ពីនេះ ពីនោះ
កាហ្វេថ្មីៗ៖ ចុះបើអ្នកដួលតាមផ្លូវ ជាញាតិសន្តានយើង?
× ពិភពលោកកំពុងតែខ្វល់ខ្វាយនឹងការឆ្លងរាលដាលនៃជំងឺ Covid-19។ មានការផ្តល់ដំបូន្មានប្រជាជនទូទៅអនុវត្តការអនាម័យខ្លួនប្រាណ ជាជាងការភ័យស្លន់ឆោឡោ។ សុធីរ និងសំណាង មិនអាចចៀសផុតពីការជជែកគ្នាអំពីបញ្ហាសាកលមួយនេះនៅតុកាហ្វេរបស់ពួកគេឡើយ។
សុធីរ៖ រឿងកាន់តែធំ។ រឿងកាន់តែធ្ងន់ធ្ងរ នៅត្រង់ថា ឥឡូវនេះ នៅពេលមានមនុស្សដួល មនុស្សនៅជុំវិញ នាំគ្នាសន្មតថា ជនរងគ្រោះនោះមានផ្ទុក Covid-19 ហើយថតផ្សាយតាមបណ្តាញសង្គមភ្លាមៗតែម្តង។
សំណាង៖ វាជារឿងដែលយើងត្រូវបារម្ភមែន។ អា Covid-19 នេះ វាកំពុងធ្វើឱ្យមនុស្សបោះបង់ចោលនូវករុណា ស្មារតីមនុស្សធម៌។ យើងមិនបន្ទោសទេ តែប្រហែលមកពីយើងភ័យខ្លាំងពេករហូតដល់ជនរងគ្រោះដែលអាចដួលដោយជំងឺអ្វីផ្សេង ខ្យល់ គាំងបេះដូង លើសឈាម ជាដើម ត្រូវបាត់បង់ជីវិត ដោយសារតែគ្មានអ្នកជួយសង្គ្រោះបឋម។
សុធីរ៖ មិនមែន មិនឱ្យភ័យទេ។ អញក៏ភ័យដែរ ប៉ុន្តែ គិតក្នុងចិត្តមួយថា ត្រូវស្វែករកជំនួយបឋមឱ្យលឿន ដូចជារថយន្តសង្គ្រោះបន្ទាន់ តែមិនមែនឃើញមនុស្សដួលហើយ នាំគ្នាពាក់ម៉ាស ហើយរត់ចេញនោះទេ? ស្រមៃថា ជនរងគ្រោះនោះជាយើង ជាបងប្អូនយើង ញាតិសន្ដានយើង ហើយយើងដួលសន្លប់ដោយជំងឺអ្វីផ្សេងដូចអ្ហែងនិយាយមិញ ហើយគេទុកចោល យើងមិនស្លាប់ទៅហើយទេ?
សំណាង៖ បញ្ហាទី២ គឺក្រុមមនុស្សដែលឃើញហេតុការណ៍ហ្នឹង ក៏សន្មត ហើយថតផ្សាយតាមហ្វេសប៊ុកភ្លាមៗថា Covid-19។ អ្នកផ្សាយហ្នឹងក៏ដឹងខ្លួនឯងថា ខ្លួនឯងគិតដោយខ្លួនឯង សន្និដ្ឋានខ្លួនឯងដែរ។ មិនពិចារណាបន្តិចសិនទេ។ ដូចអ្ហែងឆ្ងល់អ៊ីចឹង ចុះបើអ្នកដួលនោះ ជាញាតិសន្តានរបស់ពួកគាត់ ហើយត្រូវបានគេថតបង្ហោះផ្សាយទាំងខុសអ៊ីចឹង តើពួកគាត់យល់យ៉ាងម៉េចដែរ?
© រក្សាសិទ្ធិដោយ thmeythmey.com