COVID-19
កីឡាអន្តរជាតិ
អន្តរជាតិ
COVID-19៖ Man Utd ធានាបើកលុយឲ្យបុគ្គលិកជាង៣០០០នាក់ ទោះគ្មានប្រកួតក្តី
× Manchester United នឹងបន្តបើកប្រាក់ខែឲ្យបុគ្គលិកដូចធម្មតា បើទោះបីការប្រកួតដែលនៅសេះសល់ទាំងប៉ុន្មានក្នុងរដូវកាលនេះត្រូវលុបចោល ឬលេងដោយបិទទ្ធារកីឡដ្ឋានក្តី។ ការអះអាងបែបនេះ ក្រោយមានការពន្យារពេលប្រកួតបន្ថែមទៀតនៅអង់គ្លេស ដោយសារតែ COVID-19 អុកឡុកកាន់តែខ្លាំង។
សហព័ន្ធកីឡាបាល់ទាត់អង់គ្លេស (FA) បានប្រកាសជាថ្មីទៀតនៅថ្ងៃទី១៩ ខែមីនាថា Premier League ត្រូវពន្យារពេលការប្រកួតបន្ថែមទៀតរហូតដល់ថ្ងៃទី៣០ ខែមេសា ខណៈការពន្យារដំបូងត្រឹមថ្ងៃទី៤ មេសាប៉ុណ្ណោះ។ ការពន្យារពេលបន្ថែមនេះ ដោយសារតែជំងឺរលាកសួតបង្កដោយកូរ៉ូណាវីរុសប្រភេទថ្មី (COVID-19) រាលដាលខ្លាំងក្លាលើទឹកដីអង់គ្លេស និងប្រទេសតំបន់អឺរ៉ុបជាច្រើនទៀត។ ប៉ុន្តែ បើទោះយ៉ាងនេះក្តី ក្លិបបិសាចក្រហម នៅតែអះអាងថាប្រាក់បៀវត្សរបស់បុគ្គលិកខ្លួនទាំងអស់នឹងមិនប៉ះពាល់ឡើយ។
Old Trafford នឹងធ្វើជាម្ចាស់ផ្ទះនៃការប្រកួតក្របខណ្ឌលីគកំពូលអង់គ្លេសចំនួនបួនទៀត ប្រសិនបើមានការអនុញ្ញាតឲ្យមានការប្រកួតឡើងវិញដើម្បីបញ្ចប់ឲ្យបានរួចរាល់សម្រាប់រដូវកាល ២០១៩-២០ នេះ។
ក្លិប Man Utd ត្រូវបានគេជឿថាត្រូវចំណាយសរុបអស់ ១លានផោន (១,១៦លានដុល្លារអាមេរិក) ដើម្បីបើកឲ្យបុគ្គលិកលើសពី ៣០០០ នាក់ ក្នុងរយៈពេលមួយខែ។ ថ្មីដ្បិតថាត្រូវចំណាយទាំងគ្មានការប្រកួត តែក្លិបមានមូលដ្ឋានក្នុងក្រុង Manchester មួយនេះធានាបង់ប្រាក់ឲ្យបុគ្គលិកដូចធម្មតា ទោះការពន្យារពេលមានរយៈពេលយូរយ៉ាងណាក៏ដោយ។
«នេះជាកាយវិការល្អមួយដើម្បីឆ្លុះបញ្ចាំងពីបំណងរបស់ក្លិបក្នុងការកាត់បន្ថយភាពមិនប្រាកដប្រជាផ្នែកហិរញ្ញវត្ថុសម្រាប់បុគ្គលិក បើទោះកំពុងប្រឈមក្តី។ យើងត្រូវ ទទួលស្គាល់តួនាទីសំខាន់របស់ពួកគេក្នុងការផ្តល់សេវាកម្មដល់អ្នកគាំទ្ររបស់យើង»។ នេះជាសេចក្តីប្រកាសរបស់ក្លិប Man Utd។
លោក Ed Woodward នាយកប្រតិបត្តិក្លិប Man Utd ក៏បានបន្ថែមដែរថា ក្លិបពឹងផ្អែកលើបុគ្គលិកឆ្នើមៗទាំងអស់នោះដើម្បីផ្តល់សេវាកម្ម និងបទពិសោធន៍ពិសេសៗដល់អ្នកគាំទ្រនៅ Old Trafford។
គិតត្រឹមថ្ងៃទី២០ ខែមីនានេះ ចក្រភពអង់គ្លេសបានកើតចំនួនអ្នកស្លាប់ដោយសារ COVID-19 រហូតដល់១៤៤នាក់ ខណៈអ្នកឆ្លងកើនដល់៣២៦៩ករណីពោលគឺលើសពីម្សិលមិញជិត១ពាន់នាក់ រីឯអ្នកជាសះស្បើយមានតែ៦៥នាក់ដដែល៕
Tag:
COVID-19
Premier League
© រក្សាសិទ្ធិដោយ thmeythmey.com