ជាតិ
សង្គមជាតិ
សកម្មជនបរិស្ថានដែលត្រូវបានដោះលែង (រូបភាពពីទំព័រហ្វេសប៊ុករបស់ ADHOC)
×![]()
ដោយ: ឡាយ សុភាវតី
ភ្នំពេញ៖ លោក អ៊ូច ឡេង ប្រធានអង្គការក្រុមកិច្ចការពិសេសសិទិ្ធមនុស្សកម្ពុជា និង សកម្មជនបរិស្ថាន៣នាក់ទៀត ត្រូវដោះលែង កាលពីថ្ងៃទី១៦ ខែមីនា ឆ្នាំ២០២០ ដោយតុលាការរកមិនឃើញពីភស្តុតាង ប៉ុន្តែពួកគេ ត្រូវដាក់ក្រោមការស៊ើបអង្កេតបន្ត។ សកម្មជនបរិស្ថានទាំង៤នាក់នេះ បានចុះល្បាតតំបន់ព្រៃឡង់ ខេត្តក្រចេះ ហើយក៏ត្រូវសន្តិសុខរបស់ក្រុមហ៊ុនស៊ីងបាយអូថេក (Think Biotech Co.,Ltd) ឃាត់ខ្លួនបញ្ជូនទៅឲ្យសមត្ថកិច្ច។ 
លោក ហេង ស្រស់ សកម្មជនបរិស្ថានម្នាក់ និងជាសហការីរបស់ លោក អ៊ួច ឡេង ថ្លែងប្រាប់សារព័ត៌មានថ្មីៗតាមទូរស័ព្ទនៅថ្ងៃទី១៦ ខែមីនានេះថា ព្រះរាជអាជ្ញាចោទសកម្មជនទាំង៤នាក់នោះ ចំនួន៣បទល្មើស រួមមាន ការចូលក្នុងតំបន់របស់ក្រុមហ៊ុនស៊ីងបាយអូថេតដោយគ្មានការអនុញ្ញាត, អង្គការក្រុមកិច្ចការពិសេសមនុស្សកម្ពុជា គ្មានឯកសារត្រឹមត្រូវ និង ការប្រើប្រាស់អំពើហិង្សា។
លោក ហេង ស្រស់ អះអាងថា ទោះជាត្រូវបានដោះលែងក្តី ប៉ុន្តែតុលាការនៅបន្តដាក់ការតាមដាននិងស៊ើបអង្កេតបន្តលើពួកគេ។ លោក និយាយថា៖«តុលាការរកមិនឃើញភស្តុតាង ឬសកម្មភាពសុខច្បាប់ពាក់ព័ន្ធនឹងករណីនេះ ទើបសម្រេចដោះលែង។ ប៉ុន្តែតុលាការសម្រេចដាក់ការស៊ើបអង្កេតបន្ត»។
ជាមួយគ្នានេះដែរ លោក បញ្ជាក់ថា តុលារការបានឲ្យលោក អ៊ួច ឡេង ធ្វើកិច្ចសន្យា ចុះបញ្ជីអង្គការរបស់គាត់ឲ្យបានត្រឹមត្រូវ ស្របតាមនីតិវិធីច្បាប់ មុននឹងធ្វើសកម្មភាពបន្តទៀត។
សូមបញ្ជាក់ថា សកម្មជនបរិស្ថានទាំង៤នាក់នេះ គឺ លោក អ៊ួច ឡេង លោក ខេម សុខឃី លោក ស្រី ថី និង លោក មេន ម៉ាត់។ អ្នកទាំង៤នាក់នេះ ត្រូវបានសន្តិសុខរបស់ក្រុមហ៊ុនស៊ីងបាយអូថេក ឃាត់ខ្លួននិងសាកសួរ ពេលពួកគេ ចុះឃ្លាំងមើលសកម្មភាពកាប់ឈើខុសច្បាប់ក្នុងតំបន់ព្រៃឡង់ថ្ងៃទី១៣ មីនា ឆ្នាំ២០២០៕
Tag:
សកម្មជនបរិស្ថាន
© រក្សាសិទ្ធិដោយ thmeythmey.com
