ជាតិ
សហព័ន្ធស្រូវអង្ករ សុំពន្យារពេលសងថវិកាទៅរដ្ឋាភិបាល និង សុំខ្ចីថែម៣០លានដុល្លារទៀត ស្រូវអង្ករ
× ភ្នំពេញ៖ សហព័ន្ធស្រូវអង្ករកម្ពុជា ស្នើសុំរដ្ឋាភិបាល ឲ្យពន្យារពេលសងកម្ចី៥០លានដុល្លារ និងជួយផ្តល់កម្ចី៣០លានដុល្លារបន្ថែម សម្រាប់ទិញស្រូវទុកនិងបម្រុង លើការខ្វះខាតស្រូវអង្ករ។
លោក កៅ ថាច អគ្គនាយកធនាគារអភិវឌ្ឍន៍ជនបទ និង លោក សុង សារ៉ន ប្រធានសហព័ន្ធស្រូវអង្ករកម្ពុជា បានប្រជុំលើបញ្ហាកញ្ចប់ថវិកាកម្ចី ក្នុងការត្រៀមទិញស្រូវសម្រាប់រដូវកាលបន្ទាប់ គឺឆ្នាំ២០២០-២០២១។ ក្នុងកិច្ចប្រជុំ នៅថ្ងៃទី១១ ខែមីនា ឆ្នាំ២០២០ សហព័ន្ធស្រូវអង្ករកម្ពុជា បានលើកសំណើដល់រាជរដ្ឋាភិបាលកម្ពុជា តាមរយៈធនាគារអភិវឌ្ឍន៍ជនបទ ឲ្យរក្សាកញ្ចប់ថវិកា៥០លានដុល្លារ ទុកសម្រាប់ទិញស្រូវនារដូវប្រមូលផលជុំទីមួយ និងស្នើសុំខ្ចីថវិកា៣០លានដុល្លារបន្ថែមទៀត។ នេះបើតាមការចេញផ្សារលើទំព័រហ្វេសប៊ុករបស់សហព័ន្ធស្រូវអង្ករកម្ពុជា។
លោក សុង សារ៉ន ប្រធានសហព័ន្ធស្រូវអង្ករកម្ពុជា ថ្លែងក្នុងកិច្ចប្រជុំថា ការស្នើសុំឲ្យក្រុមហ៊ុននាំចេញអង្ករ និងរោងម៉ាស៊ីនកិនស្រូវមួយចំនួន ពន្យារពេលសងប្រាក់ត្រឡប់ទៅរដ្ឋាភិបាល គឺដោយសារតែការរីករាលដាលនៃវីរុសកូវីដ-១៩ (COVID-19) ដែលធ្វើឲ្យអ្នកនាំចេញមួយចំនួនមានការពន្យារពេលទូទាត់ពីអ្នកបញ្ជាទិញ។ ដូច្នេះ លំហូរសាច់ប្រាក់របស់ក្រុមហ៊ុន និងរោងម៉ាស៊ីនកិនស្រូវ គឺមានការខកខាននិងរាំងស្ទះ។
ចំណែក លោក លន់ យ៉េន អគ្គលេខាធិការសហព័ន្ធស្រូវអង្ករកម្ពុជា និយាយថា នៅឆ្នាំ២០១៩ដល់២០២០ រដ្ឋាភិបាល បានទម្លាក់កញ្ចប់ថវិកា៥០លានដុល្លារ ឲ្យធនាគារអភិវឌ្ឍន៍ជនបទ ដើម្បីផ្ដល់កម្ចីដល់វិស័យស្រូវអង្ករ ហើយត្រូវសងត្រឡប់ទៅវិញ នៅចន្លោះខែឧសភានិងខែមិថុនា ឆ្នាំ២០២០។ ជាមួយគ្នានេះដែរ រដូវកាលស្រូវជុំទី១ នឹងមកដល់ពេលប្រមូលផលនៅអំឡុងខែកក្កដាដល់ខែសីហា និងរដូវស្រូវជុំទី២ នឹងដល់អំឡុងខែវិច្ឆិកាដល់ខែធ្នូ ទើបដាក់ស្នើសុំពន្យារពេលសងនិងសុំខ្ចីបន្ថែម។ ក្នុងកិច្ចសម្ភាសជាមួយសារព័ត៌មានថ្មីៗតាមទូរស័ព្ទនៅថ្ងៃទី១២ ខែមីនា ឆ្នាំ២០២០ លោក លន់ យ៉េន អះអាងថា ការធ្វើបែបនេះ គឺដើម្បីទិញស្រូវទុកឲ្យមានលំនឹងសម្រាប់កិននាំចេញឲ្យបានស្រួល និងត្រៀមលើការខ្វះខាតឥណនាទានលើវិស័យស្រូវអង្ករ។
លោក បញ្ជាក់ថា៖«កម្ចី៥០លានហ្នឹង យើងនឹងប្រើលើការទិញស្រូវ ក្នុងខែឧសភានិងខែមិថុនាក្នុងរដូវកាលជុំទី១ ហើយ៣០លានដុល្លារដែលស្នើបន្ថែមនេះ សម្រាប់បម្រុងទិញស្រូវទុកបន្តនៅជុំទី២នៅខែវិច្ឆិកានិងងខែធ្នូ ចុងឆ្នាំនេះ ព្រោះលុយ៥០លានដុល្លារ ដែលទិញស្រូវទុកហ្នឹង យើងកិនស្រូវមិនទាន់អស់និងមិនទាន់បានលុយត្រឡប់មកវិញ ព្រោះលុយនៅក្នុងស្រូវនៅឡើយ»។
សហព័ន្ធស្រូវអង្ករកម្ពុជា ប្រកាសថ្មីៗនេះថា មានអង្ករគ្រប់គ្រាន់សម្រាប់ផ្គត់ផ្គង់នៅក្នុងស្រុក និងនាំចេញទៅក្រៅប្រទេស រហូតដល់រដូវប្រមូលផលខាងមុខ។ សហព័ន្ធស្រូវអង្ករកម្ពុជា ក៏អំពាវនាវដល់ពលរដ្ឋ កុំឲ្យមានការព្រួយបារម្ភលើបញ្ហាខ្វះអង្ករ ជាហេតុនាំឲ្យមានជនឱកាសនិយមមួយចំនួនឆ្លៀតដំឡើងថ្លៃអង្ករ៕
© រក្សាសិទ្ធិដោយ thmeythmey.com