COVID-19
ជាតិ
កូវីដ១៩៖ពិធីសម្ពោធវិហារឥស្លាមមួយកន្លែងនៅត្បូងឃ្មុំ ត្រូវបានពន្យារពេល
× គណៈកម្មការរៀបចំពិធីសម្ពោធម៉ាស្ជិទ ឬវិហារឥស្លាម អាមីរ អាល់សាកីណាល់ ដែលស្ថិតនៅភូមិសែនជ័យ ឃុំរំចេក ស្រុកមេមត់ ខេត្តត្បូងឃ្មុំ បានសម្រេចពន្យារពេល រៀបចំពិធីសម្ពោធជាផ្លូវការ ដែលគ្រោងរៀបចំនៅថ្ងៃទី១៧ មីនានេះ។ ការសម្រេចលើកពេលភ្លាមៗនេះ ធ្វើឡើងដើម្បីបង្ការ និងទប់ស្កាត់ការរាតត្បាតជំងឺកូវីដ១៩។
លោក ហាក់ ម៉ាហៀត អ្នកគ្រប់វិហារ និងជាគណៈកម្មការរៀបចំកម្មវិធី បានធ្វើសេចក្ដីជូនដំណឹងស្ត្រីពីការពន្យារពេលសម្ពោធវិហារនេះ ដែលការសម្រេចនេះ ធ្វើឡើងតបតាមសំណើរបស់រដ្ឋបាលខេត្តត្បូងឃ្មុំ។
ក្នុងលិខិតរបស់រដ្ឋបាលខេត្ត បានសរសេរដូច្នេះថា៖«ផ្អែកតាមស្ថានការណ៍ថ្មីៗនេះ និងសេចក្ដីប្រកាសរបស់ក្រសួងសុខាភិបាលស្ដីពី ស្ថានភាពរាតត្បាតនៃវីរុសកូវីដ១៩ របស់អង្គការសុខភាពពិភពលោក...ដើម្បីធានាបាននូវសុវត្ថិភាពសុខភាពរបស់បងប្អូនប្រជាពលរដ្ឋរស់នៅក្នុងខេត្តត្បូងឃ្មុំ រដ្ឋបាលខេត្ត ស្នើសុំពន្យារពេលការប្រារព្ធពិធីសម្ពោធឆ្លងសមិទ្ធផលនេះ ជាបណ្ដោះអាសន្ន»។
គួរកត់សម្គាល់ថា ការសម្រេចនេះក៏ធ្វើឡើងស្របពេលដែលមានខ្មែរឥស្លាមចំនួន ១៣នាក់ ក្នុងចំណោម ៧៩នាក់ បានឆ្លងជំងឺកូវីដ ១៩ ក្រោយត្រឡប់មកពីពិធីបុណ្យសាសនានៅប្រទេសម៉ាឡេស៊ី៕
Tag:
កូវីដ១៩
វិហារឥស្លាម
© រក្សាសិទ្ធិដោយ thmeythmey.com