Rugani ខ្សែការពារ Juventus និង Hubers របស់ Hannover ឆ្លង COVID-19

COVID-19

កីឡាអន្តរជាតិ

អន្តរជាតិ

Rugani ខ្សែការពារ Juventus និង Hubers របស់ Hannover ឆ្លង COVID-19

12, Mar 2020 , 11:24 am

រូបភាព

ដោយ: ទេព ពិទូរ្យ

Juventus ប្រកាសថា ខ្សែការពាររបស់ខ្លួនកីឡាករ Daniele Rugani ពិនិត្យរកឃើញមានឆ្លងកូរ៉ូណាវីរុស (COVID-19)។ ចំណែក Timo Hubers ខ្សែការពារក្រុម Hannover ក៏ធ្វើតេស្ត ហើយលទ្ធផលបង្ហាញថា មានជំងឺរលាកសួតបង្កឡើងដោយកូរ៉ូណាវីរុសនេះដែរ។

Rugani សញ្ជាតិអ៊ីតាលី វ័យ២៥ឆ្នាំ កំពុងតែដាក់ឲ្យនៅដាច់ដោយឡែក។ មន្ត្រីនៃក្របខណ្ឌ Serie A អះអាងថា ខ្សែការពារក្រុមសេះបង្កង់រូបនេះមិនអនុញ្ញាតឲ្យជួបទាក់ទងអ្នកណាផ្សេងឡើយ ដោយត្រូវធ្វើតាមនីតិវីធីដាក់ចត្តាឡីស័ក។

មកទល់បច្ចុប្បន្ន រាល់ព្រឹត្តិការណ៍កីឡាទាំងអស់ក្នុងប្រទេសអ៊ីតាលីបានផ្អាករហូតដល់ថ្ងៃទី ៣ ខែមេសា និងអ៊ីតាលី ក៏ស្ថិតក្រោមការហាមប្រាមធ្វើដំណើរក្នុងប្រទេសផង ដោយសារតែការផ្ទុះឡើងនៃវីរុសដ៏កាចសាហាវនេះរាលដាលដល់កម្រិតធ្ងន់ធ្ងរ។

Rugani បង្ហាញខ្លួនចំនួន ៧ ប្រកួតប៉ុណ្ណោះ សម្រាប់ក្រុម Juventus នៅរដូវកាលនេះ ហើយរូបគេក៏បានបង្ហាញខ្លួនពេលក្រុមយកឈ្នះ Inter Milan ២-០ កាលពីថ្ងៃទី៨ ខែមីនា ក្នុងការប្រកួតបិទទ្វារនៃក្រខណ្ឌលីគកំពូលអ៊ីតាលីផងដែរ។

សមាជិកក្រុម Juventus ទាំងអស់ក៏កំពុងមានការព្រួយបារម្ភពីការឆ្លងនេះដែរ ដ្បិតពួកគេនៅកៀកនឹង Rugani បំផុត។

ដោយឡែក ដោយសារការឆ្លងលើ Rugani ក៏បានធ្វើឲ្យជំនួប រវាង Inter Milan ជាមួយ Getafe ក្នុងពានរង្វាន់ UEFA Europa League ត្រូវពន្យារពេលប្រកួតផងដែរ។

រហូតមកទល់ពេលនេះ មិនមែនមានតែកីឡាករបាល់ទាត់ Rugani ទេដែលឆ្លង COVID-19។ ខ្សែការពារ Timo Hubers ដែលលេងឲ្យក្រុម Hannover ក្រុមនៃលីគលំដាប់ទី២អាល្លឺម៉ង់ (Bundesliga 2) ក៏ពិនិត្យឃើញវិជ្ជមានមេរោគនេះដែរ។

ខ្សែការពារសញ្ជាតិអាល្លឺម៉ង់ វ័យ២៣ឆ្នាំរូបនេះ ត្រូវបានគេជឿជាក់ថា ឆ្លងជំងឺនេះអំឡុងពេលរូបគេទៅចូលរួមកម្មវិធីមួយក្នុងទីក្រុង Hildesheim ប្រទេសអាល្លឺម៉ង់ កាលពីថ្ងៃទី៨ មីនា។ យ៉ាងណាក៏ដោយ ក្លិបសង្ឃឹមថា Hubers នឹងមិនចម្លងទៅកាន់មិត្តរួមក្រុមឡើង ដ្បិតរូបគេមិនបានចូលជួបជុំក្រុមតាំងពីសប្តាហ៍មុន។

គិតត្រឹមថ្ងៃទី១២ ខែមីនានេះ អ៊ីតាលីមានចំនួនអ្នឆ្លង COVID-19 ច្រើនជាងគេបើធៀបជាមួយប្រទេសនៅអ៊ឺរ៉ុប និងច្រើនជាងគេបន្ទាប់ពីចិន រហូតដល់១២៤៦២ករណី ស្លាប់មាន ៨២៧នាក់ និងសះស្បើយចំនួន១០៤៥នាក់។ អាល្លឺម៉ង់មានចំនួនអ្នកឆ្លង១៩៦៦ ស្លាប់៣នាក់ និងសះស្បើយ២៥នាក់៕