COVID-19
អន្តរជាតិ
កូរ៉េខាងត្បូង ចង់រួមដៃជាមួយចិននិងជប៉ុនដើម្បីបន្ថយផលប៉ះពាល់សង្គមនិងសេដ្ឋកិច្ចដោយសារ COVID-19 រូបភាព Xinhua
× នៅថ្ងៃសុក្រ ២០មីនានេះ រដ្ឋមន្ត្រីការបរទេសកូរ៉េខាងត្បូង អ្នកស្រី Kang Kyung-wha បានស្នើឲ្យមានកិច្ចប្រឹងប្រែងរួមរវាងកូរ៉េខាងត្បួង ចិន និងជប៉ុនដើម្បីកាត់បន្ថយផលប៉ះពាល់សង្គមនិងសេដ្ឋកិច្ចដែលបណ្តាលមកពី COVID-19 ។ អ្នកស្រី Kang ស្នើបែបនេះ ធ្វើឡើងក្នុងជំនួបតាមវីដេអូជាមួយសមភាគីចិន និងជប៉ុន។
«ខ្ញុំជឿថា ប្រទេសទាំង៣ គួរពិភាក្សាគ្នាដើម្បីកាត់បន្ថយផលប៉ះពាល់សេដ្ឋកិច្ច និងសង្គម ក៏ដូចជាការថយចុះនូវការប្រាស្រ័យទាក់ទងរវាងមនុស្សនឹងមនុស្ស និងកិច្ចសហប្រតិបត្តិការក្នុងកំឡុងពេលមានវិបត្តិ រួមជាមួយនឹងកិច្ចប្រឹងប្រែងដើម្បីកាត់បន្ថយការរាលដល់របស់វីរ៉ុស»។ នេះជាការលើកឡើងរបស់លោកស្រី Kang Kyung-wha ក្នុងពេលពិភាក្សាជាមួយសមភាគីរដ្ឋមន្ត្រីការបរទេសចិន វ៉ាង យី និងរដ្ឋមន្ត្រីការបរទេសជប៉ុន Toshimitsu Motegi។
បើតាមទីភ្នាក់ងារព័ត៌មាន Yonhap កិច្ចសន្ទនាតាមរយៈប្រព័ន្ធអនឡាញ នេះធ្វើឡើងបន្ទាប់ពីកូរ៉េខាងត្បូងបានទាមទារជាច្រើនដងឲ្យប្រទេសដទៃលើកចោលបម្រាមមួយចំនួន ដោយអនុញ្ញាតឲ្យអ្នកជំនួញ ឫអ្នកដែលមានការសំខាន់របស់កូរ៉េខាងត្បូង អាចចូលទឹកដីប្រទេសដទៃបាន។
គិតត្រឹមថ្ងៃទី២០ ខែមីនា មានប្រទេស និងដែនដីចំនួន ១៧៤ហើយ ដែលបានហាមមិនឲ្យអ្នកដំណើរមកពីកូរ៉េខាងត្បូងចូលទឹកដីរបស់ខ្លួន ដោយខ្លាចការសាយភាយរបស់ជម្ងឺ COVID-19។ ការហាមឃាត់បែបនេះបានធ្វើឲ្យប៉ះពាល់ដល់ក្រុមហ៊ុនកូរ៉េជាច្រើនដែល មានពាណិជ្ជកម្មនៅក្រៅប្រទេស។ ទីក្រុង Daegu និងខេត្ត North Gyeongsang ជាគោលដៅនៃបម្រាមធ្វើដំណើររបស់ប្រទេសទាំងនោះ ព្រោះតំបន់ទាំងពីរជាប្រភពចម្លង COVID-19 ។
ជប៉ុនបានហាមឃាត់ មិនឲ្យអ្នកដំណើរមកពីភាគអាគ្នេយ៍ប្រទេសកូរ៉េខាងត្បូងដែលជាកន្លែងផ្ទុះជំងឺ ចូលប្រទេសរបស់ខ្លួន។ជាការឆ្លើយតប កូរ៉េខាងត្បូងបានសម្រេចបញ្ឈប់ការផ្តល់ទិដ្ឋាការឲ្យអ្នកទេសចរណ៍ជប៉ុន។ ចំពោះចិនវិញ ទីក្រុង និងខេត្តចំនួន២០ របស់ខ្លួនតម្រូវឲ្យអ្នកធ្វើដំណើរពីកូរ៉េខាងត្បូង នៅឲ្យដាច់ពីគេរយៈពេល១៤ថ្ងៃ។
តុល្យការត្រឹមថ្ងៃទី២០ ខែមីនា កូរ៉េខាងត្បួងមានករណីឆ្លងចំនួន ៨,៦៥២ករណី និងស្លាប់ចំនួន៩៤ករណី។ ទោះមានករណីឆ្លងមែន កូរ៉េខាងត្បូង មានករណីស្លាប់តិចបើប្រៀបធៀបនឹងប្រទេសមួយចំនួនដូចជាអ៊ីរ៉ង់ និងអ៊ីតាលីជាដើម៕
Tag:
កូរ៉ខាងត្បួង
COVID-19
© រក្សាសិទ្ធិដោយ thmeythmey.com