COVID-19
អន្តរជាតិ
ប្រជាជនកូរ៉េខាងត្បូងតម្រង់ជួរដើម្បីធ្វើតេស្តរក COVID-19 ។ រូបភាព Xinhua
×![]()
ដោយ: តន ចាន់រិទ្ធារ៉ា
ករណីឆ្លងថ្មីនៃជំងឺផ្លូវដង្ហើម COVID-19 នៅចិន និងកូរ៉េខាងត្បូង បានធ្លាក់ចុះដល់កម្រិតទាបបំផុតរៀងៗខ្លួន។ បើតាមការប្រកាសរបស់អាជ្ញាធរសុខាភិបាលប្រទេសទាំងពីរនៅថ្ងៃទី១៣ ខែមីនា ការឆ្លងថ្មីនៅថ្ងៃទី១២ ខែមីនា គឺនៅចិនមាន៨ករណី ឯកូរ៉េខាងត្បូងមាន១១០ករណីប៉ុណ្ណោះ ដែលសុទ្ធសឹងជាកំណត់ត្រាធ្លាក់ចុះគួរឲ្យកត់សម្គាល់។ វាក៏បង្ហាញពីលទ្ធផលវិជ្ជមាននៃវិធានការទប់ស្កាត់របស់ប្រទេសទាំងពីរផងដែរ។
នៅថ្ងៃទី១៣ ខែមីនា គណៈកម្មការសុខាភិបាលចិន បានរាយការណ៍ពីករណីឆ្លងថ្មីចំនួន៨ នៅទូទាំងប្រទេស ដែលសុទ្ធសឹងកើតឡើងនៅខេត្តហ៊ូប៉ីទាំងអស់ ស្របពេលខេត្តផ្សេងគ្មានករណីឆ្លងថ្មីឡើយនៅថ្ងៃដដែល។ ទីក្រុងវូហាន ដែលជាទីតាំងផ្ទុះ COVID-19 មុនគេបង្អស់ មានករណីឆ្លងចំនួន៥ ទៀត ដែលនេះជាចំនួនទាបបំផុតសម្រាប់ទីក្រុងដែលមានប្រជាជនប្រមាណ១២លាននាក់មួយនេះ តាំងពីការចាប់ផ្ដើមការកត់ត្រានៅខែមករាមក។
បីករណីថែមទៀត សុទ្ធសឹងជាការឆ្លងមកពីក្រៅប្រទេសទាំងអស់ ដោយមួយករណីនៅប៉េកាំង និងពីរទៀតនៅសៀងហៃ។ នេះបើតាមការផ្សាយរបស់ទីភ្នាក់ងារព័ត៌មានរដ្ឋចិន Xinhua ។ ការឆ្លងបែបនេះ ក្លាយជាក្ដីបារម្ភសម្រាប់ចិន ព្រោះស្ថានការណ៍រាតត្បាត COVID-19 ក្នុងស្រុក បានធូរស្រាលកាន់តែខ្លាំង ដែលជាលទ្ធផលនៃវិធានការតឹងរ៉ឹង និងម៉ឺងម៉ាត់ដូចជាការបិទទីក្រុង ការផ្អាកចរាចរណ៍ក្នុងទីក្រុងដែលផ្ទុះវីរុសជាដើម។
នៅកូរ៉េខាងត្បូងវិញ ករណីឆ្លងថ្មី ក៏ធ្លាក់ចុះខ្លាំងផងដែរ។ បើតាមការប្រកាសរបស់មជ្ឈមណ្ឌលទប់ស្កាត់ជំងឺឆ្លងកូរ៉េ (KCDC) នៅថ្ងៃទី១៣ ខែមីនា ករណីឆ្លងថ្មីនៅថ្ងៃទី១២ ខែមីនា មានចំនួន១១០ប៉ុណ្ណោះ ដែលជាតួលេខទាបបំផុតចាប់តាំងពីការរាប់ចំនួនករណីឆ្លងកាលពីខែកុម្ភៈមក។ ករណីឆ្លងសរុបនៅកូរ៉េខាងត្បូងមានចំនួន៧៩៧៩។
ដោយឡែក នៅថ្ងៃដដែល ចំនួនអ្នកសះស្បើយពី COVID-19 នៅកូរ៉េខាងត្បូង មានចំនួន១៧៧នាក់ ដែលជាចំនួនខ្ពស់បំផុតគិតតាំងពីការផ្ទុះឡើងវីរុសដំបូងនៅថ្ងៃទី២០ ខែមករា។ នេះក៏ជាលើកដំបូងដែលតួលេខអ្នកចាកចេញពីមន្ទីរពេទ្យមានច្រើនជាងអ្នកឆ្លងវីរុសផងដែរ។ ទីក្រុង Daegu និងខេត្ត North Gyeongsang នៅតែជាកន្លែងចម្លងធំដដែល ខណៈរដ្ឋធានីសេអ៊ូលមានករណីឆ្លងវីរុសឡើងដល់២២៥នាក់៕
Tag:
COVID-19
ចិន
កូរ៉េខាងត្បូង
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
