COVID-19
អន្តរជាតិ
ថៃ១១នាក់ឆ្លង COVID-19 ដោយសារផឹកស្រាកែវរួមគ្នានាពិធីអាពាហ៍ពិពាហ៍មួយ រូបតំណាង
× ក្រសួងសុខាភិបាលថៃ នាថ្ងៃទី១២ ខែមីនា បានប្រកាសរកឃើញអ្នកជំងឺរលាកសួតបង្កដោយកូរ៉ូណាវីរុស (COVID-19) ចំនួន ១១ករណីបន្ថែមទៀត។ បើតាមក្រសួងសុខាភិបាលថៃ អ្នកជំងឺទាំង ១១ករណី បានឆ្លងCOVID-19 ដោយសារតែផឹកស្រាកែវរួមគ្នា និងចែកបារីគ្នាជក់។ ករណីសរុបនៅក្នុងប្រទេសថៃ បានកើនដល់ចំនួន ៧០ករណី ខណៈប្រទេសមួយចំនួននៅក្នុងតំបន់ បានរកឃើញករណីឆ្លងជាបន្តបន្ទាប់។
ក្រសួងសុខាភិបាលថៃ នាថ្ងៃទី១២ ខែមីនា បានឲ្យដឹងថា ក្នុងចំណោមជនជាតិថៃចំនួន ១៥នាក់ ដែលជាមិត្តភក្តិនឹងគ្នា មនុស្សចំនួន ១១នាក់ត្រូវបានរកឃើញថាមានផ្ទុក COVID-19។ ក្នុងចំណោមអ្នកទាំង ១៥នាក់នេះ មានអ្នកខ្លះបានជួបជាមួយភ្ញៀវមកពីហុងកុងនាថ្ងៃទី២១ ខែកុម្ភៈ។ រហូតដល់ថ្ងៃទី២៥ ខែកុម្ភៈ អ្នកជួបភ្ញៀវមកពីហុងកុងទាំងនោះ បានចេញរោគសញ្ញាដូចជាឈឺក្បាល ក្តៅខ្លួន និងក្អកជាដើម។
បើទោះបីជាមិនស្រួលខ្លួនក៏ដោយ អ្នកជំងឺនៅតែទៅចូលរួមក្នុងពិធីអាពាហ៍ពិពាហ៍មួយកន្លែង និងបានផឹកស្រាជុំគ្នា។ ក្នុងពិធីនេះហើយដែលពួកគេបានប្រើប្រាស់កែវស្រារួមគ្នា និងចែកបារីគ្នាជក់ទៀតផង។ បន្ទាប់ពីធ្វើរោគវិនិច្ឆ័យរួចមក ក្នុងចំណោមមនុស្ស ១៥នាក់ មាន ១១នាក់ផ្ទុក COVID-19 ចំណែក ៤នាក់ទៀត មិនមានផ្ទុកជំងឺនេះឡើយ ព្រោះមិនបានផឹកស្រា និងជក់បារី។ នេះបើតាមការចុះផ្សាយរបស់សារព័ត៌មាន The Nation។
ចំណែកមនុស្សផ្សេងទៀត ដែលចូលរួមក្នុងអាពាហ៍ពិពាហ៍នេះ ក៏ត្រូវបានគេយកសំណាកទៅពិនិត្យផងដែរ ប៉ុន្តែរកឃើញអវិជ្ជមាន។ សរុបករណី COVID-19 ទាំងអស់នៅថៃ មានករណីសរុប ៧០ អ្នកស្លាប់ ១ករណី និងអ្នកជាសះស្បើយមាន ៣៥ករណី។
សូមបញ្ជាក់ថា មួយរយៈចុងក្រោយនេះ ប្រទេសមួយចំនួននៅក្នុងតំបន់អាស៊ីអាគ្នេយ៍ បានរកឃើញករណីឆ្លងCOVID-19 ជាបន្តបន្ទាប់។ ក្នុងប្រទេសទាំងនោះមានដូចជា វៀតណាម ហ្វីលីពីន ឥណ្ឌូណេស៊ី កម្ពុជា ម៉ាឡេស៊ី ព្រុយណេ ជាដើម។ មានតែប្រទេស ២ប៉ុណ្ណោះ ដែលមិនទាន់រកឃើញមានCOVID-19 ក្នុងនោះមានមីយ៉ាន់ម៉ា និងឡាវ៕
© រក្សាសិទ្ធិដោយ thmeythmey.com