COVID-19
កីឡាជាតិ
ជាតិ
រូបភាពពេលកីឡាការិនីចូលរួមប្រកួតកីឡាសិស្សបឋមសិក្សាថ្នាក់ជាតិឆ្នាំ២០១៩
×![]()
ការប្រកួតកីឡាសិស្សបឋមសិក្សាថ្នាក់ជាតិប្រចាំឆ្នាំ២០២០ ត្រូវលើកពេលរៀបចំដោយសារបារម្ភពីការរីករាលដាលនៃជំងឺរលាកផ្លូវដង្ហើមបង្កឡើងដោយមេរោគកូរ៉ូណាប្រភេទថ្មី COVID-19។ នេះបើតាមសេចក្តីប្រកាសព័ត៌មានរបស់ក្រសួងអប់រំ យុវជននិងកីឡា ដែលចេញផ្សាយនៅថ្ងៃទី១៨ ខែមីនា ឆ្នាំ២០២០ នេះ។ 
គោលបំណងនៃការលើកពេលនេះ គឺដើម្បីទប់ស្កាត់ការរីករាលដាលនៃមេរោគផ្លូវដង្ហើមប្រភេទថ្មី COVID-19 ដែលកំពុងរីករាលដាលទូទាំងពិភពលោក។ ការសម្រេចនេះ ធ្វើឡើងក្រោយអង្គការសុខភាពពិភពលោក និងក្រសួងសុខាភិបាលកម្ពុជាចេញសេចក្តីប្រកាសព័ត៌មានស្តីពី វិធានការពារ និងទប់ស្កាត់ការរីករាលដាលនៃ COVID-19។
បើតាមសេចក្តីប្រកាសព័ត៌មានដែលចុះហត្ថលេខាដោយលោក ស សុខា រដ្ឋលេខាធិការក្រសួងអប់រំ ការលើកពេលនេះពុំមានពេលកំណត់នោះទេ ពោលគឺក្រសួងនឹងប្រាប់ពីកាលបរិច្ឆេទថ្មី ក្រោយការរីករាលដាលនៃ COVID-19 មានការធូរស្បើយនៅកម្ពុជា។ តាមគម្រោងការប្រកួតកីឡាសិស្សបឋមសិក្សាថ្នាក់ជាតិប្រចាំឆ្នាំ២០២០ គ្រោងរៀបចំចន្លោះពីថ្ងៃទី២៥ មីនា ដល់ថ្ងៃទី៣ ខែមេសា ឆ្នាំ២០២០។
គិតត្រឹមរសៀលថ្ងៃទី១៨ ខែមីនា នេះ កម្ពុជារកឃើញអ្នកឆ្លង COVID-19 សរុបចំនួន៣៥ករណី បន្ទាប់ពីក្រសួងសុខាភិបាលនៅព្រឹកថ្ងៃទី១៨ ខែមីនា ប្រកាសរកឃើញតេស្តវិជ្ជមាន COVID-19 ពីរករណីលើជនជាតិម៉ាឡេស៊ីនៅខេត្តកែប។ ករណីឆ្លងមេរោគផ្លូវដង្ហើមប្រភេទថ្មីនេះ រាជរដ្ឋាភិបាលកម្ពុជាបានសម្រេចបិទសាសារៀន KTV ក្លិបកម្សាន្ត រោងភាពយន្ត ការជួបជុំបែបសាសនា ការប្រគំតន្ត្រី និងការចូលទស្សនាព្រះបរមរាជវាំងជាបណ្តោះអាសន្នផងដែរ៕
Tag:
កីឡាសិស្សបឋមសិក្សាថ្នាក់ជាតិ
COVID-19
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
