COVID-19
អន្តរជាតិ
×![]()
ដោយ: គី ចំណា
ជាមួយនឹងបញ្ហាដែលកើតមានឡើងនៅជុំវិញជំងឺ COVID-19 ការដាក់អាល់កុលលាងដៃនៅតាមខ្លួនជាប្រចាំ មិនថានៅតាមសាលារៀន កន្លែងធ្វើការ ភោជនីយដ្ឋាន ឬទីកន្លែងសាធារណៈ គឺជារឿងសំខាន់ក្នុងការរក្សាអនាម័យ។ តែនៅតាមតំបន់មួយចំនួន ដោយសារតែតម្រូវការអាល់កុលលាងដៃមានកម្រិតខ្ពស់ ការនាំចូលនូវផលិតផលមួយនេះអាចមានលក្ខណៈខ្វះខាតជាងមុន ឬតម្លៃខ្ពស់ជាងមុនផងដែរ។ ក្នុងករណីនេះ តើអ្នកអាចច្នៃផលិតអាល់កុលលាងដៃដោយខ្លួនឯងបានដោយរបៀបណា? 
តាមការប្រកាសរបស់មជ្ឈមណ្ឌលគ្រប់គ្រងជំងឺអាមេរិក (Centers for Disease Control ឬ CDC) អាល់កុលលាងដៃទាមទារឲ្យមានសារធាតុអាល់កុលយ៉ាងតិច៦០ភាគរយដើម្បីប្រើប្រាស់ឲ្យមានប្រសិទ្ធភាពបាន។ គេហទំព័រ livescience.com បានបន្ថែមដែរថា អាល់កុលលាងដៃដែលអ្នកអាចផលិតខ្លួនឯងនេះពិតជាមានប្រសិទ្ធភាពក្នុងការសម្អាតភាពកខ្វក់ ប្រសិនបើអ្នកអនុវត្តតាមគោលការណ៍ច្បាស់លាស់។
រូបភាពគំរូអំពីផលិតផល Emollient ដែលជាក្រុមផលិតផលលាបផ្តល់សំណើមដល់ស្បែក
គួរឲ្យបញ្ជាក់ផងដែរថា សកម្មភាពអនាម័យដែលល្អ និងងាយបំផុត គឺការលាងដៃជាញឹកញាប់ជាមួយនឹងសាប៊ូ និងទឹកយ៉ាងហោចណាស់ឲ្យបានរយៈពេលត្រឹម២០វិនាទី។ ប្រសិនបើទឹក និងសាប៊ូមិនមានវត្តមាននៅជិតអ្នកនោះទេ នោះអាល់កុលលាងដៃក៏នៅតែជាជម្រើសមួយសមរម្យផងដែរ។
មជ្ឈមណ្ឌលគ្រប់គ្រងជំងឺអាមេរិក (CDC) បានបង្ហាញថា ជារួមសារធាតុអាល់កុល អ៊ីសូប្រូពីល (Isopropyl) ចំនួន១៦១មីលីលីត្រ លាយជាមួយនឹងពពួកផលិតផល Emollient ដែលជាក្រុមផលិតផលលាបផ្តល់សំណើមដល់ស្បែកក្នុងបរិមាណ៧៩មីលីលីត្រ អាចជួយដោះស្រាយបញ្ហាជូនអ្នកបាន។
ក្នុងន័យដដែល បើអ្នកលាយ២/៣នៃសារធាតុអាល់កុល Isopropyl (កម្រិត៩១%) ជាមួយនឹង១/៣នៃសារធាតុផ្តល់សំណើមដល់ស្បែក នោះអ្នកនឹងទទួលបានសូលុយស្យុងសម្អាតដៃដែលមានកម្រិតអាល់កុលប្រមាណ៦០%។ បើអ្នកចង់ទទួលបានកម្រិតឲ្យខ្លាំងជាងនេះទៅទៀត អ្នកអាចប្រើប្រាស់អាល់កុល Isopropyl (កម្រិត៩១%) ដដែលតែក្នុងបរិមាណ៣/៤វិញ ជាមួយនឹង១/៤នៃសារធាតុផ្តល់សំណើមស្បែក ក្នុងការទទួលបានសូលុយស្យុងដែលមានកម្រិតអាល់កុល៦៨%។
អាល់កុល អ៊ីសូប្រូពីល (Isopropyl) កម្រិត ៩១ភាគរយ ដាក់លក់វេបសាយ Walmart អាមេរិក
បើទោះបីជាយ៉ាងនេះមែនក្តី វាក៏នៅតែជាទម្លាប់មួយល្អក្នុងការលាងសម្អាតដៃរបស់អ្នកនៅពេលដែលមានទឹក និងសាប៊ូ។ នេះគឺដោយសារតែអាល់កុលលាងសម្អាតដៃមិនអាចកម្ចាត់មេរោគមួយចំនួនបាននោះទេ។ ម្យ៉ាងវិញទៀត ប្រសិទ្ធភាពរបស់អាល់កុលលាងសម្អាតដៃក៏នឹងថយចុះនៅពេលដែលដៃរបស់អ្នកមានជាប់ដី ឬសារធាតុខ្លាញ់ច្រើន៕
សូមទស្សនាវីដេអូខាងក្រោម អំពីរបៀបធ្វើអាល់កុលលាងដៃ៖
© រក្សាសិទ្ធិដោយ thmeythmey.com
