COVID-19
អន្តរជាតិ
រូបភាព៖ Alamy
×![]()
ដោយ: ធៀន ភារិន្ទ
ក្រុមជ្រុលនិយមរដ្ឋឥស្លាម (ISIS) បានចេញបទបញ្ជា ហាមមិនឲ្យសមាជិករបស់ខ្លួនទាំងអស់ ទៅមកទឹកដីអឺរ៉ុប ដើម្បីការពារករណីឆ្លងជំងឺរលាកសួតដែលបង្កដោយកូរ៉ូណាវីរុស (COVID-19)។ បើតាមក្រុមរដ្ឋឥស្លាម បទបញ្ជានេះ គឺធ្វើឡើងតាមបញ្ជារបស់ព្រះជាម្ចាស់។ នេះបើតាមការចុះផ្សាយរបស់សារព័ត៌មាន India Today នៅថ្ងៃទី១៥ ខែមីនា។
តាមរយៈប្រតិបត្តិការព័ត៌មាន(Newsletter) ឈ្មោះ Al-Naba ដែលតែងតែផ្តល់ដំណឹងជុំវិញបញ្ហាធ្វើដំណើរទៅអឺរ៉ុប ក្រុមរដ្ឋឥស្លាម បានចេញបម្រាម សមាជិករបស់ខ្លួនទាំងអស់ មិនឲ្យធ្វើដំណើរទៅអឺរ៉ុបដែលខ្លួនចាត់ទុកថាជា «ដែនដីនៃជំងឺឆ្លង» នៃCOVID-19។
តាមរយៈបទបញ្ជាដដែលនេះ សមាជិករដ្ឋឥស្លាមទាំងអស់ត្រូវតែចេះការពារខ្លួនជាមុន តាមរយៈការលាងដៃឲ្យបានញឹកញាប់ បើទោះបីជាក្រោកពីដេកនៅពាក់កណ្តាលយប់ក៏ដោយ។ ជាពិសេស ក្រុមអ្នកប្រយុទ្ធទាំងអស់ ត្រូវតែនៅឲ្យឆ្ងាយពីអ្នកជំងឺ និងជៀសវៀងធ្វើដំណើរទៅប្រទេសមួយចំនួន ដូចជាអឺរ៉ុបជាដើម។
ពាក់ព័ន្ធនឹងបញ្ហានេះ ក្រុមISIS បានបញ្ជាថា អ្នកប្រយុទ្ធ ដែលមានសុខភាពល្អទាំងអស់ ត្រូវតែជៀសឲ្យឆ្ងាយពីអឺរ៉ុប ដែលជាកន្លែងផ្ទុះCOVID-19 ហើយសមាជិក ISIS ទាំងអស់ ដែលមានវត្តមាននៅក្នុងទឹកដីអឺរ៉ុប ហាមដាច់ខាតចាកចេញពីតំបន់នេះ។ ការដាក់បទបញ្ជាបែបនេះ គឺដើម្បីទប់ស្កាត់ករណីឆ្លងមកក្នុងក្រុមរបស់ខ្លួន។
សូមបញ្ជាក់ថា ក្រុមរដ្ឋឥស្លាម មានមូលដ្ឋានរបស់ខ្លួនយ៉ាងច្រើននៅក្នុងតំបន់មជ្ឈិមបូព៌ា ប៉ុន្តែក្រុមនេះ បានបាត់បង់ទឹកដីឈរជើងបន្តិចម្តងៗ ដោយសារតែចាញ់សង្គ្រាមនៅក្នុងតំបន់។ យ៉ាងណាក៏ដោយ ក្រុមនេះ នៅតែរក្សាប្រតិបត្តិការរបស់ខ្លួននៅតាមប្រទេសមួយចំនួនដដែល៕
Tag:
ISIS
COVID-19
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
