AFC សម្រេចផ្អាកការប្រកួតដែលនៅសេសសល់ ដោយសារបញ្ហា COVID-19

COVID-19

កីឡាជាតិ

ជាតិ

AFC សម្រេចផ្អាកការប្រកួតដែលនៅសេសសល់ ដោយសារបញ្ហា COVID-19

19, Mar 2020 , 8:39 pm

រូបភាព

ដោយ:

ដើម្បីបង្ការនិងទប់ស្កាត់ការរីករាលដាលជាសកលនៃជំងឺផ្លូវដង្ហើមបង្កឡើងដោយមេរោគកូរ៉ូណាប្រភេទថ្មី COVID-19 សហព័ន្ធកីឡាបាល់ទាត់ទ្វីបអាស៊ី(AFC)សម្រេចផ្អាកការប្រកួត AFC Cup 2020 ដែលនៅសល់ជាបណ្តោះអាសន្ន។ AFC នឹងជួនដំណឹងពីពេលវលាប្រកួតថ្មី នៅពេលការរីករាលនៃជំងឺនេះមានស្ថានភាពធូរស្បើយ។

ស្របពេលការរីករាលដាលនិងចំនួនអ្នកផ្ទុកមេរោគកូរ៉ូណាប្រភេទថ្មី COVID-19 នៅតែបន្តកើនឡើង ធ្វើឲ្យប្រទេសមួយចំនួនជុំវិញពិភពលោកបានចាត់វិធានការជាបន្តបន្ទាប់។ បញ្ហានេះ បានធ្វើឲ្យប្រទេសនិងស្ថាប័នមួយចំនួនត្រូវបង្ខំចិត្តផ្អាកការប្រកួតព្រឹត្តិការណ៍ប្រកួតកីឡាជាបន្តបន្ទាប់ ដោយសារបារម្ភពីការរីករាលដាលនៃមេរោគផ្លូវដង្ហើមប្រភេទថ្មីនេះ។ ជាក់ស្តែងនៅថ្ងៃទី១៨ ខែមីនា ឆ្នាំ២០២០ សហព័ន្ធកីឡាបាល់ទាត់ទ្វីបអាស៊ីបានចេញសេចក្តីប្រកាសព័ត៌មានមួយ ដោយសម្រេចផ្អាកការប្រកួតវគ្គជម្រុះ AFC Cup 2020 ដែលនៅសល់ជាបណ្តោះអាសន្ន។ ការផ្អាកនេះ AFC មិនបានកំណត់ពេលវេលាឡើយ ហើយពួកគេនឹងប្រាប់ពីពេលវេលាប្រកួតថ្មី ក្រោយស្ថានភាពការរីករាលនៃ COVID-19 មានភាពធូរស្រាល។

សេចក្តីប្រកាសព័ត៌មានរបស់ AFC បានបញ្ជាក់បន្ថែមថា ការផ្អាកនេះគឺដើម្បីចូលរួមបង្ការនិងទប់ស្កាត់ការរីករាលដាលនៃមេរោគផ្លូវដង្ហើមប្រភេទថ្មី COVID-19 ដែលកំពុងរាតត្បាតទូទាំងពិភពលោក។ ការសម្រេចរបស់ AFC ធ្វើឡើងក្រោយប្រទេសនៅក្នុងតំបន់អាស៊ីមួយចំនួន បានចេញចំណាត់ការដោយហាមប្រជាពលរដ្ឋខ្លួនចេញទៅក្រៅប្រទេស និងហាមបរទេសចូលប្រទេសខ្លួនជាដើម។ កត្តានេះក្លាយជាបញ្ហាប្រឈមសម្រាប់ AFC ក្នុងការអនុញ្ញាតឲ្យបន្តរៀបចំព្រឹត្តិការណ៍នេះ។

មិនមែនមានតែ AFC នោះទេ សូម្បីសហព័ន្ធកីឡាបាល់ទាត់អន្តរជាតិ(FIFA)ក៏បានផ្អាកការប្រកួតវគ្គជម្រុះ FIFA World Cup 2022 មិនកំណត់ពេលវេលា ដោយសារការរីករាលដាលនៃ COVID-19 ផងដែរ។ គិតត្រឹមរសៀលថ្ងៃទី១៩ ខែមីនា ឆ្នាំ២០២០ មេរោគកូរ៉ូណាប្រភេទថ្មី COVID-19 បានរាតត្បាតជាង១៦០ប្រទេសហើយ៕