COVID-19
អន្តរជាតិ
ករណីឆ្លង COVID-19 ថ្មីនៅហ៊ូប៉ីធ្លាក់មាន៨ករណី ឯអ្នកសះស្បើយទូទាំងចិនមានជិត៨០ភាគរយ បុគ្គលិកសុខាភិបាលចិនបង្ហាញក្ដីរីករាយនៅឯមន្ទីរពេទ្យមួយក្នុងទីក្រុងវូហាន។ រូបភាព Xinhua
× ករណីឆ្លងជំងឺផ្លូវដង្ហើមបង្កដោយកូរ៉ូណាវីរុសប្រភេទថ្មី (COVID-19) នៅខេត្តហ៊ូប៉ី បានធ្លាក់ចុះមកតួលេខមួយខ្ទង់ប៉ុណ្ណោះ គឺ៨ករណីនៅថ្ងៃទី១១ ខែមីនា។ នេះបើតាមការប្រកាសរបស់គណៈកម្មការសុខាភិបាលចិននៅថ្ងៃទី១២ ខែមីនា។ នេះជាលើកដំបូងចាប់តាំងពីការផ្ទុះឡើងវីរុសប្រភេទថ្មី ដែលករណីឆ្លងថ្មីមានចំនួនតិចតួចបែបនេះ។ តួលេខឆ្លងថ្មីនៅទូទាំងប្រទេស ក៏បន្តធ្លាក់ចុះ ខណៈដែលចំនួនអ្នកសះស្បើយមានដល់ជិត៨០ភាគរយឯណោះ។
បើតាមគណៈកម្មការសុខាភិបាលចិន ករណីឆ្លងទូទាំងប្រទេសនៅថ្ងៃទី១១ ខែមីនា មានចំនួន១៥ករណី ដោយនៅខេត្តហ៊ូប៉ីមាន៨ និង៧ទៀតនៅខេត្តផ្សេងៗ។ ក្នុងចំណោម៧ករណីនេះ មាន៦ករណី ជាការនាំចូលពីប្រទេសផ្សេងដោយខេត្តគ័ងតុងមានបីករណី កាន់ស៊ូមានពីរ និងហឺណានមានមួយករណី ដែលធ្វើឲ្យចំនួនករណីឆ្លងបែបនេះនៅចិនមានចំនួន៨៥ករណី។ នេះបើតាមការផ្សាយរបស់ទីភ្នាក់ងារព័ត៌មានរដ្ឋចិន Xinhua ។
បូកបន្ថែមករណីឆ្លងទាំង១៥នេះ ការឆ្លងសរុបនៅចិនមានចំនួន៨០៧៩៣ករណី ដោយមានអ្នកស្លាប់ចំនួន៣១៦៩នាក់គិតត្រឹមថ្ងៃទី១១ ខែមីនា។ ជាមួយគ្នានោះ ចំនួនអ្នកសះស្បើយ ហើយត្រូវបានអនុញ្ញាតឲ្យចេញពីមន្ទីរពេទ្យ មានចំនួន៦២៧៩៣ ដែលស្មើនឹងជិត៨០ភាគរយនៃចំនួនអ្នកឆ្លងទាំងអស់។
ជារួម ករណីឆ្លងនៅក្នុងស្រុកនៅចិន បានធ្លាក់ចុះគួរឲ្យកត់សម្គាល់ក្នុងរយៈពេល៧ថ្ងៃចុងក្រោយ ដែលនេះជាលទ្ធផលនៃវិធានការដ៏តឹងរ៉ឹងដែលដាក់ដោយរដ្ឋាភិបាលចិន។ ទីក្រុងវូហានទាំងមូលដែលមានប្រជាជន១១លាននាក់ ត្រូវបានបិទជិតឈឹង ការធ្វើចរាចរណ៍ក៏ត្រូវរឹតត្បិត ខណៈខេត្តហ៊ូប៉ីដែលមានមនុស្សជាង៦០លាននាក់ ក៏ស្ថិតក្រោមបម្រាមធ្វើដំណើរទៅមកទាំងអស់ ឯខេត្តខណ្ឌផ្សេងៗ ក៏អនុវត្តវិធានការតឹងរ៉ឹងដូចគ្នា។
យ៉ាងណាមិញ ក្ដីបារម្ភនៅតែមានពាក់ព័ន្ធករណីឆ្លង COVID-19 នេះ ពិសេសការឆ្លងពីប្រទេសខាងក្រៅ។ កូរ៉េខាងត្បូង អ៊ីរ៉ង់ និងអ៊ីតាលី ជាប្រភពចម្លងចម្បងនៃករណីឆ្លងនាំចូលពីបរទេស។ ដើម្បីទប់ស្កាត់ករនាំចូលវីរុសនេះ អាជ្ញាធរចិន បានអនុវត្តវិធានការខ្លាំងនៅតាមព្រលានយន្តហោះអន្តរជាតិទាំងអស់។ នៅរដ្ឋធានីប៉េកាំង អ្នកដំណើរបរទេសទាំងអស់ ត្រូវដាក់ខ្លួនឲ្យនៅដោយឡែករយៈពេល១៤ថ្ងៃ មុនចាកចេញទៅកាន់ទីក្រុង៕
© រក្សាសិទ្ធិដោយ thmeythmey.com