លោក Conor Nester គ្រូបង្វឹកក្រុមព្រះខ័នរាជស្វាយរៀងសង្កេតឃើញថា កូនក្រុមខ្លួនធ្វើបានល្អ តែហាក់ឆាប់ថមថយកម្លាំង។ កត្តានេះ ត្រូវបានលោកចាត់ទុក អាចជាមូលហេតុធ្វើឲ្យព្រះខ័នរាជស្វាយរៀងរងបរាជ័យ ៤-១ ក្រោមថ្វីជើងក្រុមរបស់វៀតណាម Thang Quang Ninh នាជំនួប G នៃពានរង្វាន់ AFC Cup 2020 កាលពីល្ងាចថ្ងៃទី១១ មីនា នៅពហុកីឡដ្ឋានជាតិ។ តែយ៉ាងណាគ្រូបង្វឹកក្រុមរបស់វៀតណាមបាននិយាយថា ការសិក្សាពីតិចនិក និងបិទកីឡាករសំខាន់ៗរបស់គូប្រកួតជាមូលហេតុ ដែលធ្វើឲ្យក្រុមលោកទទួលបាន៣ពិន្ទុនៅលើទឹកដីកម្ពុជា។
ទោះរងបរាជ័យ ៤-១ ក្រោមថ្វីជើងក្រុម Thang Quang Ninh តែគ្រូបង្វឹកក្រុមព្រះខ័នរាជស្វាយរៀងលោក Conor Nestor សង្កេតឃើញថា កូនក្រុមរបស់ខ្លួនបានបង្ហាញទម្រង់លេងយ៉ាងល្អនៅតង់ទី១ ទាំងនៅតំបន់ការពារ និងប្រយុទ្ធ។ កត្តានេះ ធ្វើឲ្យលោក មានទំនុកចិត្តថា កីឡាករស្វាយរៀងនឹងធ្វើបានកាន់តែល្អបន្ថែមទៀតនៅតង់ទី២។ ប៉ុន្តអ្វីៗមិនដូចការរំពឹងទុករបស់ លោកនោះទេ ពោលគឺអ្នកដែលធ្វើបានល្អនៅតង់ទី២ គឺជាគូប្រកួតរបស់ខ្លួនទៅវិញ។
«នៅតង់ទី១អ្នកធ្វើបានល្អគឺព្រះខ័នរាជស្វាយរៀង។ ឈានដល់តង់ទី២ចាប់ពីនាទី៦០កីឡាករយើងមានភាពនឿយហត់ខ្លាំងទាំងរាងកាយនិងស្មារតី។ នៅពេលយើងបាត់បង់ស្មារតី ហើយបញ្ចូលបាល់មិនបាល់ល្អ បាត់បាល់ ធ្វើឲ្យគូប្រកួតអាចរកគ្រាប់បាល់បាន»។ លោក Conor Nestor លើកឡើងដូច្នេះនាសន្និសីទសារព័ត៌មានក្រោយជំនួបស្វាយរៀងចាញ់ Thang Quang Ninh ៤-១ កាលពីយប់ថ្ងៃទី១១ មីនា។
កីឡាករ Privat (អាវខៀវ)ព្យាយាមអូសបាល់គេចពីការរារាំងរបស់កីឡាករពីររូបរបស់ Thang Quang Ninh, រូបភាពពីក្លិបព្រះខ័នរាជស្វាយរៀង
គ្រូបង្វឹកសញ្ជាតិអៀរឡង់រូបនេះ យល់ឃើញថា កត្តាដែលធ្វើឲឲ្យទម្រង់លេងរបស់ព្រះខ័នរាជស្វាយរៀងមានការធ្លាក់ចុះនៅតង់ទី២ គឺបណ្តាលមកពីភាពនឿយហត់របស់កីឡាករ។ លោកសន្និដ្ឋានថា បញ្ហានេះ អាចបណ្តាលមកពីក្រុមព្រះខ័នរាជស្វាយរៀងមានពេលវេលាសម្រាកតិច ដែលធ្វើឲ្យពួកគេប្រមូលកម្លាំងមិនបានល្អ។ ព្រោះពីរថ្ងៃមុនប៉ះក្រុម Thang Quang Ninh ក្រុមនេះទើបតែប៉ះភ្នំពេញក្រោនក្នុងពានរង្វាន់លីគកំពូលកម្ពុជា។ នាជំនួបដែលបញ្ចប់ដោយគ្មានការស៊ុតបញ្ចូលទីនេះបានធ្វើឲ្យកីឡាករ ប្រាក់ មុន្នីឧត្តម និង ឈិន ឈឿន រងរបួស ដែលធ្វើនាំឲ្យពួកគេអវត្តមានជាមួយក្រុមព្រះខ័នរាជស្វាយរៀង។
ជាមួយគ្នានេះ លោក Phan Thanh Hung គ្រូបង្វឹកក្រុម Thang Quang Ninh បានអះអាងថា លោកបានសិក្សាបច្ចេកទេស តិចនិក និងកីឡាករ ដែលអាចបង្កគ្រោះថ្នាក់របស់គូប្រកួតយ៉ាងល្អ ដែលជាហេតុធ្វើឲ្យពួកគេអាចប្រើយុទ្ធសាស្ត្រវាយបកក្នុងការរកគ្រាប់រហូតទទួលបានជ័យជម្នះ។
«យើងដឹងថាស្វាយរៀងជាក្រុមខ្លាំង យើងតែងតែយកចិត្តទុកដាក់លើតិចនិករបស់គេ បន្ទាប់មកយើងប្រើការវាយបក និងអាចរកគ្រាប់បាល់បានសម្រេច។ មួយវិញទៀតយើងឃើញកីឡាករ Privat គឺពិតជាគ្រោះថ្នាក់ ដូច្នេះយើងព្យាយាមបិទគាត់ ហើយបូករួមជាមួយយើងមានឱកាសជាច្រើនដើម្បីរកគ្រាប់បាល់ ទើបធ្វើឲ្យយើងទទួលបានជ័យជម្នះ»។ នេះជាការលើកឡើងរបស់លោក Phan Thanh Hung។
សម្រាប់ការប្រកួតបន្ទាប់ព្រះខ័នរាជស្វាយរៀងត្រូវធ្វើដំណើរទៅកាន់ទឹកដីវៀតណាមដើម្បីសងសឹកក្រុម Thang Quang Ninh នៅថ្ងៃទី១៤ ខែមេសា ឆ្នាំ២០២០។ សម្រាប់ការប្រកួតកាលពីថ្ងៃពុធ ម្សិលមិញនេះដែរ ក្រុម Ceres Negros បានយកឈ្នះក្រុម Bali United ក្នុងលទ្ធផល ៤-០ ដែលជ័យជម្នះនេះជួយឲ្យពួកគេបន្តឈរកំពូលតារាងមាន៧ពិន្ទុ ដែលឈរពីក្រោយដោយក្រុម Thang Quang Ninh មាន៤ពិន្ទុ ខណៈព្រះខ័នរាជស្វាយរៀងឈរលេខរៀងទី៣មាន៣ពិន្ទុ ស្មើក្រុមលេខ៤ Bali United៕