប្រើប្រាស់ទូរស័ព្ទគ្រប់ប្រព័ន្ធ ផ្ដាច់គម្រោងផ្សេងៗដែលតែងតែកាត់លុយ ដោយមិនដឹងមូលហេតុច្បាស់លាស់នោះ។ បើតាមអ្នកនាំពាក្យដដែល កន្លងមកអ្នកប្រើប្រាស់ទូរស័ព្ទតែងតែរអ៊ូថា ក្រុមហ៊ុនទូរស័ព្ទកាត់លុយ ដោយមិនដឹងមូលហេតុ ឬគម្រោងដែលមិនបានភ្ជាប់ ដូចការបទចម្រៀង និងសេវាកម្មធានារ៉ាបរងជាដើម។
លោក អ៊ឹម វត្ថា ពន្យល់ថា៖«ការកំណត់លេខកូ១២០០នេះ គឺមានបំណងឱ្យអ្នកប្រើប្រាស់ ដែលភ្ជាប់គម្រោងផ្សេងៗ អាចផ្ដាច់ ដោយគ្រាន់ធ្វើចុចលេខកូដនេះ។ ចំពោះដំណើរការគម្រោងនេះពេលណា មិនទាន់ដឹងច្បាស់នោះទេ រង់ចាំភាគីក្រុមហ៊ុនទូរស័ព្ទ និងក្រុមការងារពិភាក្សាគ្នាបន្ត»។
ទោះយ៉ាងណាក៏ដោយ អ្នកនាំពាក្យនិយ័តករទូរគមនាគមន៍កម្ពុជា មិនទាន់អាចបញ្ជាក់ថា គម្រោងដាក់លេខកូដ១២០០ ដើម្បីផ្តាច់គម្រោងនានារបស់ក្រុមហ៊ុនទូរសព្ទនេះ នឹងអនុវត្តនៅពេលណានោះទេ ព្រោះក្រុមការងារទើបតែពិភាក្សា និងស្នើឱ្យប្រតិបត្តិករក្រុមហ៊ុនទូរស័ព្ទពិចារណា។ និយ័តករទូរគមនាគមន៍កម្ពុជា ក៏រង់ចាំការឆ្លើយតបពីប្រតិបត្តិករទូរសព្ទ ជុំវិញដំណោះស្រាយ និងជម្រើសផ្សេងទៀតដែរ។ នេះបើតាម លោក អ៊ឹម វត្ថា៕
Tag:
TRC
កាត់លុយទូរស័ព្ទ
© រក្សាសិទ្ធិដោយ thmeythmey.com