COVID-19
ជាតិ
ក្រសួងមួយចំនួន ចាប់ផ្តើមអនុវត្តតាមគ្នា «ឲ្យមន្ត្រីធ្វើការនៅផ្ទះ» រូបពីទំព័រហ្វេសប៊ុករបស់ក្រសួង
× ភ្នំពេញ៖ នៅកម្ពុជា ក្រសួងមួយចំនួន បានអនុញ្ញាតឲ្យមន្រី្តរបស់ខ្លួន បំពេញការងារពីផ្ទះ តាមប្រព័ន្ធអនឡាញ ដើម្បីបង្កើនការប្រុងប្រយ័ត្ន និងទប់ស្កាត់ការរីករាលដាលជំងឺកូវីដ-១៩។
ការអនុញ្ញាតឲ្យមន្រី្តធ្វើការពីផ្ទះតាមប្រព័ន្ធអនឡាញ ត្រូវបានក្រសួងនានា សម្រេចធ្វើឡើងជាបន្តបន្ទាប់ ក្រោយករណីឆ្លងកូវីដ-១៩ នៅកម្ពុជា មានការកើនឡើងគួរឲ្យកត់សម្គាល់ ក្នុងសប្ដាហ៍នេះ។ ក្រសួង ដែលអនុញ្ញាតឲ្យមន្រី្ត ធ្វើការពីផ្ទះ មានដូចជា ក្រសួងការបរទេស និងសហប្រតិបត្តិការអន្តរជាតិ, ក្រសួងសេដ្ឋកិច្ច និងហិរញ្ញវត្ថុ, ក្រសួងអប់រំ យុវជន និងកីឡា, ក្រសួងឧស្សាហកម្ម និងសិប្បកម្ម, ក្រសួងពាណិជ្ជកម្ម និង ទីស្ដីការគណៈរដ្ឋមន្រី្ត ជាដើម។ រដ្ឋសភា ក៏ប្រកាសឲ្យមន្ត្រីធ្វើការនៅផ្ទះដែរ។
យ៉ាងណាក៏ដោយ ក្រសួងឬស្ថាប័នខាងលើ ក៏នៅតែតម្រូវឲ្យមន្ត្រីខ្លួនមួយចំនួន ត្រូវមានវត្តមាននៅកន្លែងធ្វើការដែរ មិនមែនមានន័យថា ត្រូវធ្វើការនៅផ្ទះទាំងអស់គ្នានោះទេ។ ចំពោះមន្រ្តីណា ដែលអាចធ្វើនៅផ្ទះបាន ដោយមិនប៉ះពាល់ដល់ការងារ ពួកគេ នឹងត្រូវអនុញ្ញាត ឲ្យធ្វើការនៅផ្ទះ ហើយមន្រ្តីណា ដែលចាំបាច់ត្រូវតែមានវត្តមាននៅកន្លែងធ្វើការ គឺពួកគេ ត្រូវតែទៅកន្លែងធ្វើការ។
រីឯ ក្រសួងកសិកម្ម រុក្ខាប្រមាញ់ និង នេសាទ, ក្រសួងប្រៃសណីយ៍និងទូរគមនាគមន៍, ក្រសួងមហាផ្ទៃ និង ក្រសួង-ស្ថាប័នផ្សេងៗទៀត ទោះមិនបានអនុញ្ញាតឲ្យមន្ត្រីធ្វើការនៅផ្ទះ តែក៏បានចេញវិធានការតឹងរ៉ឹង ក្នុងការការពារពីជំងឺកូវីដ-១៩ បញ្ហាសុខភាព និង តាមដានពីប្រវត្តិមន្រី្តខ្លួន ជាពិសេសមន្ត្រីដែលទើបវិលត្រឡប់ពីក្រៅប្រទេស ត្រូវដាក់ឲ្យនៅដោយឡែករយៈពេល១៤ថ្ងៃ។ ទន្ទឹមនឹងនេះ ប្រសិនបើមានករណីចាំបាច់ មន្រី្តអាចធ្វើការតាមប្រព័ន្ធអនឡាញ ដើម្បីធានានិរន្តរភាពការងារ។
គិតត្រឹមយប់ថ្ងៃទី១៩ ខែមីនា ឆ្នាំ២០២០ កម្ពុជា រកឃើញមនុស្ស៤៧នាក់ហើយ ដែលឆ្លងកូវីដ-១៩ និងមានមនុស្សជាង១ពាន់នាក់ បានទៅធ្វើតេស្តរកវីរុសកូវីដ-១៩៕
Tag:
Covid-19
មន្ត្រីធ្វើការនៅផ្ទះ
© រក្សាសិទ្ធិដោយ thmeythmey.com