ទ័ពផ្តល់ភាពឈឺចាប់ឲ្យវិសាខា ខណៈភ្នំពេញក្រោនបន្តឈរកំពូលតារាងមិនទាន់ស្គាល់ចាញ់

កីឡាជាតិ

ជាតិ

ទ័ពផ្តល់ភាពឈឺចាប់ឲ្យវិសាខា ខណៈភ្នំពេញក្រោនបន្តឈរកំពូលតារាងមិនទាន់ស្គាល់ចាញ់

17, Mar 2020 , 2:51 pm

រូបភាព

ដោយ:

សមាគមកីឡាបាល់ទាត់កងយោធពលខេមរភូមិន្ទ(ទ័ព)បានធ្វើឲ្យវិសាខារងការខកចិត្តយ៉ាងខ្លាំង ជាមួយបរាជ័យ ១-០ លើទឹកដីវិសាខា នាជំនួបសប្តាហ៍ទី៥នៃពានរង្វាន់ក្របខណ្ឌមិត្តហ្វូនខេមបូឌានលីគ។ ក្រុមភ្នំពេញក្រោនបានបន្តឈរកំពូលតារាងជាមួយកំណត់ត្រាមិនទាន់ស្គាល់ចាញ់ បន្ទាប់ពីពួកគេបានយកឈ្នះអង្គរថាយហ្គឺរ ១-០ នាជំនួបដ៏ស្វិតស្វាញលើទឹកដីខ្លួន។

នាជំនួបដ៏ស្វិតស្វាញនៅកីឡដ្ឋានព្រីនស៍ ក្រុមម្ចាស់ផ្ទះវិសាខានិងកងយោធពលខេមរភូមិន្ទបានបញ្ចប់ដោយគ្មានការស៊ុតបញ្ចូលទីគ្នានៅតង់ទី១ ទោះវិសាខាហាក់មានឱកាសមាសច្រើនក្នុងការរកគ្រាប់បាល់ក៏ដោយ។ សម្រាប់ការប្រកួតនេះដែរ ក្រុមទ័ពបានប្រើទម្រង់លេងការពារវាយបកច្រើនជាងប្រយុទ្ធ ដែលធ្វើឲ្យគូប្រកួតពិបាកក្នុងការបំប៉ោងសំណាញ់ទី។

ការខកចិត្តសម្រាប់អ្នកគាំទ្រក្រុមម្ចាស់ផ្ទះវិសាខាក៏បានកើតឡើង បន្ទាប់ពីកីឡាករ ណារ៉ុង កក្កដា សម្រេចបានគ្រាប់បាល់នាំមុខ ១-០ ឲ្យក្រុមភ្ញៀវទ័ព។ ការនាំមុខរបស់ទ័ព បានធ្វើឲ្យវិសាខាមានការខិតខំប្រឹងប្រែងកាន់តែខ្លាំងក្នុងការដាក់សម្ពាធទៅលើភ្ញៀវ ហើយពួកគេបានបង្កើតឱកាសជាច្រើន ប៉ុន្តែនៅតែមិនអាចទម្លាយសំណាញ់ទីដ៏រឹងមាំរបស់ទ័ព។ ភាពឈឺចាប់សម្រាប់ក្រុមម្ចាស់ផ្ទះក៏បានកើតឡើង បន្ទាប់ពីអាជ្ញាកណ្តាលផ្លុំកញ្ចែបញ្ចប់ការប្រកួតជាមួយលទ្ធផលដ៏ខកចិត្ត ១-០។

នាសន្និសីទសារព័ត៌មានក្រោយការប្រកួតលោក ទេព ឡុងរចនា គ្រូបង្វឹកទ័ពទទួលស្គាល់ថា ក្រុមលោកពិតជាបានប្រើប្រាស់ប្រព័ន្ធលេងបែបការពារច្រើនក្នុងជំនួបជាមួយវិសាខា។ កត្តាដែលធ្វើឲ្យ ទ័ព ប្រើប្រាស់ទម្រង់លេងបែបនេះ បន្ទាប់ពីវិសាខាបានព្យាយាមដាក់សម្ពាធខ្លាំងពេកមកខ្លួន។ តែយ៉ាងណាគ្រូបង្វឹករូបនេះអះអាងថា អ្វីៗគ្រប់យ៉ាងកើតឡើងពីការរៀបចំ។

