COVID-19
ជាតិ
សង្គមជាតិ
លោកស្រី ឱ វណ្ណឌីន អ្នកនាំពាក្យក្រសួងសុខាភិបាល ថ្លែងនៅក្នុងសន្និសីទសារព័ត៌មានស្តីអំពីកូវីដ-១៩ នៅកម្ពុជា នាព្រឹកថ្ងៃទី១៨ ខែមីនា ឆ្នាំ២០២០
×![]()
ភ្នំពេញ៖ គិតមកត្រឹមថ្ងៃទី១៨ ខែមីនានេះ កម្ពុជាមានមនុស្សចំនួន១១១២នាក់ហើយដែលបានទៅធ្វើតេស្តរកCOVID-19 នៅវិទ្យាស្ថានបាស្ទ័រកម្ពុជា ដោយមិនគិតថ្លៃ។ តួលេខអ្នកធ្វើតេស្តទាំងនេះ គឺរាប់បញ្ជូលទាំងអ្នកវិជ្ចមានCOVID-19 ទាំង៣៥នាក់។ នេះជាការបញ្ជាក់របស់លោកស្រី ឱ វណ្ណឌីន អ្នកនាំពាក្យក្រសួងសុខាភិបាល នាសន្និសីទសារព័ត៌មានអំពីកូវីដ-១៩ នៅកម្ពុជា ព្រឹកថ្ងៃទី១៨ ខែមីនា ។
អ្នកស្រី ឱ វណ្ណឌីន បានអះអាងថា ខាងសុខាភិបាល មិនយកថ្លៃចំណាយពីពលរដ្ឋ លើការធ្វើតេស្តរកCOVID-19 រួមទាំងថ្លៃព្យាបាលនោះទេ។ អ្នកស្រី ឱ វណ្ណឌីន ចាត់ទុកការរាល់ផ្សាយព័ត៌មាន ទាក់ទងនឹងការយកថ្លៃសេវាធ្វើតេស្តរកCOVID-19នេះ គឺជារឿងមិនពិតឡើយ។ អ្នកស្រីប្រាប់ពលរដ្ឋឱ្យរាយការណ៍ទៅក្រសួង បើសិនជារកឃើញថា មន្ត្រីជំនាញសុខាភិបាលរូបណាទារថ្លៃ ធ្វើតេស្តរកCOVID-19នេះ។
អ្នកនាំពាក្យក្រសួងសុខាភិបាល ក៏បានរំឭកឱ្យពលរដ្ឋថែរក្សាអនាម័យផ្ទាល់ខ្លួនជាប្រចាំ ដើម្បីទប់ស្កាត់ និងបង្ការវីរុសនេះ។ រដ្ឋលេខាធិការក្រសួងសុខាភិបាលរួបនេះ បាននិយាយដូច្នេះថា៖«ទោះបីថ្ងៃនេះរកមិនឃើញមានCOVID-19 មែន តែថ្ងៃស្អែកអាចនឹងរកឃើញ។ ដូច្នេះត្រូវផ្តោតអារម្មណ៍ការពារ អនាម័យផ្ទាល់ខ្លួនរបស់យើង»។
គិតមកដល់ថ្ងៃទី១៨ ខែមីនា នេះកម្ពុជាមានករណីកូវីដ-១៩ ចំនួន៣៥ករណីហើយ។ក្នុងចំណោមនោះ ជនជាតិខ្មែរមាន២២នាក់ ម៉ាឡេស៊ី៥នាក់ អង់គ្លេស៣នាក់ បារាំង២នាក់ កាណាដា១នាក់ បែលហ្ស៊ិក១នាក់ និងចិន១នាក់ ដែលជាករណីដំបូង ហើយសះស្បើយ។ នេះបើតាមការបញ្ជាក់ពីលោកស្រី ឱ វណ្ណឌីន អ្នកនាំពាក្យក្រសួងសុខាភិបាលដដែល៕
Tag:
កូវីដ-១៩
© រក្សាសិទ្ធិដោយ thmeythmey.com
