COVID-19
អន្តរជាតិ
ថៃតម្រូវឲ្យអ្នកដំណើរមកពី១៥ប្រទេសបញ្ជាក់ថាគ្មាន COVID-19 និងធានារ៉ាប់រងជាមុន ទើបឲ្យឡើងយន្តហោះ អាកាសយានដ្ឋានមួយកន្លែងរបស់ថៃ។ រូបភាពAFP
×
ដោយ៖ គយ រតនបុរិន្ទ
អាជ្ញាធរអាកាសចរស៊ីវិលថៃ តម្រូវឲ្យអ្នកដំណើរទាំងអស់ ទាំងជនជាតិបរទេស និងជនជាតិថៃបង្ហាញថា ខ្លួនគ្មានជំងឺ COVID-19 មុននឹងអនុញ្ញាតឲ្យឡើងយន្តហោះធ្វើដំណើរមកប្រទេសថៃ។ លោក Chula Sukmanop ប្រធានអាជ្ញាធរអាកាសចរស៊ីវិលថៃបានចេញចំណាត់ការនេះនៅពីថ្ងៃពុធ ១៨មីនា ក្នុងគោលបំណងខ្ទប់ការរាលដាលនៃជំងឺ COVID-19។
អាជ្ញាធរថៃ ចាប់ផ្ដើមរឹតបន្តឹងការធ្វើដំណើរតាមផ្លូវអាកាសថែមទៀតដើម្បីទប់ស្កាត់ការរាលដាល COVID-19 ។ ក្នុងវិធានការចុងក្រោយ អាកាសចរណ៍ស៊ីវិលថៃបានណែនាំឲ្យក្រុមហ៊ុនអាកាសចរណ៍ ពិនិត្យមើលប្រវត្តិធ្វើដំណើររបស់អ្នកដំណើររយៈពេល១៤ថ្ងៃចុងក្រោយ។ នេះបើតាមផ្សាយរបស់កាសែតបាងកកប៉ុស្តិ៍។
បន្ថែមពីនេះ ក្រុមហ៊ុនអាកាសចរណ៍ ត្រូវទាមទារអ្នកដំណើរមកពី១៥ប្រទេសឲ្យបង្ហាញថាវិញ្ញាបនប័ត្រគ្មាន COVID-19 ដែលចេញដោយអាជ្ញាធរសុខាភិបាល មិនលើសពី ៧២ម៉ោងមុននឹងចាកចេញ បើទោះបីជាអ្នកដំណើរនោះទៅទីណាក៏ដោយ។ ម្យ៉ាងវិញទៀត ក្រុមហ៊ុនអាកាសចរណ៍ ត្រូវទាមទារឲ្យអ្នកដំណើរមានការធានារ៉ាប់រងព្យាបាល COVID-19 ក្នុងប្រទេសថៃ ដែលមានតម្លៃយ៉ាងតិច ១សែនដុល្លារផងដែរ។
ប្រទេស និងតំបន់ទាំង១៥មាន ចិន ហុងកុង ម៉ាកាវ អ៊ីរ៉ង់ អ៊ីតាលី និងកូរ៉េខាងត្បូង អង់គ្លេស ដាណឺម៉ាក បារាំង អាល្លឺម៉ង់ ជប៉ុន ហួឡង់ ន័រវ៉េស អេស្ប៉ាញ ស៊ុយអែត ស្វីស និងសហរដ្ឋអាមេរិក។ ចំពោះប្រទេសជប៉ុនចំណាត់ការនោះសំដៅលើអ្នកដំណើរដែលមកពីទីក្រុងមួយចំនួនតែប៉ុណ្ណោះ។ ដោយឡែកអ្នកដំណើរដែលមកពីចិន អ៊ីតាលី អ៊ីរ៉ង់ និងកូរ៉េខាងត្បុង នឹងត្រូវដាក់ឲ្យនៅដាច់ពីគេរយៈពេល១៤ថ្ងៃសិនផងដែរ។
ជាវិធានការបង្ការ អាជ្ញារធរអាកាសចរស៊ីវិលថៃ ក៏បង្គាប់ឲ្យអ្នកដំណើរអង្គុយឲ្យឆ្ងាយពីគ្នា និងសម្លាប់មេរោគក្នុងយន្តហោះ។ នេះបើតាមប្រភពព័ត៌មានដដែល។
ក្នុងករណី អ្នកដំណើរដែលមិនអាចបំពេញតាមលក្ខខណ្ឌតម្រូវខាងលើ នឹងមិនអនុញ្ញាតឲ្យឡើងយន្តហោះមកប្រទេសថៃទេ។ ចំណែកឯក្រុមហ៊ុនអាកាសចរណ៍ណាដែលមិនព្រមអនុវត្តតាម នឹងតម្រូវឲ្យចេញថ្លៃធ្វើដំណើរ ការព្យាបាល និងការឲ្យនៅតែឯងរបស់អ្នកជំងឺ ព្រមទាំងបង់ប្រាក់ដើម្បីទប់ស្កាតជំងឺផងដែរ៕
© រក្សាសិទ្ធិដោយ thmeythmey.com