COVID-19
អន្តរជាតិ
បារាំងបិទហាង កន្លែងកម្សាន្ត ហើយស្នើពលរដ្ឋ៦៧លាននាក់ឲ្យបន្តនៅផ្ទះ ដើម្បីទប់ស្កាត់ COVID-19 នាយករដ្ឋមន្រ្តីបារាំង Edouard Philippe។ រូបភាព៖ Reuters
× បារាំង នឹងបិទហាងលក់ទំនិញ ភោជនីយដ្ឋាន និងកន្លែងកម្សាន្តផ្សេងៗមួយរយៈ ចាប់ពីថ្ងៃទី១៥ ខែមីនា តទៅ ដើម្បីកាត់បន្ថយករណីឆ្លង នៃជំងឺរលាកសួត ដែលបង្កដោយកូរ៉ូណាវីរុស(COVID-19) នៅក្នុងប្រទេស។ លើសពីនេះ បារាំងក៏បានប្រាប់ឲ្យប្រជាជនរបស់ខ្លួនប្រមាណ ៦៧លាននាក់ ឲ្យបន្តស្នាក់នៅផ្ទះផងដែរ ដើម្បីការពារសុវត្ថិភាពពីCOVID-19 ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters នៅថ្ងៃទី១៥ ខែមីនា។
តាមរយៈសន្និសីទកាសែត នាយករដ្ឋមន្ត្រីបារាំង លោក Edouard Philippe បានអះអាងថា រដ្ឋាភិបាលគ្មានវិធានការអ្វីផ្សេង ក្រៅពីបិទទីកន្លែងសាធារណៈ កន្លែងកម្សាន្ត នោះទេ។ ការប្រកាសរបស់នាយករដ្ឋមន្ត្រីបារាំងបែបនេះ ធ្វើឡើងបន្ទាប់ពីCOVID-19 នៅបារាំងបានកើនដល់ជិត ៤៥០០ករណី និងអ្នកស្លាប់មាន ៩១ករណី។
ក្នុងសន្និសីទកាសែតដដែលនេះ លោកនាយករដ្ឋមន្ត្រី បានបន្តថា រដ្ឋាភិបាលបារាំង បានសម្រេចថា នឹងបិទកន្លែងមិនសំខាន់មួយចំនួន ដូចជា ហាងកាហ្វេ ភោជនីយដ្ឋាន រោងកុន ក្លឹបកម្សាន្តរាត្រីជាដើម ដើម្បីកាត់បន្ថយអត្រាឆ្លង និងចម្លងនៅក្នុងប្រទេស។ ត្រឹមតែរយៈពេល ៧២ម៉ោងតែប៉ុណ្ណោះ អត្រាឆ្លងនៅក្នុងប្រទេសបារាំង បានកើនរហូតដល់ទៅពីរដងឯណោះ។
យ៉ាងណាក៏ដោយ ក៏មានហាងមួយចំនួន នៅតែអនុញ្ញាតឲ្យបើកដដែល ក្នុងនោះមានដូចជា កន្លែងលក់ថ្នាំពេទ្យ ហាងលក់អាហារ ស្ថានីយប្រេងឥន្ធនៈជាដើម។
កន្លងមក ដោយសារមើលឃើញថា មនុស្សមានវ័យចំណាស់ គឺជាជនរងគ្រោះខ្លាំងជាងគេដោយសារ COVID-19 ប្រធានាធិបតីបារាំង អេម៉ានុយអែល ម៉ាក្រុង បានអំពាវនាវឲ្យបុគ្គល ដែលមានអាយុចាប់ពី ៧០ឆ្នាំឡើងទៅ ត្រូវស្នាក់នៅផ្ទះបណ្តោះអាសន្នសិន ដើម្បីកុំឲ្យឆ្លងកូរ៉ូណាវីរុស។
សូមបញ្ជាក់ថា ការបិទហាងលក់ទំនិញ ហាងកាហ្វេ ភោជនីយដ្ឋានពេលនេះ មិនមែនជារឿងចម្លែកទេ។ នាពេលកន្លងទៅ បារាំងក៏បានបិទសារមន្ទីរដ៏ល្បី Louvre របស់ខ្លួន និងសាលារៀននៅទូទាំងប្រទេស ដើម្បីទប់ស្កាត់ និងប្រយុទ្ធប្រឆាំង COVID-19 ៕
© រក្សាសិទ្ធិដោយ thmeythmey.com