COVID-19
អន្តរជាតិ
ស្របនឹងការរីករាលដាល COVID-19 នាយករដ្ឋមន្ត្រីវៀតណាម ជំរុញការអនុវត្តប្រព័ន្ធរដ្ឋាភិបាលអនឡាញ
× រដ្ឋាភិបាលក្រុងហាណូយ បានជំរុញឲ្យមន្ត្រីជំនាញក្រោមឱវាទបន្តពង្រឹង និងពង្រីកការអនុវត្តប្រព័ន្ធអេឡិចត្រូនិក ឬប្រព័ន្ធបច្ចេកវិទ្យាព័ត៌មាននៅក្នុងអង្គភាពរដ្ឋាភិបាលឲ្យបានកាន់តែទូលំទូលាយ និងសម្បូរបែប។ ការណ៍ដែលក្រុងហាណូយ ចង់ឃើញការអនុវត្តបែបនេះ ក៏ដោយសារតែដើម្បីជួយសន្សំសំចៃថវិការដ្ឋ ជាពិសេសនោះជាការសម្រួលមួយដល់ប្រជាជន ខណៈកំពុងប្រឈមនឹង COVID-19។
តាមរយៈសន្និសីទស្តីពីការអនុវត្តប្រតិបត្តិការ នៃការផ្តល់សេវាសាធារណៈតាមប្រព័ន្ធអនឡាញបីខែដំបូង លោកនាយករដ្ឋមន្ត្រីវៀតណាម Nguyễn Xuân Phúc នៅថ្ងៃ១៣ មីនា បានស្នើឲ្យដាក់ដំណើរប្រព័ន្ធតាមដានលើប្រព័ន្ធរដ្ឋាភិបាលអេឡិចត្រូនិក ( e-Government) ដើម្បីបន្តកម្រិតទំហំនៃការប្រើប្រាស់សេវាសាធារណៈនៅក្នុងក្រសួង ភ្នាក់ងារ និងរដ្ឋបាលសាធារណៈបន្ថែមទៀត។
តាមចុះផ្សាយរបស់ភ្នាក់ងារព័ត៌មានវៀតណាម Vietnam News លោកនាយករដ្ឋមន្ត្រី បានវាយតម្លៃខ្ពស់លើការអនុវត្តសេវាសាធារណៈតាមប្រព័ន្ធអនឡាញ ដោយលោកអះអាងថា បានជួយរដ្ឋាភិបាល ទាំងការសន្សំសំចៃពេលវេលា និងថវិកា ជាពិសេសនោះស្របពេលនៃការផ្ទុះឡើងនៃការរីករាលវីរុស COVID-19 តែម្តង។
ជាមួយគ្នានឹងការដាក់បញ្ជាឲ្យក្រសួងហិរញ្ញវត្ថុរបស់ខ្លួនបន្តការងារក្នុងការសម្រួលឲ្យមានការបង់ថ្លៃសេវាសាធារណៈ ពន្ធដារ ក៏ដូចជាកាតព្វកិច្ចហិរញ្ញវត្ថុផ្សេងតាមប្រព័ន្ធអនឡាញ ប្រមុខរដ្ឋាភិបាលវៀតណាមរូបនេះ ក៏បានក្រើនរម្លឹកឲ្យមន្ត្រីជំនាញរដ្ឋាភិបាល ត្រូវធានាឲ្យបានសន្តិសុខ និងសុវត្ថិភាពប្រព័ន្ធអនឡាញ ដោយមិនត្រូវឲ្យមានការបែកធ្លាយឯកសារជាដាច់ខាត។ នេះបើតាមប្រភពព័ត៌មានដដែល។
គួរជម្រាបផងដែរ ដើម្បីសម្រួលដល់ការផ្តល់សេវាសាធារណៈដល់ប្រជាជន ក៏ដូចជាការទាក់ទាញវិនិយោគក្នុងប្រទេសឲ្យកាន់ច្រើន នៅចុងឆ្នាំ២០១៩កន្លងទៅ រដ្ឋាភិបាលវៀតណាម បានដាក់ដំណើរជាផ្លូវការនូវច្រកចេញចូលសេវាសាធារណៈជាតិ ដោយប្រើប្រាស់តាមប្រព័ន្ធអនឡាញ(e-government)។ សេវានេះ បានដាក់បញ្ចូលនូវសេវាសាធារណៈរដ្ឋជាច្រើន ក្នុងនោះរាប់បញ្ចូលទាំងការទូទាត់ប្រាក់ និងនីតិវិធីសម្រាប់ស្នើសុំពាក់ព័ន្ធការវិនិយោគជាដើម។
ក្នុងរយៈពេលអនុវត្តបីខែកន្លងមកនេះ រដ្ឋាភិបាលវៀតណាម បានភ្ជាប់សេវាសាធារណៈជាមួយនឹងក្រសួងរបស់ខ្លួនចំនួន ១៤ និងរដ្ឋបាលសាធារណៈ ៦៣ និងអ្នកប្រើប្រាស់ (Subscriber) ប្រមាណជិតប្រាំម៉ឺននាក់ ខណៈសំណើឯកសារដែលបានដាក់ស្នើក្នុងប្រព័ន្ធ មានចំនួន ២.៩ លាន ឯកសារផងដែរ៕
© រក្សាសិទ្ធិដោយ thmeythmey.com