COVID-19
ជាតិ
សង្គមជាតិ
អ្នកនាំពាក្យ៖ បុរសខ្មែរនៅសៀមរាប ដែលឆ្លងកូវីដ-១៩ មានសភាពវិវត្តទៅរកការជាសះស្បើយវិញ
× អ្នកស្រីវេជ្ជបណ្ឌិត ឱ វណ្ណឌីន អ្នកនាំពាក្យក្រសួងសុខាភិបាល លើកឡើងថា បុរសខ្មែរអាយុ៣៨ឆ្នាំ ដែលឆ្លងកូវីដ-១៩ និង កំពុងសម្រាកព្យាបាលនៅមន្ទីរពេទ្យបង្អែកខេត្តសៀមរាម មានសុខភាពធម្មតា ដោយមិនមានសភាពធ្ងន់ធ្ងរឡើយ។ អ្នកស្រី អះអាងថា ចំនួនវីរុសកូវីដ-១៩ ក្នុងខ្លួនរបស់គាត់ បានថយចុះជាបន្តបន្ទាប់។
ធ្វើជាវាគ្មិនក្នុងសន្និសីទកាសែត នៅទីស្តីការគណៈរដ្ឋមន្ត្រីនាព្រឹកថ្ងៃទី១៨ ខែមែនា ឆ្នាំ២០២០ អ្នកស្រីវេជ្ជបណ្ឌិត ថ្លែងដូច្នេះថា៖«យើង សង្ឃឹមថា គាត់ នឹងវិវត្តទៅរកភាពល្អប្រសើរ ហើយគាត់ នឹងអាចមានសភាពជាសះស្បើយ ក្នុងពេលខាងមុខ»។
អ្នកស្រី បន្ថែមថា អ្នកមានវីរុសកូវីដ-១៩ ផ្សេងទៀត នៅកម្ពុជា ដែលមានអាយុចន្លោះពី២០ឆ្នាំ ទៅ៤០ឆ្នាំ គឺមានកម្លាំងខ្លាំង ហើយសុខភាពរបស់ពួកគាត់ មិនគួរឲ្យមានការព្រួយបារម្ភឡើយ។ ប៉ុន្តែ អ្នកស្រី និយាយថា លើកលែងតែជនជាតិអង់គ្លេស៣នាក់ប៉ុណ្ណោះ ដែលមានសុខភាពមិនសូវល្អដូចគេ ដោយសារពួកគាត់ មានវ័យចាស់ជរា ដោយមានអាយុចាប់ពី៦០ឆ្នាំឡើងទៅ។
អ្នកនាំពាក្យរូបនេះ មានប្រសាសន៍ដូច្នេះថា៖«ពួកគាត់ មួយចំនួនធំ នៅមានសភាពធម្មតានៅឡើយទេ»។
បុរសខ្មែរអាយុ៣៨ នៅខេត្តសៀមនោះ បានឆ្លងកូវីដ-១៩ ពីបុរសជនជាតិជប៉ុន ដែលជាថៅកែ។
សូមបញ្ជាក់ថា គិតត្រឹមព្រឹកថ្ងៃទី១៨ ខែមីនា ឆ្នាំ២០២០ កម្ពុជា រកឃើញមនុស្ស៣៥នាក់ហើយ ដែលឆ្លងកូវីដ-១៩ ដោយក្នុងនោះ មានម្នាក់ គឺបុរសជនជាតិចិន បានជាសះស្បើយវិញ៕
Tag:
ឱ វណ្ឌឌីន
COVID-19
© រក្សាសិទ្ធិដោយ thmeythmey.com