រថយន្ត
អន្តរជាតិ
ព្រឹត្តិការណ៍យានយន្តធំៗលើពិភពលោក ត្រូវបានលុបចោលជាបន្តបន្ទាប់ដោយសារ COVID-19
× ព្រឹត្តិការណ៍ Frankfurt Motor Show នៅអាល្លឺម៉ង់ បន្ទាប់មកនៅប៉េកាំង, ហ្ស៉ឺណែវ រហូតដល់ញូវយ៉ក ត្រូវបានលុបចោលជាបន្តបន្ទាប់ ដោយសារតែការរាលដាលពេញពិភពលោកនៃ COVID-19។ បើតាមការផ្សាយរបស់ USA Today ព្រឹត្តិការណ៍យានយន្តក្របខណ្ឌថ្នាក់ជាតិនានា ក៏ត្រូវបានលុបចោលផងដែរ។
នៅរដ្ឋ Illinois សហរដ្ឋអាមេរិក អ្នករៀបចំព្រឹត្តិការណ៍ All Sports Car Swap Autojumble បានអះអាងថា ទទួលបានទំនាក់ទំនងពីមនុស្សជាច្រើនដែលសំណូមពរឲ្យរំសាយចោលព្រឹត្តិការណ៍ ខណៈរដ្ឋទាំងមូលរកឃើញករណីឆ្លង COVID-19 ជាង២៥នាក់។
វាជារឿងដែលកាន់តែមិនអាចទៅរួចសម្រាប់ក្រុមរៀបចំព្រឹត្តិការណ៍យានយន្ត ដោយសារតែអាជ្ញាធរ បានលុបចោលកម្មវិធីដែលមានការជួបជុំគ្នាច្រើន ដូចជា St. Patrick’s Day ជាដើម ហេតុដូច្នេះ អ្នកដែលស្រឡាញ់ម៉ូដរថយន្តទំនើបៗ ក៏មិនអាចជួបជុំគ្នាបានដែរ។
នៅញូវយ៉ក ក្រុមអ្នករៀបចំព្រឹត្តិការណ៍ New York Auto Show បានអះអាងថា ពួកគេនៅតែបន្តរៀបចំជំនួបតូចៗសម្រាប់អតិថិជនក្នុងតំបន់ ប៉ុន្តែមិនអាចរៀបចំជាលក្ខណៈអន្តរជាតិបាននោះឡើយ។ លោក Robert Ross ទីប្រឹក្សាយានយន្តរបស់ក្រុមហ៊ុនទស្សនាវដ្តី Robb Report Magazine បានអះអាងថា៖ «ជំនួបតូចៗនៅតែអាចមាន ប៉ុន្តែដោយការប្រុងប្រយ័ត្ន ខណៈមនុស្សជាច្រើនពីចម្ងាយភាគច្រើនដែលត្រូវធ្វើដំណើរតាមយន្តហោះ មិនហ៊ានទៅចូលរួមនោះឡើយ»។
កត្តាជាច្រើនដែលនាំឲ្យព្រឹត្តិការណ៍យានយន្តធំៗ មិនអាចដំណើរការទៅរួចដែលក្នុងនោះ មានដូចជាការបិទជើងហោះហើរ បម្រាមប្រមូលផ្តុំ និងភាពភ័យខ្លាច ខណៈដែលចំនួនអ្នកឆ្លង COVID-19 បន្តរាលដាលជាសាកល៕
© រក្សាសិទ្ធិដោយ thmeythmey.com