COVID-19៖ រដ្ឋាភិបាល ត្រៀមថវិកា៨០០លាន ទៅ២ពាន់លានដុល្លារ ដើម្បីដោះស្រាយសេដ្ឋកិច្ច រយៈពេល១ឆ្នាំ

COVID-19

ជាតិ

COVID-19៖ រដ្ឋាភិបាល ត្រៀមថវិកា៨០០លាន ទៅ២ពាន់លានដុល្លារ ដើម្បីដោះស្រាយសេដ្ឋកិច្ច រយៈពេល១ឆ្នាំ

10, Mar 2020 , 10:45 am

រូបភាព

ដោយ: ធឿន បញ្ញាឬទិ្ធ

ភ្នំពេញ៖ ពីពិធីចែកសញ្ញាបត្រជូននិស្សិតនៃវិទ្យាស្ថានវ៉ាន់ដា នាព្រឹកថ្ងៃទី១០ ខែមីនា ឆ្នាំ២០២០ សម្ដេច ហ៊ុន សែន បានប្រកាសថា រដ្ឋាភិបាល បានត្រៀមថវិកា៨០០លានដុល្លារ ទៅ២ពាន់លានដុល្លារ សម្រាប់ដោះស្រាយបញ្ហាសេដ្ឋកិច្ចជាតិ បើសិនជាវីរុសកូរ៉ូណាប្រភេទថ្មី (COVID-19) អូសបន្លាយពេលយូរទៀត។ ថវិកានេះ អាចដោះស្រាយសេដ្ឋកិច្ចពីរយៈពេល៦ខែទៅ១ឆ្នាំ។

នាយករដ្ឋមន្ត្រី ហ៊ុន សែន បានសង្កត់ធ្ងន់ថា ថវិកាទាំងនេះ គឺរដ្ឋាភិបាលបានមកពីការកាត់បន្ថយការចំណាយ៥០ភាគរយ ពីក្រសួង និងស្ថាប័នរដ្ឋ លើកលែងតែក្រសួង៣ ដែលកាត់តែ២៥ភាគរយ។ សម្ដេច ហ៊ុន សែន បានអះអាងថា ការកាត់បន្ថយការចំណាយតាមក្រសួងនេះ វាមិនមានផលប៉ះពាល់អ្វីដល់អង្គភាពទាំងនោះទេ ។

សូមស្ដាប់សំឡេង៖

ក្រៅពីថវិកាត្រៀមដោះស្រាយបញ្ហាសេដ្ឋកិច្ចនេះ រដ្ឋាភិបាល ក៏បានត្រៀមថវិកា៣០លានដុល្លារ សម្រាប់ក្រសួងសុខាភិបាល ដែលជាថវិកាបន្ថែមលើគម្រោងចំណាយប្រចាំឆ្នាំរបស់ក្រសួងផងដែរ។ បើតាមសម្ដេច ហ៊ុន សែន រដ្ឋាភិបាលក៏បានត្រៀមការលើកលែងពន្ធដល់រោងចក្រទាំងណា ដែលរងផលប៉ះពាល់ មកពីការព្យួរប្រព័ន្ធអនុគ្រោះពន្ធ២០ភាគរយពីគណៈកម្មការអឺរ៉ុប។

កាលពីថ្ងៃទី៩ មីនា ចិន បញ្ជូននាវាដឹកវត្ថុធាតុដើម ៦០កុងតឺន័រ ចូលមកដល់កម្ពុជា តាមរយៈការសម្របសម្រួលរវាងរដ្ឋាភិបាលកម្ពុជា-ចិន ក្នុងនាមជាដៃគូយុទ្ធសាស្ត្រគ្រប់ជ្រុងជ្រោយ ។ សម្ដេច ហ៊ុន សែន បានសង្កត់ធ្ងន់ថា ការបញ្ជូនវត្ថុធាតុដើមមកកម្ពុជា គឺជាការជួយទ្រទ្រង់ដល់ម្ចាស់រោងចក្រ និងសម្រួលដល់ជីវភាពរបស់កម្មករផងចក្រនៅកម្ពុជា។

កម្មកររោងចក្រ ទទួលបានបៀវត្ស៦០ភាគរយ ក្នុងអំឡុងពេលព្យួរការងារ។ ក្នុងនោះថវិកា៤០ភាគរយ គឺជាការចំណាយរបស់ម្ចាស់រោងចក្រ និង២០ភាគរយ ពីរដ្ឋាភិបាល។ នេះជាការបញ្ជាក់របស់សម្ដេច ហ៊ុន សែន ដែលហាមថៅកែមិនឱ្យលុបចោលកិច្ចសន្យាការងារជាមួយកម្មករ នាអំឡុងពេលបិទទ្វារបណ្ដោះអាសន្ននោះទេ៕