សហព័ន្ធកីឡាបាល់ទាត់កម្ពុជា(FFC)នៅថ្ងៃទី១០ ខែមីនា ឆ្នាំ២០២០ បានចេញសេចក្តីជូនដំណឹងមួយស្តីពីការលើកពេលប្រកួតវគ្គជម្រុះ FIFA World Cup 2022 របស់ក្រុមជម្រើសជាតិកម្ពុជា ដែលគ្រោងធ្វើឡើងនៅចុងខែមីនា នេះ។ ការប្រកួតទាំងពីរ ដែលត្រូវលើកពេលរួមមានជំនួបរវាងកម្ពុជាជាមួយក្រុមជម្រើសជាតិបារ៉ែននៅថ្ងៃទី២៦ ខែមីនា និងជំនួបជាមួយអ៊ីរ៉ង់នៅថ្ងៃទី៣១ ខែមីនា ឆ្នាំ២០២០។ 

 

មូលហេតុនៃការលើកពេលប្រកួតនេះ គឺដោយសារ AFC បារម្ភពីការរីករាលដាលនៃមេរោគកូរ៉ូណាប្រភេទថ្មី COVID-19 ដែលពិភពលោកកំពុងមានការព្រួយបារម្ភ ជាពិសេសបារម្ភលើសុវត្ថិភាពរបស់កីឡាករ និងអ្នកគាំទ្រ។ ការធ្វើបែបនេះ ក៏ជាកត្តារួមចំណែកក្នុងការប្រយុទ្ធប្រឆាំងការរីករាលដាលនៃមេរោគប្រភេទថ្មីនេះផងដែរ។ 

 

AFC មិនទាន់កំណត់ពេលវេលាជាក់លាក់ពីការបង្ហាញកាលបរិច្ឆេទថ្មីនៅឡើយទេ។ គ្រាន់តែអះអាងថា នឹងបង្ហាញក្នុងពេលឆាប់ខាងមុននេះ ពោលគឺក្រោយការរីករាលដាលនៃមេរោគកូរ៉ូណាប្រភេទថ្មីនេះមានភាពធូរស្បើយ៕