លោក ម៉ម ប៊ុនហេង ប្រកាសរកពេទ្យស្ម័គ្រចិត្ត ដើម្បីប្រយុទ្ធនឹងជំងឺកូវីដ-១៩

COVID-19

ជាតិ

សង្គមជាតិ

លោក ម៉ម ប៊ុនហេង ប្រកាសរកពេទ្យស្ម័គ្រចិត្ត ដើម្បីប្រយុទ្ធនឹងជំងឺកូវីដ-១៩

17, Mar 2020 , 9:19 pm

រូបភាព

ដោយ:

ភ្នំពេញ៖ ការកើនឡើងនៃអ្នកផ្ទុកកូវីដ-១៩ នៅកម្ពុជា បានតម្រូវឲ្យលោក ម៉ម ប៊ុនហេង ក្រសួងសុខាភិបាល ប្រកាសរើសគ្រូពេទ្យស្ម័គ្រចិត្ត ដើម្បីបំពេញបេសកម្មប្រយុទ្ធប្រឆាំងនឹងកូវីដ-១៩។ លើសពីនេះ លោក ក៏បានប្រកាសពីការសាងសង់អគារថែទាំបន្ថែម នៅអតីតមណ្ឌលសុខភាពចាក់អង្រែផងដែរ រួមទាំងយកសណ្ឋាគារ The Great Duke ធ្វើជាមន្ទីរពេទ្យសម្រាប់ព្យាបាលអ្នកជំងឺកូវីដ-១៩។

តាមរយៈសេចក្តីជូនព័ត៌មាន ដែលចេញនៅថ្ងៃទី១៦ ខែមីនា លោករដ្ឋមន្ត្រី លើកឡើងថា ដើម្បីសម្រួលដល់ការពន្លឿននៃការព្យាបាលដល់អ្នកជំងឺកូវីដ-១៩ ក្រសួងសុខាភិបាល នឹងសាងសង់អគារថែទាំសុខភាពបន្ថែម ដែលមានគ្រែ១០០នៅអតីតមណ្ឌលសុខភាពចាក់អង្រែ ក្នុងសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។ លោក សង្កេតឃើញថា មានអ្នកទៅស្នើសុំធ្វើតេស្តរកកូវីដ-១៩កាន់តែច្រើនឡើងៗ។

សម្រាប់គ្រូពេទ្យស្ម័គ្រចិត្តណា ដែលមានបំណងចូលរួមបេសកម្មប្រឆាំងកូវីដ-១៩ អាចទៅចុះឈ្មោះនៅក្រសួងសុខាភិបាល ឬតាមបណ្តាញទំនាក់ទំនង Telegram របស់លោក ហ៊ុយ ឆេងតារាភ័ក្រ ដែលប្រើលេខទូរសព្ទ ០៧៦ ៨៨៨ ៩១១៨។

ទន្ទឹមនឹងនេះ រដ្ឋាភិបាល បានសម្រេចយកសណ្ឋាគារ The Great Duke ធ្វើជាមន្ទីរពេទ្យសម្រាកព្យាបាលអ្នកជំងឺកូវីដ-១៩។ លើសពីនេះ រដ្ឋមន្ត្រីសុខាភិបាល បានបង្គាប់ឲ្យអភិបាលរាជធានី-ខេត្តនីមួយៗ បង្កើតគណៈកម្មាធិការប្រឆាំងនឹងកូវីដ-១៩។

ថ្វីដ្បិតកម្ពុជាមិនទាន់មានករណីឆ្លងកូវីដ-១៩ ក្នុងសហគមន៍ តែក្រសួងសុខាភិបាល បានត្រៀមរួចជាស្រេចនូវឧបករណ៍ បរិក្ខារ ធនធាន និង មធ្យោបាយ សម្រាប់ព្យាបាលអ្នកជំងឺកូវីដ-១៩។ ក្រសួងសុខាភិបាល បានកំណត់យកមន្ទីរពេទ្យមិត្តភាពខ្មែរ-រុស្សី មន្ទីរពេទ្យកុមារជាតិ មន្ទីរគន្ធបុប្ផាភ្នំពេញ មន្ទីរពេទ្យជ័យវរ្ម័នទី៧សៀមរាប និងមន្ទីរពេទ្យទាំង២៤ រាជធានីខេត្តក្រុង សម្រាប់ទទួលព្យាបាលអ្នកជំងឺកូវីដ-១៩។

គិតត្រឹមយប់ថ្ងៃទី១៧ ខែមីនា កម្ពុជា មានការឆ្លងវីរុសកូវីដ-១៩ ៣៣ករណីហើយ។ ចំពោះបុរសចិន ដែលកម្ពុជា រកឃើញមានវីរុសកូវីដ-១៩ មុនគេ បានជាសះស្បើយវិញ៕