COVID-19
អន្តរជាតិ
ចិនគ្មានករណីឆ្លង COVID-19 ក្នុងស្រុកពីរថ្ងៃជាប់គ្នា តែករណីនាំចូលបន្តកើនឡើង
អ្នកដំណើរទៅកាន់ខេត្តគ័ងតុងម្នាក់ កំពុងរាយការណ៍ពីសុខភាពខ្លួននៅព្រលានយន្តហោះទីក្រុងប៉េកាំង។ រូបភាព Xinhua
×![]()
ដោយ: តន ចាន់រិទ្ធារ៉ា
នៅថ្ងៃទី១៩ ខែមីនា គេមិនឃើញមានករណីឆ្លងជំងឺ COVID-19 ថ្មីនៅចិនដីគោកឡើយ។ នេះជាថ្ងៃទីពីរដែលចិនមិនបានរាយការណ៍ពីករណីឆ្លងបែបនេះ ដែលសូម្បីតែទីក្រុងវូហានដែលជាចំណុចផ្ដើមនៃការផ្ទុះវីរុស ក៏គ្មានករណីឆ្លងដែរ។ ប៉ុន្តែការរកឃើញវីរុសក្នុងខ្លួនអ្នកដំណើរដែលទៅដល់ចិន បានបន្តកើនឡើងដល់តួលេខច្រើនបំផុតប្រចាំថ្ងៃ។ ជាមួយគ្នានេះ ករណីស្លាប់ដោយសារ COVID-19 ក៏បានធ្លាក់ចុះផងដែរ គឺមានតែបីនាក់ប៉ុណ្ណោះ។ 
បើតាមទិន្នន័យរបស់គណៈកម្មការសុខាភិបាលចិន នៅថ្ងៃទី១៩ ខែមីនា ចិនមានករណីឆ្លង COVID-19 ថ្មីចំនួន៣៩ ដែលសុទ្ធសឹងជាករណីនាំចូលទាំងអស់។ បូកករណីថ្មីនេះ ករណីឆ្លងសរុបនៅចិនមានចំនួន៨០៩៦៧។ ករណីស្លាប់បីនាក់ទៀត ធ្វើឲ្យតួលេខអ្នកស្លាប់សរុបនៅចិនមានចំនួន៣២៤៨នាក់ផងដែរ។
ក្នុងចំណោមករណីឆ្លងថ្មី មាន១៤ករណីរកឃើញនៅខេត្តគ័ងតុង ៨ករណីនៅទីក្រុងសៀងហៃ និង៦ករណីនៅរដ្ឋធានីប៉េកាំង។ នេះបើតាមទិន្នន័យផ្សាយដោយទីភ្នាក់ងារព័ត៌មានរដ្ឋចិន Xinhua ។ វូហាន ដែលជាទីក្រុងធំរបស់ខេត្តហ៊ូប៉ី មិនមានរបាយការណ៍ពីករណីឆ្លងថ្មីឡើយនៅថ្ងៃទី១៩ ខែមីនា ខណៈថ្ងៃទី១៨ ខែមីនា ក៏មិនមានដែរ។
ជាទូទៅ ស្ថានការណ៍នៅចិន បានត្រឡប់ទៅរកស្ថានភាពប្រសើរឡើងវិញ ដោយរោងចក្រចាប់ផ្ដើមដំណើរការឡើងវិញ ហើយសាលារៀននៅតាមតំបន់ខ្លះក៏បើកវិញដែរ។ ប៉ុន្តែនៅវូហាន ការរឹតបន្តឹងនៅតែបន្តអនុវត្តដដែល ទោះមានការបើកចំហខ្លះក្ដី។ នៅខេត្តហ៊ូប៉ី អាជ្ញាធរអនុញ្ញាតឲ្យប្រជាជនមានសុខភាពល្អ និងរស់នៅតំបន់មានហានិភ័យទាប អាចចាកចេញពីខេត្តបាន ប្រសិនបើពួកគេត្រូវទៅធ្វើការ ឬមានលំនៅនៅក្រុងផ្សេង។
យ៉ាងណាមិញ រលកនៃការឆ្លង COVID-19 ទីពីរដែលកើតក្នុងចំណោមអ្នកដំណើរទៅដល់ទឹកដី បានក្លាយជាក្ដីបារម្ភខ្លាំងសម្រាប់រដ្ឋាភិបាលចិន ទោះជាមានវិធានការតឹងរ៉ឹងក្ដី។ គិតត្រឹមថ្ងៃទី១៩ ខែមីនា ករណីនាំចូលជំងឺនេះនៅចិនមានចំនួនដល់ទៅ២២៨នាក់ ដែលភាគច្រើនជាអ្នកដំណើរមានប្រវត្តិធ្លាប់ទៅកាន់ប្រទេសដែលកំពុងរងការវាយប្រហារខ្លាំងដូចជាអ៊ីរ៉ង់ និងអ៊ីតាលីជាដើម។
នៅអ៊ីតាលី អ្នកជំនាញសុខាភិបាលចិន កំពុងញាប់ដៃជើងក្នុងការជួយសមភាគីរបស់ខ្លួនដើម្បីទប់ស្កាត់ការរាលដាលវីរុសដែលចេះតែកើនឡើងជាលំដាប់។ បច្ចុប្បន្ន អ៊ីតាលី ឈរលើចិនទៅទៀតជាប្រទេសដែលមានករណីដោយសារ COVID-19 ស្លាប់ជាងគេ៕
Tag:
ចិន
COVID-19
© រក្សាសិទ្ធិដោយ thmeythmey.com