ឆ្លើយនឹងសំនួរអ្នកសារព័ត៌មានដែលសួរថា តើកត្តាអ្វីដែលធ្វើឲ្យទ័ពអាចទទួលបានជោគជ័យ លោក ទេព ឡុងរចនា បានបញ្ជាក់យ៉ាងដូច្នេះថា៖«អ្វីក៏ដោយ ជ័យជម្នះវាស្ថិតលើការរៀបចំ បើយើងរៀបចំល្អ វាជោគជ័យ នេះចំណុចទី១ ហើយចំណុចទី២ វាកើតចេញពីកីឡាករយើងមានឆន្ទៈចង់ឈ្នះ លេងអស់ពីកម្លាំងចិត្ត ដែលជាចំណុចពិបាកបង្ហាត់។ អ៊ីចឹងមានតែកីឡាករ ដែលមានការប្ដេជ្ញា និងលេងដោយកម្លាំងចិត្ត ទើបអាចដណ្ដើមជ័យជម្នះបាន»។

ជាមួយគ្នានេះលោក Colum Curtis គ្រូបង្វឹកក្រុមវិសាខាបានចាត់ទុកការខ្វះសំណាងជាកត្តាដែលធ្វើឲ្យក្រុមលោកមិនអាចច្នៃឱកាសមាស ដែលបានកើតឡើងយ៉ាងច្រើនទៅជាមិទ្ធផលសម្រេចបាន។ ការលេងមានការប្រុងប្រយ័ត្ននិងចង់ឈ្នះខ្លាំងពេករបស់កីឡាករ ជាកត្តាបង្កើតឲ្យមានភាពចន្លោះប្រហោង ដែលអាចឲ្យគូប្រកួតរកគ្រាប់បាល់បាន និងទទួលបាន៣ពិន្ទុត្រឡប់ទៅផ្ទះ។

នាការប្រកួតដ៏ជក់ចិត្តនៅកីឡដ្ឋានស្មាត អ អេស អិន ក្រុមម្ចាស់ផ្ទះភ្នំពេញក្រោនបានយកឈ្នះភ្ញៀវអង្គរថាយហ្គឺរក្នុងលទ្ធផល ១-០ យ៉ាងលំបាកលំបិន។ ដ្បិតក្រុមមកពីខេត្តសៀមរាបមួយនេះ មានប្រព័ន្ធការពាររឹងមាំ និងប្រយុទ្ធដ៏មុតស្រួច ដែលអាចបង្កើតគ្រោះថ្នាក់ដល់ភ្នំពេញក្រោន។ ជាក់ស្តែងទោះបីពួកគេចាញ់ម្ចាស់ផ្ទះក៏ដោយ តែកីឡាករអង្គរថាយហ្គឺរបានបង្កើតឱកាសមាសជាច្រើន ស្ទើរតែអាចបំប៉ោងសំណាញ់ទីក្រុមម្ចាស់ផ្ទះ។

មួយគ្រាប់របស់កីឡាករ Paulo Victor ក្រោមការបញ្ជូនរបស់កីឡាករ អ៊ន ចាន់ប៉ូលីន វាគ្រប់គ្រាន់ក្នុងការជួយឲ្យភ្នំពេញក្រោនបន្តឈរកំពូលតារាងក្នុងសប្តាហ៍ទី៥នៃពានរង្វាន់លីគកំពូល។ ជ័យជម្នះនេះ ជួយឲ្យភ្នំពេញក្រោនរក្សាមិនស្គាល់ចាញ់ និងរបូតគ្រាប់បាល់សូម្បីមួយគ្រាប់សម្រាប់៥ប្រកួតរបស់ខ្លួន។

ទោះបី៥ប្រកួតមិនទាន់មានក្រុមណាអាចបំប៉ោងសំណាញ់ទីក៏ដោយ តែលោក ស៊ុំ វណ្ណា គ្រូបង្វឹកភ្នំពេញក្រោននិយាយថា ប្រព័ន្ធការពាររបស់ក្រុមភ្នំពេញក្រោនមិនទាន់ល្អ១០០ភាគរយនោះទេ ហើយលោកវាយតម្លៃថា ទាំងប្រព័ន្ធប្រយុទ្ធនិងការពាររបស់ក្រុមលោកមានភាពល្អប្រសើរតែ៨០ភាគរយប៉ុណ្ណោះ។

សម្រាប់លទ្ធផលការប្រកួតសប្តាហ៍ទី៥ក្រុមអាស៊ីអឺរ៉ុបបានយកឈ្នះក្រុមយុវជនអាយុក្រោម១៨ឆ្នាំបាទីក្នុងលទ្ធផល ៤-០, ព្រះខ័នរាជស្វាយរៀងឈ្នះអគ្គិសនីកម្ពុជា ៣-០, សូលទីឡូអង្គរស៊ីប៉ូលិស ៤-២ ខណៈគីរីវង់សុខសែនជ័យស្មើ ១-១ ជាមួយណាហ្គាវើល៕