ជាតិ
នយោបាយជាតិ
ព្រះរាជអាជ្ញា បដិសេធថា ខ្លួនមិនបានចោទប្រកាន់អាមេរិក ពាក់ព័ន្ធនឹងករណីលោក កឹម សុខា ឡើយ
រូបពីស្ថានទូតអាមេរិកប្រចាំកម្ពុជា
×![]()
ភ្នំពេញ៖ ព្រះរាជអាជ្ញា បានបដិសេធថា ខ្លួនមិនបានចោទប្រកាន់អាមេរិក ឬរដ្ឋបរទេសណា ពាក់ព័ន្ធនឹងករណីលោក កឹម សុខា ឡើយ។ ការបដិសេធរបស់ព្រះរាជអាជ្ញានេះ ធ្វើឡើងតាមរយៈលិខិតរបស់អ្នកនាំពាក្យ នៃអយ្យការអមសាលាដំបូងរាជធានីភ្នំពេញ ដើម្បីឆ្លើយតបនឹងអាមេរិក ដែលបានអះអាងថា ព្រះរាជអាជ្ញាព្យាយាមទាញអាមេរិក ទៅពាក់ព័ន្ធនឹងករណីលោក កឹម សុខា ដែលកំពុងជាប់ចោទពីបទគប់គិតជាមួយបរទេស។
អ្នកនាំពាក្យ នៃអយ្យការអមសាលាដំបូងរាជធានីភ្នំពេញ បានបញ្ជាក់នៅក្នុងលិខិតចុះថ្ងៃទី១២ មីនា យ៉ាងដូច្នេះថា៖ «ក្នុងដំណើរការនៃការជំនុំជម្រះក្តី លើសំណុំរឿងពាក់ព័ន្ធនឹងជនជាប់ចោទ ឈ្មោះ កឹម សុខា ពីបទសន្ទិដ្ឋិភាព ជាមួយបរទេស តាមបញ្ញត្តិមាត្រា ៤៤៣ ក្រមព្រហ្មទណ្ឌនៃព្រះរាជាណាចក្រកម្ពុជា គឺព្រះរាជអាជ្ញាពុំបានចោទប្រកាន់ប៉ះពាល់ទៅលើសហរដ្ឋអាមេរិក រដ្ឋបរទេស ឬភ្នាក់ងារបរទេសណាមួយនោះឡើយ»។
អយ្យការអមសាលាដំបូងរាជធានីភ្នំពេញ បានអះអាងថា ព្រះរាជអាជ្ញា បានចោទប្រកាន់ទៅលើលោក កឹម សុខា ដោយមានអង្គហេតុ អង្គច្បាប់ ព្រមទាំងមានធាតុផ្សំបទល្មើសគ្រប់គ្រាន់ទៅតាមច្បាប់កម្ពុជាតែប៉ុណ្ណោះ។
នៅសវនាការព្រឹកថ្ងៃទី១២ មីនានេះ ព្រះរាជអាជ្ញា ចៅក្រមស៊ើបសួរ មេធាវីដើមបណ្ដឹង និងមេធាវីចុងចោទ បានបញ្ចប់ការជជែកដេញដោលគ្នាលើអង្គហេតុទាក់ទងនឹងកិច្ចព្រមព្រៀងរវាងលោក កឹម សុខា និងលោក សម រង្ស៊ី ដែលឈានទៅបង្កើតគណបក្សសង្គ្រោះជាតិ មុនការបោះឆ្នោតឆ្នាំ២០១៣។ ក្នុងសវនាការ ក៏មានការសួរដេញដោលលើថវិកាចំណាយលើសកម្មភាពនយោបាយរបស់លោក កឹម សុខា ផងដែរ។
អគ្គរដ្ឋទូតអាមេរិកប្រចាំកម្ពុជា W. Patrick Murphy ដែលបានចូលស្ដាប់សវនាការ បានឆ្លើយប្រាប់អ្នកកាសែត នៅសាលាដំបូងរាជធានីភ្នំពេញ នាថ្ងៃទី១២ មីនា ថា អាមេរិក អាក់អន់ចិត្តចំពោះព្រះរាជអាជ្ញាកម្ពុជា ដែលបានព្យាយាមទាញអាមេរិក ទៅពាក់ព័ន្ធនឹងករណីលោក កឹម សុខា មេដឹកនាំអតីតគណបក្សសង្គ្រោះជាតិ ដែលកំពុងជាប់ចោទពីបទគប់គិតជាមួយបរទេស។
អត្ថបទទាក់ទង
លោក W. Patrick Murphy បានសង្កត់ធ្ងន់ថា រដ្ឋាភិបាលអាមេរិកមិនដែលចង់ជ្រៀតជ្រែកចូលក្នុងកិច្ចការរបស់ប្រទេសកម្ពុជាទេ ។ «យើងគោរពពេញលេញចំពោះឯករាជ្យភាព និងអធិបតេយ្យភាពរបស់ប្រទេសកម្ពុជា។ តែយើងគាំទ្រសេរីភាពក្នុងការបញ្ចេញមតិ សង្គមស៊ីវិលដែលមានភាពសកម្ម និងការអត់ឱនដល់ទស្សនៈប្រឆាំង ជាផ្នែកសំខាន់ចាំបាច់មួយនៃគ្រប់លទ្ធិប្រជាធិបតេយ្យ»។ នេះជាការបញ្ជាក់របស់លោក អគ្គរដ្ឋទូតអាមេរិក ដែលសង្ឃឹមថា លោក កឹម សុខា នឹងអាចទទួលសិទ្ធិនយោបាយវិញ នាពេលខាងមុខ៕
Tag:
កឹម សុខា
នយោបាយ
CNRP
© រក្សាសិទ្ធិដោយ thmeythmey.com
