COVID-19
ជាតិ
ក្រៅពីឡាវ និងមីយ៉ាន់ម៉ា ប្រទេសអាស៊ានមាន COVID-19 ជាង៥៤០ករណី និងស្លាប់២ រដ្ឋមន្ត្រីក្រសួងសុខាភិបាលកម្ពុជា លោក ម៉ម ប៊ុនហេង ដឹកនាំសន្និសីទសារព័ត៌មានកាលពីថ្ងៃទី១០ ខែមីនា ដោយប្រកាសពីការរកឃើញករណីឆ្លងទី៣នៅកម្ពុជា។ រូបថត ញឹក ស្រីល័ក្ខ
× គិតត្រឹមថ្ងៃទី១០ ខែមីនា សមាជិកអាស៊ានចំនួន ៨ប្រទេស សុទ្ធតែបានរកឃើញCOVID-19 នៅក្នុងប្រទេស ខណៈមានតែពីរប្រទេសដូចជាឡាវ និងមីយ៉ាន់ម៉ាតែប៉ុណ្ណោះ ដែលមិនទាន់រកឃើញមានករណីកូរ៉ូណាវីរុសនៅក្នុងប្រទេស។
ក្នុងចំណោមប្រទេសទាំង៨ របស់បណ្តាសមាជិកអាស៊ានដែលរកឃើញកូរ៉ូណាវីរុស សិង្ហបុរី គឺជាប្រទេសមានCOVID-19 ច្រើនជាងគេនៅក្នុងតំបន់។ បន្ទាប់ពីរកឃើញអ្នកឆ្លងជាបន្តបន្ទាប់ តួលេខ COVID-19 នៅសិង្ហបុរី បានកើនដល់ ១៦៦ករណី ខណះអ្នកជាសះស្បើយចំនួន ៩៣ករណី។ តាមរយៈតួលេខរកឃើញករណីឆ្លងចុងក្រោយ សិង្ហបុរីរកឃើញ ៦ករណីនាថ្ងៃទី១០ ខែមីនា។
ប្រទេសបន្ទាប់ គឺម៉ាឡេស៊ី ដែលមានចំនួនករណី COVID-19 សរុបចំនួន ១២៩ករណី។ ប៉ុន្តែក្នុងចំនួនតួលេខ ១២៩ករណីនេះ ម៉ាឡេស៊ីបានព្យាបាលអ្នកជំងឺឲ្យជាសះស្បើយរហូតដល់ ៨៧ករណីឯណោះ។ចំណែកប្រទេសថៃវិញ ក្រសួងសុខាភិបាល បានរកឃើញករណីសរុបចំនួន ៥៣ករណី និងស្លាប់មួយករណី និងមានអ្នកជាសះស្បើយចំនួន ៣៣ករណី។
ជាប្រទេសឈរនៅលំដាប់ទី៤ ដែលមានផ្ទុកCOVID-19 ច្រើនជាងគេនៅក្នុងតំបន់អាស៊ាន វៀតណាមនៅតែបន្តរកឃើញ COVID-19 ។ រហូតមកដល់ពេលនេះ វៀតណាមរកឃើញCOVID-19 សរុបចំនួន ៣៤ករណី និងអ្នកជាសះស្បើយ ១៦នាក់។ បន្ទាប់ពីវៀតណាម ហ្វីលីពីន ក៏បានរកឃើញCOVID-19 ជាបន្តបន្ទាប់ផងដែរ ក្នុងមួយរយៈចុងក្រោយនេះ។ ការណ៍នេះ បានធ្វើឲ្យហ្វីលីពីនមានCOVID-19 សរុប៣៣ករណី និងស្លាប់ ១ករណីផងដែរ ខណៈពេលអ្នកជាសះស្បើយ មាន២ករណី។
ក្រៅពីប្រទេសខាងលើ ឥណ្ឌូណេស៊ី ដែលទើបតែរកឃើញពីរករណីដំបូងនៅក្នុងប្រទេស ពេលនេះតួលេខបានកើនឡើងយ៉ាងគំហុកនៅក្នុងប្រទេស។ បើតាមតួលេខចុងក្រោយនេះ ឥណ្ឌូណេស៊ីមានករណីCOVID-19 សរុបចំនួន ២៧ករណី និងអ្នកជាសះស្បើយ ២ករណី។
ជាប្រទេសនៅក្នុងតំបន់ដែលរកឃើញCOVID-19 ចុងក្រោយគេ ព្រុយណេបានរកឃើញ COVID-19 ដល់៦ករណី។ ក្នុងចំណោមបណ្តាសមាជិកអាស៊ានទាំងអស់ កម្ពុជាមានតួលេខតិចជាងគេ ពោលគឺមានករណីសរុបត្រឹមតែ ៣ករណីប៉ុណ្ណោះ។ ក្នុង ៣ករណីនេះ កម្ពុជាបានព្យាបាលអ្នកជំងឺឲ្យជាសះស្បើយបានមួយករណីហើយ។
សូមបញ្ជាក់ថា ក្នុងចំណោមបណ្តាប្រទេសអាស៊ានទាំង ១០ប្រទេស នៅតែមីយ៉ាន់ម៉ា និងឡាវ តែប៉ុណ្ណោះ ដែលមិនទាន់រកឃើញCOVID-19 ៕
© រក្សាសិទ្ធិដោយ thmeythmey.com