COVID-19
អន្តរជាតិ
COVID-19៖ មេ WHO ទទូចឲ្យប្រធានាធិបតីឥណ្ឌូណេស៊ី ដាក់ប្រទេសក្នុងភាពអាសន្ន រូបភាព៖ AFP
× អង្គការសុខភាពពិភពលោក (WHO) បានស្នើឲ្យប្រធានាធិបតីឥណ្ឌូណេស៊ី លោក Joko Widodo បង្កើនចំណាត់ការឲ្យកាន់តែទូលាយទូទាំងប្រទេសដើម្បីឆ្លើយតបការផ្ទុះរីករាលដាលនៃវីរុស COVID-19 ខណៈចំនួនអ្នកឆ្លង និងអ្នកស្លាប់ដោយសារតែវីរុស របស់ប្រទេសដែលមានប្រជាជនច្រើនជាងក្នុងតំបន់មួយនេះ បន្តកើនឡើងជាបន្តបន្ទាប់។
តាមរយៈលិខិតផ្លូវការផ្ញើទៅកាន់ប្រធានាធិបតីលោក Joko Widodo អគ្គនាយកអង្គការសុខភាពពិភពលោក លោក Tedros Adhanom Ghebreyesus បានកត់សម្គាល់ពីភាពមិនទាន់ច្បាស់លាស់ក្នុងការតាមដានលើករណីឆ្លងនៅក្នុងជំហានដំបូង នៅក្នុងបណ្តាប្រទេសមួយចំនួន ដែលកត្តានេះធ្វើឲ្យមានការរីករាលនៃការឆ្លង និងរហូតស្លាប់កាន់ច្រើន។ នេះបើយោងតាមការចុះផ្សាយរបស់ Jakarta Post នៅថ្ងៃ១៤ មីនា។
តាមប្រភពព័ត៌មានដដែល អគ្គនាយកអង្គភាពសុខភាពពិភពលោករូបនេះ បានផ្តល់យោបល់ឲ្យឥណ្ឌូណេស៊ី មានចំណាតក់មួយចំនួនជាបន្ទាន់ដើម្បីកាត់បន្ថយការឆ្លង ក៏ដូចជាទប់ស្កាត់ការរីករាលបន្ថែមនៅក្នុងប្រទេស ដោយក្នុងនោះ លោក ទទូចឲ្យប្រមុខដឹកនាំឥណ្ឌូណេស៊ី ប្រកាសដាក់ភាពអាសន្នទូទាំងប្រទេសផងដែរ។
ប្រធាន WHO ក៏បានស្នើឲ្យឥណ្ឌូណេស៊ី ផ្តល់ព័ត៌មានលម្អិតអំពីចំណាត់ ក៏ដូចជាយន្តការរបស់ប្រទេស ដែលបានយកទៅអនុវត្តក្នុងការវិភាគ និងតេស្ត ទំនាក់ទំនងសម្រាប់ការកំណត់មុខសញ្ញា ក៏ដូចជាសកម្មភាពពាក់ព័ន្ធផ្សេងៗដើម្បីកំណត់ពីវីរុស COVID-19។ ប្រធាន WHO ថ្លែងបែបនេះ ក៏ដោយសារ កន្លងមក ឥណ្ឌូណេស៊ី ហាក់មិនទាន់មានឆន្ទៈក្នុងការសហការជាមួយនឹង WHO នៅឡើយ។
សំណើរបស់ ប្រធានអង្គការសុខភាពពិភពលោករូបនេះ ធ្វើឡើងដោយមើលឃើញពីភាពផុយស្រួយនៃលទ្ធភាពនៃការឆ្លងវីរុសនេះ ដោយឥណ្ឌូណេស៊ី មានប្រជាជនច្រើន ហើយករណីឆ្លង ក៏បានកើនឡើងជាលំដាប់។ បើគិតត្រឹមថ្ងៃទី១៤ មីនា ឥណ្ឌូណេស៊ី មានអ្នកឆ្លង ៦៩ ករណី និងស្លាប់ ៤ករណីរួចទៅហើយនោះ។
ដោយសារតែផ្ទុះឡើងនៃវីរុស COVID-19 នេះ បណ្តាប្រទេសមួយចំនួនរួមមានទាំង អាមេរិក និងអេស្ប៉ាញជាដើមនោះ បានប្រកាសដាក់ប្រទេសក្នុងភាពអាសន្នរួចហើយ៕
Tag:
ឥណ្ឌូណេស៊ី
WHO
COVID-19
© រក្សាសិទ្ធិដោយ thmeythmey.com