អន្តរជាតិ
លោក ស៊ី រំលឹក EU ថា សាមគ្គី ជាកម្លាំងក្នុងការប្រយុទ្ធប្រឆាំង COVID-19 លោក ស៊ី ជិនភីង ប្រធានាធិបតីចិន។ រូបថត Xinhua
× ប្រធានាធិបតី ស៊ី ជិងភីង នាថ្ងៃទី១៥ ខែមីនា បានផ្ញើសំបុត្រទៅសហភាពអឺរ៉ុបថា ចិនគាំទ្រអឺរ៉ុបយ៉ាងមោះមុត ក្នុងការប្រយុទ្ធយកឈ្នះ ជំងឺរលាកសួតដែលបង្កដោយកូរ៉ូណាវីរុស (COVID-19)។ ក្នុងខ្លឹមសារសំបុត្រដដែលនេះ ប្រធានាធិបតីចិន បានលើកឡើងថា សាមគ្គីភាព គឺជាកម្លាំង ដែលអាចឲ្យប្រទេសទាំងអស់ អាចជម្នះCOVID-19 បាន។
ខណៈអឺរ៉ុបកំពុងតែអុកឡុកខ្លាំងដោយសារCOVID-19 លោក ស៊ី ជិនភីង ប្រធានាធិបតីចិន បានផ្ញើសារគាំទ្រអឺរ៉ុប ដែលកំពុងតែប្រយុទ្ធប្រឆាំង COVID-19។ តាមរយៈខ្លឹមសារ ដែលបានផ្ញើទៅប្រធានក្រុមប្រឹក្សាអឺរ៉ុប លោកCharles Michel ប្រធានគណៈកម្មការអឺរ៉ុប លោកស្រីUrsula von der Leyen ប្រធានាធិបតីចិន បានសម្តែងក្តីអាណិតអាសូរចំពោះសហភាពអឺរ៉ុប និងប្រជាជនអឺរ៉ុបទាំងមូល ដែលកំពុងរងគ្រោះ ដោយសារកូរ៉ូណាវីរុស។ ជាពិសេសលោក ក៏បានរំលឹកពីការគាំទ្ររបស់អឺរ៉ុបមានសម្រាប់ចិនក្នុងពេលកន្លងមកផងដែរ។
ទាក់ទងនឹងបញ្ហាផ្ទុះCOVID-19 នៅទ្វីបអឺរ៉ុបនេះ លោកស៊ី បានអះអាងថា សាមគ្គីភាព គឺជាអាវុធក្នុងការយកឈ្នះកូរ៉ូណាវីរុស។ ក្នុងន័យនេះ ប្រធានាធិបតីចិន ចង់បញ្ជាក់ថា ចិនបានត្រៀមខ្លួនរួចរាល់ហើយ ក្នុងការសហការជាមួយអឺរ៉ុប ដើម្បីទប់ស្កាត់ការរីកសាយភាយCOVID-19 នៅក្នុងតំបន់អឺរ៉ុប។ មិនតែប៉ុណ្ណោះចិន ក៏បានត្រៀមជំនួយរួចរាល់ដែរ ដើម្បីជួយអឺរ៉ុបឲ្យរួចផុតពីជំងឺឆ្លងមួយនេះ។
បើតាមការអះអាងរបស់ប្រធានាធិបតីចិន កិច្ចសហប្រតិបត្តិការរវាងចិន និងអឺរ៉ុបនេះ គឺធ្វើឡើងក្នុងគោលបំណងការពារប្រទេសទាំងអស់នៅក្នុងពិភពលោក និងរួមគ្នាក្នុងការជួយសង្គ្រោះមនុស្សជាតិទាំងមូល។ នេះបើតាមការចុះផ្សាយរបស់ទីភ្នាក់ងារព័ត៌មាន Xinhua។
ក្រៅពីបញ្ហា COVID-19 ប្រធានាធិបតីចិន ក៏បានលើកឡើងពីទំនាក់ទំនងរវាងអឺរ៉ុប និងចិនផងដែរ។ សូមបញ្ជាក់ថា កន្លងមក ចិន បានបញ្ជូនអ្នកជំនាញវិជ្ជសាស្ត្រ និងជំងឺឆ្លងមួយក្រុម ទៅអ៊ីតាលី ដើម្បីជួយដោះស្រាយCOVID-19 ដែលកំពុងតែអុកឡុកខ្លាំង៕
Tag:
ចិន
អឺរ៉ុប
COVID-19
© រក្សាសិទ្ធិដោយ thmeythmey.com