COVID-19
ជាតិ
មន្ត្រី និងពលរដ្ឋខ្មែរដែលទើបមកពីអឺរ៉ុប អាមេរិក និងអ៊ីរ៉ង់ ត្រូវនៅដាច់ដោយឡែក១៤ថ្ងៃសិន
× សម្តេចនាយករដ្ឋមន្ត្រី ហ៊ុន សែន កាលពីថ្ងៃទី១៥ ខែមីនា បានចេញសេចក្តីណែនាំស្តីពីវិធានការបង្ការ និងទប់ស្កាត់ការរាតត្បាតនៃជំងឺកូវីដ១៩ ដែលកំពុងមានភាពធ្ងន់ធ្ងរនៅបណ្តាប្រទេសអឺរ៉ុប សហរដ្ឋអាមេរិក និងអ៊ីរ៉ង់ ខណៈកម្ពុជា បានរកឃើញចំនួន១២ករណីហើយ។
ដើម្បីទប់ស្កាត់ការរាលដាល ប្រមុខរដ្ឋាភិបាលកម្ពុជា បានណែនាំដល់ពលរដ្ឋ កុំធ្វើដំណើរទៅកាន់ប្រទេសដែលកំពុងរាលដាលទាំងនោះ ប្រសិនបើមិនមានករណីចាំបាច់បំផុតដែលខានមិនបាន។ ជាមួយគ្នានេះ សម្តេច ហ៊ុន សែន បានប្រាប់ទៅថ្នាក់ដឹកនាំក្រសួង ស្ថាប័នទាំងអស់ មិនត្រូវឲ្យមន្ត្រីទៅចូលរួមកិច្ចប្រជុំនៅអឺរ៉ុប សហរដ្ឋអាមេរិក និងអ៊ីរ៉ង់នោះឡើយ។
ចំពោះករណីដែលចាំបាច់ដែលតម្រូវឲ្យមានតំណាងកម្ពុជាចូលរួមខាងមិនបាន សម្តេចបានណែនាំឲ្យក្រសួង ស្ថាប័នពាក់ព័ន្ធ ធ្វើសំណើទីក្រសួងការបរទេស និងសហប្រតិបត្តិការអន្តរជាតិ ដើម្បីចាត់តំណាងស្ថានទូតនៅប្រទេសម្ចាស់ផ្ទះចូលរួមជំនួស។
ស្របតាមនីតិវិធីកំណត់ដោយក្រសួងសុខាភិបាល សម្តេច ហ៊ុន សែន បានតម្រូវឲ្យមន្ត្រីរាជការ និងពលរដ្ឋកម្ពុជា ដែលទើបត្រឡប់ពីអឺរ៉ុប សហរដ្ឋអាមេរិក និងអ៊ីរ៉ង់ ដាក់ខ្លួនឯងឲ្យនៅដាច់ដោយឡែករយៈពេល១៤ថ្ងៃ ដោយគិតចាប់តាំងពីថ្ងៃមកដល់កម្ពុជាវិញ។
បច្ចុប្បន្ន កម្ពុជារកឃើញអ្នកឆ្លង COVID-19 ចំនួន១២ករណី ដោយផ្តើមពីករណីដំបូងលើបុរសទេសចរចិនម្នាក់នៅខេត្តព្រះសីហនុ បន្ទាប់មកបុរសខ្មែរម្នាក់នៅខេត្តសៀមរាប ជនជាតិអង់គ្លេស៣នាក់នៅនាវា Viking Cruise ដែលចតនៅកំពង់ចាម បុរសកាណាដាម្នាក់ដែលជាគ្រូបង្រៀនសាលាអន្តរជាតិមួយ បុរសបែលហ្ស៊ិក ដែលជាបុគ្គលិកអន្តរជាតិមួយ។
កាលពីថ្ងៃទី១៥ ខែមីនា ក្រសួងសុខាភិបាលបានប្រកាសពីការរកឃើញ៥ករណីទៀត ដែលក្នុងនោះមានបុរសបារាំងម្នាក់ដែលមកពីបារាំង ហើយឆ្លងធ្វើតេស្តនៅសិង្ហបុរី។ បន្ទាប់មកនោះពេលយប់ មានការប្រកាស៤ករណីបន្ថែម ក្នុងនោះមានទារកបារាំងអាយុ៤ខែដែលជាកូនបុរសបារាំងខាងលើ បុរសខ្មែរម្នាក់ពីប្រទេសបារាំង និងបុរសខ្មែរឥស្លាម២នាក់នៅខេត្តព្រះវិហារ ដែលមានប្រវត្តិទៅចូលរួមពិធីបុណ្យសាសនានៅគួឡាឡាំពួរ៕
© រក្សាសិទ្ធិដោយ thmeythmey.com