COVID-19
កីឡាអន្តរជាតិ
អន្តរជាតិ
Chelsea បិទទីតាំងហ្វឹកហាត់ ក្រោយកីឡាករខ្លួន តេស្តវិជ្ជមាន COVID-19
× Callum Hudson-Odoi ខ្សែប្រយុទ្ធវ័យក្មេងរបស់ Chelsea មានលទ្ធផលតេស្តវិជ្ជមានជំងឺរលាកសួតបង្កឡើងដោយកូរ៉ូណាវីរុសប្រភេទថ្មី (COVID-19)។ នេះបើតាមការប្រកាសរបស់ក្លិបតាមរយៈវេបសាយផ្លូវការរបស់ខ្លួន។ សមាជិកក្រុម រួមទាំងបុគ្គលិកតោខៀវ ដែលមានទំនាក់ទំនងជិតស្និទ្ធជាមួយ Odoi ត្រូវដាក់ឲ្យនៅដាច់ដោយឡែកស្របតាមគោលការណ៍វេជ្ជសាស្ត្រ។
Hudson-Odoi បានចេញរោគសញ្ញាស្រដៀងនឹងជំងឺផ្តាសាយកម្រិតស្រាល កាលពីថ្ងៃទី៩ ខែមីនា ហើយមិនបានទៅកន្លែងហ្វឹកហាត់ចាប់តាំងពីពេលនោះមក ដើម្បីជាការប្រុងប្រយ័ត្ន។ ការធ្វើតេស្តរបស់ខ្សែប្រយុទ្ធវ័យ១៩ឆ្នាំ ត្រូវបានរកឃើញថាមាន COVID-19 នៅថ្ងៃទី១៣ ខែមីនានេះ ហើយបន្តដាក់ចត្តាឡីស័កចាប់ពីពេលនេះទៅ។ Odoi មានស្ថានភាពសុខភាពល្អធម្មតា នឹងរំពឹងត្រឡប់ចូលហ្វឹកហាត់វិញបានឆាប់ៗនេះ។
ការឆ្លងរបស់ Hudson-Odoi អាចនឹងប៉ះពាល់ដល់សមាជិកក្រុម ព្រមទាំងក្រុមគ្រូបង្វឹក និងបុគ្គលិកមួយចំនួនដែលមានទំនាក់ទំនងជាមួយគេផងដែរ។ រហូតមកដល់ពេលនេះ ទីតាំងមជ្ឈមណ្ឌលហ្វឹកហាត់ និងអគាររបស់ Chelsea ត្រូវបានបិទទ្វារហើយ លើកលែងតែកីឡដ្ឋាន Stamford Bridge ដែលនៅដំណើរការធម្មតា។
«យើងនឹងបន្តគោរពតាមគោលការណ៍ណែនាំរបស់រដ្ឋាភិបាល និងសុខភាពសាធារណៈទាក់ទងទីតាំង និងបុគ្គលិករបស់យើង ហើយយើងនឹងពិភាក្សាអំពីជំហានបន្ទាប់ទាក់ទងនឹងការប្រកួត Premier League នៅព្រឹកថ្ងៃសុក្រនេះថាតើត្រូវពន្យារពេល ឬបន្ត។ យើងនឹងជូនព័ត៌មានបន្ថែមទៀតដែលចាំបាច់តាមរយៈវេបសាយរបស់ក្លិប»។ នេះជាសំណេរក្នុងសេចក្តីប្រកាសរបស់ក្លិប Chelsea។
ក្រៅពី Hudson-Odoi អ្នកចាត់ការទូទៅកាំភ្លើងធំ Arsenal លោក Mikel Arteta ក៏មានលទ្ធផលតេស្តវិជ្ជមានកូរ៉ូណាវីរុសដូចគ្នា។ Arsenal និង Chelsea សុទ្ធតែមានមូលដ្ឋាននៅក្រុងឡុងដ៍ដូចគ្នា។
ស្របពេលគ្នានេះដែរ ក្របខណ្ឌ Premier League បានកោះហៅក្លិបជាសមាជិកទាំង២០ដើម្បីប្រជុំគ្នា ជុំវិញករណី COVID-19 នេះ ថាតើគួរផ្អាកការប្រកួត ឬក៏បន្តធម្មតា នឹងដឹងនៅថ្ងៃទី១៣ ខែមីនានេះហើយ៕
© រក្សាសិទ្ធិដោយ thmeythmey.com