អន្តរជាតិ
បុរសអាមេរិកម្នាក់ បរិច្ចាគទឹកលាងដៃជិត២ម៉ឺនដបដែលលោកទិញស្តុក ជូនដល់មហាជន លោក Mathh Colvin (New York Times)
× បុរសវ័យក្មេងម្នាក់ដែលរស់នៅក្នុងរដ្ឋ Tennessee សហរដ្ឋអាមេរិក រងការស្តីបន្ទោសខ្លាំងបន្ទាប់ពីការទិញស្តុកទុកទឹកអាល់កុលលាងដៃចំនួន១៧៧០០ដប មុននឹងបរិច្ចាគផលិតផលទាំងនេះទៅកាន់មហាជនវិញនៅថ្ងៃទី១៥ ខែមីនា ។ ការចែកចាយបែបនេះ ធ្វើឡើងខណៈលោកត្រូវបានគេស៊ើបអង្កេតពីសកម្មភាពដំឡើងតម្លៃផលិតផលអនាម័យនេះ។
គេហទំព័រ todayonline.com បានបកស្រាយកាលពីថ្ងៃ១៦ មីនានេះថា លោក Matt Colvin ដែលជាអាជីវករនៃក្រុមហ៊ុន Amazon មួយមានដែលមានទីតាំងនៅឯរដ្ឋ Tennessee បានធ្វើការជាមួយនឹងអ្នកស្ម័គ្រចិត្តក្នុងការចែកចាយប្រមាណជា២ភាគ៣នៃស្តុកទឹកអាល់កុលលាងដៃរបស់គាត់នៅក្នុងវិហារសាសនាគ្រឹស្តមួយក្នុងតំបន់ទៅកាន់អ្នកដែលត្រូវការ។ ចំណែក១ភាគ៣ទៀតនៃស្តុកត្រូវបានប្រមូលទុកដោយក្រុមមន្ត្រីក្នុងស្រុក ដើម្បីយកទៅចែកចាយបន្តនៅឯរដ្ឋ Kentucky។
រឿងរបស់លោក Matt ដែលជនជាតិអាមេរិករូបនេះ បានធ្វើឲ្យមានការភ័ន្តច្រលំ និងបង្កទៅជាភាពចម្រូងចម្រាស់ជាច្រើន។ សារព័ត៌មាន The New York Times បានចុះផ្សាយថាលោកបានទិញទឹកសម្អាតដៃទាំងនោះទុកដើម្បីលក់បញ្ចេញវាវិញនៅពេលដែលមានតម្រូវការកាន់តែខ្ពស់។ ភាពមិនពេញចិត្តរបស់មហាជនជាច្រើនត្រូវបានបញ្ចេញជាកំហឹងទាំងនៅក្នុងប្រព័ន្ធអ៊ីនធឺណេត និងជាលក្ខណៈបុគ្គលផ្ទាល់។
នៅក្នុងកិច្ចសម្ភាសន៍ លោក Matt បាននិយាយថា លោកពិតជាមានភាពសោកស្តាយខ្លាំងណាស់ជាមួយនឹងរឿងដែលបានកើតឡើងទាំងអស់នេះ។ គាត់មិនបានរំពឹងអំពីតម្រូវការដ៏ខ្ពស់របស់វាឡើយនៅក្នុងកាលៈទេសៈមួយនេះ។ លោក Matt បានបន្តថា៖«ខ្ញុំបានទិញលក់ផលិតផលអស់ជា១០ឆ្នាំមកហើយ។ ផលិតផលទាំងនោះតែងតែមានស្តុកជានិច្ច។ តែម្តងនេះ ខ្ញុំមិនបានដឹងថាក្រុមហ៊ុនមិនអាចបំពេញស្តុកបាននោះទេ។»
កំហឹងរបស់ប្រជាពលរដ្ឋទូទៅបានបង្កសេចក្តីព្រួយបារម្ភទៅកាន់ខ្លួនលោក ថែមទាំងគ្រួសាររបស់លោកផងដែរ។ មានសារពីមនុស្សមួយចំនួនបានថែមទាំងគំរាមសម្លាប់លោក និងគ្រួសារលោកទៀតផង។ «ខ្ញុំមិនដែលមានបំណងក្នុងការស្តុកទុកឧបករណ៍អនាម័យវេជ្ជសាស្ត្រពីតម្រូវការរបស់មនុស្សនោះទេ» លោក Matt និយាយទាំងយំតិចៗ។
ក្រុមហ៊ុន eBay និង Amazon បានផ្អាកលោក Matt ពីការងារ។ រដ្ឋធេនេស៊ីបានអនុវត្តច្បាប់យ៉ាងតឹងរឹងទៅលើការតម្លើងថ្លៃលើផលិតផលក្នុងពេលមានអាសន្ន។ តែលោក Matt Colvin ប្រហែលជាមិនទទួលរងបញ្ហាអ្វីធំនោះទេ។ នេះគឺដោយសារតែលោក Matt បានទិញដូរផលិតផលទឹកលាងដៃទាំងនោះតាំងពីមុនថ្ងៃទី១២មកម្ល៉េះ ពោលគឺមុនពេលដែលរដ្ឋធេនេស៊ីប្រកាសអនុវត្តច្បាប់លើការដំឡើងតម្លៃទំនិញ។ គាត់មិនបានទិញដូរអ្វីទៀតនោះឡើយក្រោយថ្ងៃទី១២ ខែមីនា។ ហេតុដូចនេះ អ្នកនាំពាក្យមន្ត្រីម្នាក់នៃរដ្ឋធេនេស៊ីបាននិយាយថា សកម្មភាពទិញដូររបស់លោក Matt គឺស្ថិតនៅក្រោមច្បាប់ពាណិជ្ជកម្មទិញដូរធម្មតា៕
© រក្សាសិទ្ធិដោយ thmeythmey.com