ជាតិ
រដ្ឋាភិបាល ថា សម្តីលោក Patrick Murphy គ្មានឥរិយាបថការទូត ដែលធ្វើឱ្យប៉ះពាល់ដល់តុលាការកម្ពុជា
រូបពីហ្វេសប៊ុក្រសួងការបរទេស និងសហប្រតិបត្តិការអន្តរជាតិ
×![]()
ភ្នំពេញ៖ រដ្ឋាភិបាល ថា មតិរបស់ឯកអគ្គរដ្ឋទូតអាមេរិកប្រចាំកម្ពុជា ជុំវិញដំណើរការក្តីលោក កឹម សុខា បានធ្វើឱ្យជះផលអវិជ្ជមានដល់ប្រព័ន្ធតុលាការកម្ពុជា។ ការលើកឡើងរបស់រដ្ឋាភិបាលបែបនេះ ធ្វើឡើងក្រោយ៊ពីលោក W. Patrick Murphy បង្ហាញអារម្មណ៍មិនពេញចិត្ត ចំពោះព្រះរាជអាជ្ញាកម្ពុជា ដែលបានព្យាយាមទាញអាមេរិក ទៅពាក់ព័ន្ធនឹងករណីលោក កឹម សុខា កាលពីថ្ងៃទី១២ មីនា។
រដ្ឋាភិបាលកម្ពុជា តាមរយៈក្រសួងការបរទេស និងសហប្រតិបត្តិការអន្តរជាតិ បានបញ្ជាក់ថា មតិរបស់លោក W. Patrick Murphy នេះ គឺជាការបង្ហាញពីឥរិយាបថគ្មានការទូត និងខ្វះការគោរពដល់អធិបតេយ្យភាពកម្ពុជាឡើយ។ ជាពិសេសវាធ្វើឱ្យប៉ះពាល់យ៉ាងធ្ងន់ធ្ងរដល់ប្រព័ន្ធតុលាការកម្ពុជា ។
មួយថ្ងៃក្រោយការថ្លែងរបស់លោកទូតអាមេរិកនេះ ក្រសួងការបរទេសកម្ពុជា បានចេញលិខិតមួយ នៅថ្ងៃទី១៣ មីនា យ៉ាងដូច្នេះថា៖«(លោក W. Patrick Murphy)ការថ្លែងបែបនេះ គឺជាការប្រព្រឹត្តិផ្ទុយទៅនឹងស្មារតីរបស់ថ្នាក់ដឹកនាំនៃប្រទេសទាំងពីរ ក្នុងការធ្វើឱ្យប្រសើរឡើងនូវការយោគយល់គ្នា និងគោរពគ្នាទៅវិញទៅមក ក៏ដូចជាការបើកទំព័តថ្មីនៃកិច្ចសហប្រតិបត្តិការជាក់ស្ដែងលើគ្រប់វិស័យ ក្នុងពេលដែលប្រទេសទាំងពីរកំពុងប្រារព្វធ្វើពិធីអបអរសាទរខួបចំណងមិត្តភាព៧០ឆ្នាំរបស់ខ្លួននៅក្នុងឆ្នាំនេះ»។
សម្រាប់ក្រសួងការបរទេសកម្ពុជា ការបញ្ចេញមតិរបស់ឯកអគ្គរដ្ឋទូតអាមេរិកបែបនេះ គឺជាការរំលោភបំពានលើមាត្រាទី៤១ នៃអនុសញ្ញាក្រុងវីយ៉ែន ឆ្នាំ១៩៦១ ស្តីពីទំនាក់ទំនងការទូត និងមាត្រា២ នៃធម្មនុញ្ញអង្គការសហប្រជាជាតិ ដែលគ្រប់អ្នកការទូត តំណាងប្រទេសនានា ទាំងប្រទេសតូច និងធំ ត្រូវគោរពឱ្យបានពេញលេញ។
បច្ចុប្បន្នអាមេរិក កំពុងតាមដានយ៉ាងយកចិត្តទុកដាក់លើដំណើរការកាត់ក្តីលោក កឹម សុខា ហើយបុគ្គលិកស្ថានទូតក៏បានព្យាយាមប្រមូលព័ត៌មានយ៉ាងល្អិតល្អន់ ជុំវិញសវនាការនេះ គ្រប់ពេលវេលាផងដែរ។ ប៉ុន្តែអ្វីដែលលោក Patrick Murphy មិនសូវសប្បាយចិត្តនោះ គឺព្រះរាជអាជ្ញាកម្ពុជា បានយកអាមេរិក ទៅផ្សារភ្ជាប់នៅក្នុងករណីលោក កឹម សុខា។ បើតាមលោក W. Patrick Murphy រដ្ឋាភិបាលអាមេរិកមិនដែលចង់ជ្រៀតជ្រែកចូលក្នុងកិច្ចការរបស់ប្រទេសកម្ពុជាទេ ។
ឯកអគ្គរដ្ឋទូតអាមេរិកប្រចាំកម្ពុជាលោក Patrick Murphy ដែលបានចូលស្ដាប់សវនាការលោក កឹម សុខា កាលពីថ្ងៃទី១២ មីនានេះ បានធ្វើសន្និសីទកាសែត ដោយមានយ៉ាងដូច្នេះថា៖«យើងមានការរំខានចិត្ត ដោយឃើញខាងព្រះរាជអាជ្ញាបានព្យាយាមលើកឡើងពីចំណុចមួយចំនួន ដែលជារឿងមិនពិត ទាក់ទងនឹងសហរដ្ឋអាមេរិក នៅក្នុងករណីលោក កឹម សុខា »។
តែយ៉ាងណាព្រះរាជអាជ្ញា បានបដិសេធថា ខ្លួនមិនបានចោទប្រកាន់អាមេរិក ឬរដ្ឋបរទេសណា ពាក់ព័ន្ធនឹងករណីលោក កឹម សុខា ឡើយ។ អ្នកនាំពាក្យ នៃអយ្យការអមសាលាដំបូងរាជធានីភ្នំពេញ បានបញ្ជាក់នៅក្នុងលិខិតចុះថ្ងៃទី១២ មីនា យ៉ាងដូច្នេះថា៖ «ក្នុងដំណើរការនៃការជំនុំជម្រះក្តី លើសំណុំរឿងពាក់ព័ន្ធនឹងជនជាប់ចោទ ឈ្មោះ កឹម សុខា ពីបទសន្ទិដ្ឋិភាព ជាមួយបរទេស តាមបញ្ញត្តិមាត្រា ៤៤៣ ក្រមព្រហ្មទណ្ឌនៃព្រះរាជាណាចក្រកម្ពុជា គឺព្រះរាជអាជ្ញាពុំបានចោទប្រកាន់ប៉ះពាល់ទៅលើសហរដ្ឋអាមេរិក រដ្ឋបរទេស ឬភ្នាក់ងារបរទេសណាមួយនោះឡើយ»។
អយ្យការអមសាលាដំបូងរាជធានីភ្នំពេញ បានអះអាងថា ព្រះរាជអាជ្ញា បានចោទប្រកាន់ទៅលើលោក កឹម សុខា ដោយមានអង្គហេតុ អង្គច្បាប់ ព្រមទាំងមានធាតុផ្សំបទល្មើសគ្រប់គ្រាន់ទៅតាមច្បាប់កម្ពុជាតែប៉ុណ្ណោះ៕
Tag:
កឹម សុខា
អាមេរិក
នយោបាយ
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
