COVID-19
ជាតិ
ចម្ងល់ពី COVID-19 សូមទូរសព្ទទៅ១១៥ និង១២៩៩សម្រាប់អ្នកភ្នំពេញ! រូបពីរដ្ឋបាលរាជធានីភ្នំពេញ
× ក្រសួងសុខាភិបាល បានបង្កើនមនុស្សពី១០ទៅ២៦នាក់ដើម្បីរង់ចាំផ្តល់សេវាព័ត៌មានទាក់ទងនឹង COVID-19 រីឯរដ្ឋបាលរាជធានីភ្នំពេញ បានចូលរួមចំណែកបន្ថែមតាមរយៈការបង្កើតប្រព័ន្ធ Hotline លេខ ១២៩៩ ក្នុងទិសដៅដូចគ្នា ជាពិសេសសម្រាប់អ្នកភ្នំពេញ។ តែអ្វីដែលជាបញ្ហានោះ នាយកដ្ឋានប្រយុទ្ធនឹងជំងឺឆ្លង ក្រសួងសុខាភិបាល បានបញ្ជាក់ឲ្យដឹងថា ៣០ភាគរយនៃការហៅចូលទៅកាន់១១៥ ជារឿងមិនបានការ និងដើម្បីលេងសើច។
លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បានបញ្ជាក់ឲ្យដឹងថា ក្រសួងពង្រីកប្រព័ន្ធសេវា១១៥ ដើម្បីផ្តល់ព័ត៌មាន និងឆ្លើយឆ្លងរាល់ការសង្ស័យទាំងឡាយណាពាក់ព័ន្ធនឹង COVID-19។
«វិធានការដែលឯកឧត្តមរដ្ឋមន្រី្តដាក់បន្ថែមទៀតនេះ គឺយើងបានពង្រីកចំនួនអ្នកឆ្លើយតបសេវាប្រព័ន្ធ១១៥ ដែលពីមុនមានគ្នា១០នាក់ ឥឡូវយើងដាក់រហូតដល់២៦ហើយ»។ នេះបើតាមការលើកឡើងរបស់ លោកស្រី ឱ វណ្ណឌីន នៅក្នុងសន្និសីទសារព័ត៌មានស្ដីពី COVID-19 កាលពីថ្ងៃទី១០ មីនា ឆ្នាំ២០២០។
ជាមួយគ្នាដែរ រដ្ឋបាលរាជធានីភ្នំពេញបានបង្កើតប្រព័ន្ធ Hotline លេខ ១២៩៩ ដើម្បីឱ្យពលរដ្ឋទាក់ទងសួរ រាល់ចម្ងល់និងព័ត៌មានផ្សេងៗ ហើយរដ្ឋបាលរាជធានីភ្នំពេញបញ្ជូនទៅក្រសួងសុខាភិបាលដើម្បីដោះស្រាយ និងចាត់វិធានការ។
«សូមជូនដំណឹងដល់សាធារណជន និងបងប្អូនប្រជាពលរដ្ឋទាំងអស់ មេត្តាជ្រាបថា ប្រសិនបើមានចម្ងល់ ឬបញ្ហាអ្វីទាក់ទងនឹងវីរុសកូវីដ ១៩ (COVID-19) នោះ សូមបងប្អូនទូរស័ព្ទមក Hotline លេខ ១២៩៩ ដើម្បីឱ្យរដ្ឋបាលរាជធានីភ្នំពេញធ្វើការបញ្ជូនព័ត៌មានទាំងអស់ទៅមន្ទីរសុខាភិបាលរាជធានីភ្នំពេញ និងក្រសួងសុខាភិបាល មានដំណោះស្រាយ ឬចំណាត់ការបន្ត។» នេះបើតាមការសរសេរលើទំព័រហ្វេសប៊ុករបស់រដ្ឋបាលរាជធានីភ្នំពេញ ថ្ងៃទី១០ មីនា ឆ្នាំ២០២០។
តាមរយៈទំព័រហ្វេសប៊ុករបស់ខ្លួន នាយកដ្ឋានប្រយុទ្ធជំងឺឆ្លងរបស់ក្រសួងសុខាភិបាល បានបញ្ជាក់ថា ការទូរសព្ទចូលលេខ ១១៥ មាន៧០ភាគរយសួរព័ត៌មានពី COVID-19 ព្រមទាំងរាយការណ៍ពីស្ថានភាពសុខភាព តែ៣០ភាគរយទៀតជាការហៅចូលមិនបានការ។
ករណីហៅចូលមិនបានការរួមមាន ការប្រើកុមារតូចៗឲ្យនិយាយជំនួស ក្រុមក្មេងដដែលៗទូរសព្ទចូលគ្រប់គ្នានៃគ្រូពេទ្យជំនាញ ទូរសព្ទចូលមិននិយាយបើកចោល ទូរសព្ទចូលចាក់ចម្រៀងឲ្យស្តាប់ ការប្រើសំដីអសុរោះ អ្នកស្រវឹងទូរសព្ទចូលនិយាយស្តាប់មិនយល់ អ្នកទូរសព្ទតេស្តលេង ជាដើម។
«យើងខ្ញុំសូមសំណូមពរដល់សាធារណជនមេត្តាប្រើប្រាស់លេខ១១៥ នេះសម្រាប់បម្រើប្រជាពលរដ្ឋដែលអ្នកចង់សួរចង់ដឹងពីជំងឺ COVID-19 ព្រោះពេលបងប្អូនរំខាន នាំឲ្យអ្នកដទៃទៀតមិនអាចទូរសព្ទចូលបាន ដែលចង់ជួបគ្រូពេទ្យជំនាញយើងខ្ញុំ សូមបងប្អូនប្រើលេខ ១១៥ នេះឲ្យមានតំលៃបំផុត»។ នេះជាការស្នើសុំរបស់នាយកដ្ឋានប្រយុទ្ធនឹងជំងឺឆ្លង៕
© រក្សាសិទ្ធិដោយ thmeythmey.com