ជាតិ
សម្ដេច ហ៊ុន សែន ឲ្យរក្សាព្រលានយន្តហោះបែកចាន ព្រោះនឹងមានគម្រោងកសាងនាពេលខាងមុខ
× សម្តេចនាយករដ្ឋមន្ត្រី ហ៊ុន សែន បានណែនាំឲ្យសាលាខេត្ត និងក្រសួងមន្ទីរពា់ក់ព័ន្ធនានាខិតខំសិក្សា និងរក្សាឲ្យបាននូវព្រលានយន្តហោះបែកចាន។ សម្តេចលើកឡើងថា ទោះមិនទាន់ត្រូវការប្រើប្រាស់ ប៉ុន្តែតម្រូវការច្បាស់ជានឹងមាននាពេលខាងមុខ។
ថ្លែងក្នុងពិធីបុណ្យទន្លេខេត្តបាត់ដំបង នាល្ងាចថ្ងៃទី១៤ ខែមីនា សម្តេច ហ៊ុន សែន លើកឡើងថា ត្រូវខិតខំសិក្សា និងរក្សាឲ្យបាននូវការកសាងព្រលានយន្តហោះបែកចាន បើទោះបីជាពេលនេះមិនទាន់ត្រូវការ ប៉ុន្តែនៅពេលខាងមុខ ច្បាស់ជាត្រូវការនូវប្រលានយន្តហោះសម្រាប់ខេត្តបាត់ដំបង។ ទោះវាមិនមែនបែបអន្តរជាតិ ប៉ុន្តែពេលប្រជាពលរដ្ឋមានជីវភាពរីកចម្រើន មានតម្រូវការធ្វើដំណើររបស់កាន់តែខ្ពស់ ដូច្នេះការហោះហើរក្នុងស្រុកក៏ត្រូវតែមាន។
សម្តេចលើកឡើងថា៖ «ត្រូវតែមានការរៀបចំចក្ខុវិស័យមួយដើម្បីពិនិត្យពីការរៀបចំព្រលានយន្តហោះបាត់ដំបងឡើងវិញ ដើម្បីជាសេចក្ដីត្រូវការនៃការអភិវឌ្ឍ។ ក្នុងនោះយន្តហោះក៏ត្រូវមាន២ប្រភេទផងដែរ ជាយន្តហោះធម្មតា និងជាឧទ្ធម្ភាគចក្រ ដែលអាចធ្វើដំណើរបានងាយស្រួលជាង»។
សម្តេចបានស្នើអភិបាលខេត្ត និង សម្តេច ស ខេង រដ្ឋមន្ត្រីក្រសួងមហាផ្ទៃជូនដំណឹងដល់ពលរដ្ឋកុំឲ្យសាងសំណង់ខ្ពស់ៗនៅទីតំបន់ព្រលានចាស់នោះ ព្រោះអាចប៉ះពាល់ដល់គម្រោងសាងសង់ព្រលានយន្តហោះនាពេលអនាគតខាងមុខ ។
សម្ដេចបានបញ្ជាក់ថា សម្រាប់គម្រោងក្នុងឆ្នាំ២០២១ បើការសិក្សាបានច្បាស់ជាក់លាក់ហើយនោះ នឹងត្រូវសាងសងផ្លូវមួយខ្សែ ដែលជាការតភ្ជាប់មួយយ៉ាងសំខាន់ខេត្តបាត់ដំបង ជាមួយខេត្តដែលនៅជុំវិញ ដូចជាខេត្តបន្ទាយមានជ័យ ខេត្តពោធិ៍សាត់ ខេត្តប៉ៃលិន និងខេត្តកោះកុង៕
Tag:
បាត់ដំបង
ព្រលានយន្តហោះ
© រក្សាសិទ្ធិដោយ thmeythmey.com