យោធាកូរ៉េខាងត្បូង៖ កូរ៉េខាងជើងបាញ់មីស៊ីលបាលីស្ទិកចម្ងាយខ្លីពីរគ្រាប់

អន្តរជាតិ

យោធាកូរ៉េខាងត្បូង៖ កូរ៉េខាងជើងបាញ់មីស៊ីលបាលីស្ទិកចម្ងាយខ្លីពីរគ្រាប់

21, Mar 2020 , 9:43 am

រូបភាព

ដោយ: ថ្មីៗ

កូរ៉េខាងជើង នៅថ្ងៃទី២១ ខែមីនា បានបាញ់កាំជ្រួចពីរគ្រាប់សំដៅសមុទ្រជប៉ុន។ នេះបើតាមការប្រកាសរបស់យោធាកូរ៉េខាងត្បូងដែលជឿថា កាំជ្រួចដែលកូរ៉េខាងជើងបាញ់នេះ ជាមីស៊ីលបាលីស្ទិកចម្ងាយខ្លី។ យោធាកូរ៉េខាងត្បូង បង្ហាញជំហរសោកស្ដាយនឹងទង្វើរបស់កូរ៉េខាងជើង ព្រោះវាកើតឡើងខណៈពិភពលោកកំពុងវីវក់នឹងជំងឺ COVID-19 ។

មីស៊ីលចម្ងាយខ្លីទាំងពីរ ត្រូវបានបាញ់ចេញពីខេត្ត North Pyongan នៅម៉ោង៦ និង៤៥នាទីមួយគ្រាប់ និងនៅម៉ោង៦ និងម៉ោង៥០នាទីមួយគ្រាប់ទៀត។ សេនាធិការដ្ឋានកងទ័ពកូរ៉េខាងត្បូងបញ្ជាក់ថា មីស៊ីលនេះ ហោះបានចម្ងាយ៤១០គីឡូម៉ែត្រ ជាមួយនឹងកម្ពស់អតិបរមា៥០គីឡូម៉ែត្រ។

យោធាកូរ៉េខាងត្បូង បានរិះគន់ការបាញ់នេះ ដោយចាត់ទុកជាទង្វើមិនសមរម្យនៅពេលដែលពិភពលោកទាំងមូលប្រឈមមុខបញ្ហា COVID-19 ។ បើតាមទីភ្នាក់ងារព័ត៌មានYonhap កូរ៉េខាងត្បូងបានស្នើឲ្យកូរ៉េខាងជើងបញ្ឈប់សកម្មភាពបែបនេះជាបន្ទាន់។

នេះជាការបាញ់លើកទីបីរបស់កូរ៉េខាងជើងក្នុងឆ្នាំ២០២០នេះ បន្ទាប់ពីនៅស្ងាត់ស្ងៀមជាយូរមក។ កាលពីថ្ងៃទី៩ ខែមីនា កូរ៉េខាងជើង ក៏បានសាកល្បងកាំជ្រួចរបស់ខ្លួនម្ដងហើយដែរ ដែលកាលណោះជាការសាកល្បងប្រព័ន្ធបាញ់រ៉ុក្កែតចម្រុះធុនធ្ងន់។ គេមិនទាន់ដឹងថា ប្រមុខដឹកនាំកំពូល គីម ជុងអ៊ុន ត្រួតពិនិត្យការបាញ់នេះឬយ៉ាងណាឡើយ។ កន្លងទៅ ប្រព័ន្ធផ្សព្វផ្សាយរដ្ឋកូរ៉េខាងជើង តែងផ្សាយពីវត្តមានលោក គីម ដឹកនាំកិច្ចការនេះ។