អន្តរជាតិ
ន័រវែស និងស្វ៊ីស មានCOVID-19 សរុបជាង ១ពាន់ករណីរៀងៗខ្លួន រូបភាព៖ Reuters
× គិតត្រឹមរសៀលថ្ងៃទី ១៥ ខែមីនា ន័រវែស និងស្វ៊ីស សុទ្ធតែបានរកឃើញជំងឺរលាកសួត ដែលបង្កដោយកូរ៉ូណាវីរុសជាង ១ពាន់ករណីរៀងៗខ្លួន ខណៈប្រទេសទាំងពីរ នៅតែបន្តរកឃើញករណីឆ្លងក្នុងប្រទេសជាបន្តបន្ទាប់។
ប្រទេសជាច្រើននៅប៉ែកខាងអឺរ៉ុប កំពុងរងគ្រោះយ៉ាងខ្លាំងដោយសារ COVID-19។ ក្នុងចំណោមប្រទេសទាំងនោះ ន័រវែស និងស្វ៊ីស ក៏រងគ្រោះដោយសារបញ្ហានេះដែរ។
បើតាមវែបសាយរបស់ Worldometer ស្វ៊ីសបានរកឃើញករណីឆ្លងចំនួន ២២០ករណី នាថ្ងៃទី១៤ ខែមីនា។ ករណីសរុប COVID-19 នៅស្វ៊ីស បានកើនដល់ ១៣៧៥ករណី អ្នកស្លាប់ ១៣ករណី និងអ្នកជាសះស្បើយចំនួន ៤ករណី។ ពាក់ព័ន្ធនឹងបញ្ហានេះ រដ្ឋាភិបាលស្វ៊ីស បានចេញចំណាត់ការ បិទសាលារៀន ហាមឃាត់ការជួបប្រជុំលើសពី ១០០នាក់ បិទភោជនីយដ្ឋាន និងហាងមួយចំនួនជាដើម ដើម្បីទប់ស្កាត់ករណីឆ្លង។
ចំណែកនៅន័រវែសឯណោះវិញ ករណីCOVID-19 សរុបកើនដល់ ១១០៩ករណី ខណៈអ្នកស្លាប់មានចំនួន ៣ករណី និងអ្នកជាសះស្បើយ ១ករណី។ ដូចគ្នាទៅនឹងរដ្ឋាភិបាលស្វ៊ីសដែរ ន័រវែស បានចេញវិធានការបិទសាលារៀនចាប់ពីថ្នាក់មតេយ្យ ដល់សកលវិទ្យាល័យ ព្រឹត្តិការណ៍កីឡាទាំងអស់ ត្រូវផ្អាកមួយរយៈ ភោជនីយដ្ឋាន និងបារមួយចំនួន ក៏ត្រូវបិទដែរ។
សូមបញ្ជាក់ថា មកទល់ពេលនេះ COVID-19 ត្រូវបានគេរកឃើញមានប្រមាណ ១៥៦៧៣០ករណី។ ក្នុងចំនួនដ៏ច្រើននេះ មានអ្នកស្លាប់ចំនួន ៥៨៣៩ករណី និងអ្នកជាសះស្បើយចំនួន ៧៥៩៣៣ករណី។ ប្រទេសរងគ្រោះខ្លាំងជាងគេគឺនៅតំបន់អឺរ៉ុប ជាពិសេសអ៊ីតាលីតែម្តង៕
Tag:
ន័រវែល
ស្វ៊ីស
COVID-19
© រក្សាសិទ្ធិដោយ thmeythmey.com