COVID-19
អន្តរជាតិ
ក្នុងមួយថ្ងៃ អ៊ីតាលីមានករណីឆ្លងCOVID-19 ជាង៣ពាន់ករណី ខណៈមន្ទីរពេទ្យខ្វះគ្រែអ្នកជំងឺ
រូបភាព៖ EPA-EFE, ANSA
×![]()
ដោយ: ធៀន ភារិន្ទ
អ៊ីតាលី នាថ្ងៃទី១៥ ខែមីនា បានរកឃើញករណីឆ្លងជំងឺផ្លូវដង្ហើមដែលបង្កដោយកូរ៉ូណាវីរុស (COVID-19) ជាង ៣០០០ពាន់ករណី និងស្លាប់ ៣៦៨ករណី ខណៈមន្ទីរពេទ្យ កំពុងប្រឈមបញ្ហាខ្វះគ្រែ និងសម្ភារមួយចំនួនសម្រាប់អ្នកជំងឺ។ 
មួយរយៈចុងក្រោយនេះ អ៊ីតាលី បានរកឃើញករណីឆ្លងCOVID-19យ៉ាងច្រើន ពោលគឺច្រើនជាងប្រទេសដទៃទៅទៀត។ នាថ្ងៃទី១៤ ខែមីនា អ៊ីតាលី បានរកឃើញអ្នកឆ្លងCOVID-19 ចំនួន ៣៤៩៧ករណី និងអ្នកស្លាប់ ១៧៥ករណី ហើយចំនួននេះ នៅតែបន្តកើនឡើងថែមទៀតនៅថ្ងៃបន្ទាប់។ នៅថ្ងៃទី១៥ ខែមីនា អ៊ីតាលី បានរកឃើញ ៣៥៩០ករណី និងអ្នកស្លាប់ ៣៦៨ករណី។ ករណីសរុបនៅអ៊ីតាលី មានចំនួន ២៤៧៤៧ករណី អ្នកស្លាប់ ១៨០៩ករណី និងអ្នកជាសះស្បើយ ២៣៣៥ករណី។
ពាក់ព័ន្ធនឹងបញ្ហានេះ អភិបាលតំបន់ Lombardy ភាគខាងជើងអ៊ីតាលី លោក Attilio Fontana បាននិយាយថា តំបន់របស់លោក កំពុងប្រឈមបញ្ហាខ្វះសម្ភារពេទ្យមួយចំនួននៅក្នុងមន្ទីរពេទ្យ។ សម្ភារទាំងនោះមានដូចជា គ្រែពេទ្យ ម៉ាស៊ីនជំនួយសួត ម៉ាស៊ីនអុកស៊ីសែន និងសម្ភារមួយចំនួន។ បើតាមលោកAttilio ប្រសិនស្ថានភាពនៅតែបែបនេះទៀត មន្ទីរពេទ្យនឹងមិនអាចជួយសង្គ្រោះមនុស្សជាច្រើននាក់បានទេ ដោយសារតែសម្ភារនេះ នឹងខ្វះក្នុងពេលខាងមុខនេះ។
ចំណែកម៉ាស់វិញ ក៏កំពុងខ្វះខាតដែរនៅអ៊ីតាលី ប៉ុន្តែវាមិនជាបញ្ហាចោទនៅឡើយទេ ដោយសាររដ្ឋាភិបាលបានគិតគូរពីបញ្ហានេះ និងមានការនាំចូលម៉ាស់ក្នុងពេលឆាប់ៗខាងមុខ។ បើតាមអភិបាលក្រុង Milan ដែលជាទីក្រុងប្រជុំជនមួយរបស់តំបន់ Lombardy លោក Milan Beppe Sala ម៉ាស់ជាច្រើន នឹងមកដល់អ៊ីតាលី នាថ្ងៃទី២០ ខែមីនាខាងមុខនេះ បន្ទាប់ពីបញ្ជាទិញពីចិន។
សូមបញ្ជាក់ អ៊ីតាលី នៅតែបន្តរកឃើញCOVID-19 ជាច្រើនករណីដដែល បើទោះបីជាប្រទេសអឺរ៉ុបមួយនេះ បានចេញវិធានការបិទសាលារៀន រឹតត្បិតការធ្វើដំណើរនៅទូទាំងប្រទេស បិទព្រឹត្តិការណ៍កីឡាផ្សេងៗ និងវិធានការផ្សេងៗជាដើម។ មកទល់ពេលនេះ អ៊ីតាលី គឺជាប្រទេសរងគ្រោះខ្លាំងជាងគេបំផុតនៅក្នុងពិភពលោក ខណៈពេលចិន ដែលជាប្រទេសផ្ទុះ COVID-19 ដំបូងគេនោះ កំពុងតែថមថយករណីឆ្លងនៅក្នុងប្រទេស៕
Tag:
អ៊ីតាលី
COVID-19
© រក្សាសិទ្ធិដោយ thmeythmey.com
